ផ្កាយរណបជប៉ុនចាប់បានរូបភាព ១០ផ្ទាំងបន្ថែម
សារព័ត៌មាន Cambodia News/
ជប៉ុន (២៨ មិនា ២០១៤) ៖ បន្ទាប់ពីផ្កាយរណបរបស់បារាំង និងផ្កាយរណបរបស់ថៃ ចាប់បានរូបភាពជាច្រើនផ្ទាំងអណ្ដែតនៅលើផ្ទៃសមុទ្រឥណ្ឌា ដែលគេសង្ស័យថាជាបំណែករបស់យន្ដហោះប៊ូអ៊ីង៧៧៧របស់ ម៉ាឡេស៊ី រួចមក ពេលនេះ ផ្កាយរណបរបស់ជប៉ុន បានបង្ហាញនូវរូបភាពចំនួន១០ផ្ទាំងបន្ថែមទៀតហើយ អណ្ដែតនៅលើទឹក។
រូបភាពទាំង១០ផ្ទាំងដែលផ្កាយរណបរបស់ជប៉ុនចាប់បាន គឺស្ថិតនៅចម្ងាយ២៥០០គីឡូម៉ែត្រ ភាគនិរតីនៃទីក្រុង ភឺស ដែលជាទីក្រុងស្ថិតនៅភាគខាងលិចប្រទេសអូស្ដ្រាលី នៅម៉ោងប្រមាណជា៩ព្រឹក និងម៉ោង៣រសៀលថ្ងៃទី២៦ខែមីនា។
នេះបើតាមការបញ្ជាក់ ពីភ្នាក់ងារសារព័ត៌មាន ក្យូដូ និង ជីជិ របស់ជប៉ុន។ បើតាមព័ត៌មានពីប្រព័ន្ធផ្កាយរណបបានឱ្យដឹងទៀតថា រូបភាពទាំងអស់នោះ មានបណ្ដោយប្រមាណជា៨ម៉ែត្រនិងទទឹងប្រមាណជា៤ម៉ែត្រ ដែលរដ្ឋាភិបាលរបស់ជប៉ុនបានសន្និដ្ឋានថា វាគឺជាបំណែកនៃយន្ដហោះ ម៉ាឡេស៊ី ដែលបានបាត់ខ្លួន៕