លី ច័ន្ទសីហា ឪពុកម្ដាយ ចង់ឲ្យមានប្ដី
សារព័ត៌មាន Cambodia News/
ភ្នំពេញ (២៤ មិនា ២០១៤)៖ តារាសម្តែង និងជាចៅកែសំអាងការវ័យក្មេង កញ្ញា លី ច័ន្ទសីហា បានបង្ហើបថា បច្ចុប្បន្ននេះមានគេទាក់ទង ចាស់ទុំ (ឪពុក-ម្តាយ) របស់នាង ចង់ចូលស្តីដណ្តឹងជាថ្មីម្ដងទៀត បន្ទាប់ពីផ្ដាច់ពាក្យពីគូដណ្ដឹងចាស់ អស់រយៈពេលជិត២ឆ្នាំមក ប៉ុន្តែត្រង់ចំណុចនេះ នាងមិនទាន់ ឆ្លើយយល់ព្រមនៅឡើយទេ។
សម្រាប់សិល្បៈ ក្នុងស្រុកសព្វថ្ងៃនេះ ត្រូវបានកញ្ញា លី ច័ន្ទសីហា បានប្រាប់ឱ្យដឹងថា ពុំសូវរវល់ទេ ព្រោះនាងបានផ្អាកការសម្តែង មួយរយៈមកហើយ។ ខណៈដែលបច្ចុប្បន្ន នាងមមាញឹកខ្លាំង លើអាជីពរកស៊ីផ្ទាល់ខ្លួនខាងក្រៅ ពោល គឺមុខរបរសំអាងការរបស់នាង។
កញ្ញា លី ច័ន្ទសីហា បាននិយាយបន្តថា “ខ្ញុំបានផ្អាកសិល្បៈ មួយរយៈមកហើយ បើនិយាយទៅជិតពីរឆ្នាំ តែមិនមែនមានន័យថា ខ្ញុំលាឈប់ ពីសិល្បៈទាំងស្រុកនោះឡើយ គឺគ្រាន់តែរយាលឆ្ងាយជាងមុនបន្តិច ដោយសាររវល់ជាប់ដៃ មើលការខុសត្រូវ លើសំអាងការ និងមានគ្រោង ចេញទៅសម្តែង នៅក្រៅប្រទេសជាបន្តទៀត “។
សីហា បាននិយាយថា ពេលនេះលោកឪពុក និងអ្នកម្តាយរបស់នាង ក៏បានគិតគូរ និងសួរនាំ ចំពោះរឿងគូអនាគតនេះ ព្រោះបច្ចុប្បន្នមាន គេទាក់ទងជាមួយពួកគាត់ ហើយសុំចូលស្តីដណ្តឹងទៅតាមប្រពៃណី។
ប៉ុន្តែទោះបីជាយ៉ាងណានាង នៅពុំទាន់ឆ្លើយថាយល់ព្រម ទៅតាម សំណើររបស់គាត់ទេ ព្រោះខ្លាចជាន់រងើកភ្លើងស្នេហ៍ចាស់ គឺចាំមើលទៅមុខបន្តិចទៀតសិន។ បុរសដែលមានបំណងចូលដណ្តឹង តាមរយៈឪពុក ម្តាយ ត្រូវបាន សីហា ប្រាប់ថា ជាអ្នករស់នៅក្នុងស្រុកខ្មែរ ហើយស្គាល់ឪពុកម្តាយរបស់នាង។ ចំណែកនាងផ្ទាល់ ពុំទាន់បានឃើញមុខ និងស្គាល់ ច្បាស់នៅឡើយទេ៕
