ក្រុមហេគឃឺអនាមិក ២នាក់ ជាប់ពាក់ព័ន្ធការវាយប្រហារ តាមបច្ចេកវិទ្យាព័ត៌មាន ត្រូវបានឃាត់ខ្លួន
សារព័ត៌មាន Cambodia News/
ភ្នំពេញ (២២ មេសា ២០១៤) ៖ ក្រុមហេគឃឺអនាមិក (Hacker) កម្ពុជាចំនួន០២នាក់ដែលជាប់ពាក់ព័ន្ធការវាយប្រហារទ្រង់ទ្រាយធំមក លើបណ្តាញបច្ចេកវិទ្យាព័ត៌មាន របស់ស្ថាប័នជាតិសំខាន់ៗនាពេលកន្លងមក ត្រូវបានឃាត់ខ្លួន ដោយការិយាល័យប្រឆាំងបទល្មើសបច្ចេកវិទ្យាព័ត៌មាន នៃនាយកដ្ឋានសន្តិសុខផ្ទៃក្នុង អគ្គស្នងការដ្ឋាននគរបាលជាតិក្រសួងមហាផ្ទៃ។
យោងតាមគេហទំព័ររបស់អគ្គស្នងការដ្ឋាននគរបាលជាតិ ចេញផ្សាយនៅថ្ងៃទី២២ ខែមេសានេះ ឲ្យដឹងថា បន្ទាប់ពីតាមដាន និងសហការស្រាវជ្រាវជាមួយស្ថាប័នFBI ប្រចាំកម្ពុជាអស់រយៈពេលប្រមាណ០៨ខែ មកហើយនោះ កាលពីថ្ងៃទី០៧ ខែមេសា ឆ្នាំ២០១៤សមត្ថកិច្ចនាយកដ្ឋានសន្តិសុខផ្ទៃក្នុង បានឃាត់ខ្លួនជនសង្ស័យពីរនាក់ ដែលជាក្រុមហេគឃឺអនាមិក(Hacker)កម្ពុជា រួមមានឈ្មោះ ប៊ុន ឃីងមង្គលបញ្ញា ហៅ SexmachineឬBlackcyber ភេទប្រុស អាយុ២១ឆ្នាំ និងម្នាក់ទៀត ឈ្មោះ ជូ សុងហេង ហៅZoro ភេទប្រុសអាយុ២១ឆ្នាំ ជានិស្សិតឆ្នាំទី០៣ នៅសាកលវិទ្យាល័យ SETEC។
គេហទំព័រ របស់អគ្គស្នងការដ្ឋាននគរបាលជាតិ បន្តថា ក្រុមហេគឃឺអនាមិកកម្ពុជា បានធ្វើសកម្មភាព វាយប្រហារធ្វើឲ្យរអាក់រអួលមិនដំណើរការគេហទំព័រ(DDos) ជ្រៀតចូលបណ្តាញព័ត៌មានវិទ្យាដោយខុសច្បាប់ លួចទិន្នន័យសម្ងាត់ជាតិពីប្រព័ន្ធព័ត៌មាន និងការកែទំព័រដើមនៃគេហទំព័រ ទៅលើស្ថានប័នជាតិសំខាន់ៗ ប្រមាណ៣០ និងស្ថាប័នឯកជនមួយចំនួនទៀត ចាប់តាំងពីមុនការបោះឆ្នោតជាតិជ្រើសរើសតំណាងរាស្ត្រឆ្នាំ២០១៣ ក្នុងនោះមានដូចជា គេហទំព័រគណៈកម្មាធិការជាតិរៀបចំការបោះឆ្នោត អង្គភាពប្រឆាំងអំពើពុករលួយ ក្រសួងការបរទេស ក្រសួងការពារជាតិ និងសាលារាជធានីភ្នំពេញ ជាដើម៕
