CPP និងCNRP នៅថ្ងៃនេះ មិនទាន់មានចំណុចឯកភាព
សារព័ត៌មាន Cambodia News/
ភ្នំពេញ(១០ មិនា ២០១៤)៖ ថ្លែងក្នុងសន្និសីទសារព័ត៌មាន បន្ទាប់ពីជំនួបលើកទី២ របស់គណៈកម្មការចម្រុះកែទម្រង់ការបោះឆ្នោតបក្សជាប់ឆ្នោតទាំងពីរ ប្រធានក្រុមការងារគណបក្សសង្គ្រោះជាតិ លោក សុន ឆ័យ ឲ្យដឹងថា កិច្ចប្រជុំនេះ គឺមិនមានជាសេចក្តីប្រកាសរួមពីចំណុចឯកភាព ដូចមុនលើកមុនៗឡើយ ព្រោះអំណះអំណាង ដែលភាគីទាំងពីរទាមទារគឺហួសសមត្ថកិច្ចនៃការសម្រេចរៀងៗខ្លួន ដែលតម្រូវឲ្យថ្នាក់ដឹកនាំកំពូលជាអ្នកសម្រេច។ 
ប្រធាន គណៈកម្មការចម្រុះគណបក្សប្រជាជនកម្ពុជា លោក ប៊ិន ឈិន ឲ្យដឹងថា កំណែទម្រង់គណៈកម្មការជាតិរៀបចំការបោះឆ្នោត គឺជារឿងស្មុគស្មាញ ក្នុងកិច្ចពិភាក្សាលើកនេះ ដោយសារគណបក្សសង្គ្រោះជាតិ ទាមទារឲ្យមានការដាក់បញ្ចូលច្បាប់គ្រប់គ្រងស្ថាប័ននេះ ទៅក្នុងរដ្ឋធម្មនុញ្ញនៃព្រះរាជាណាចក្រកម្ពុជា ដើម្បីកំណត់លម្អិតពីរចនាសម្ព័ន្ធស្ថាប័ននេះ ហើយការទាមទារ គឺទាមទារឲ្យថ្នាក់ដឹកនាំបក្សទាំងពីរជាអ្នកសម្រេច។
សម្រាប់ របៀបវារៈទី ២ ដែលជាការស្នើរបស់គណបក្សប្រជាជនកម្ពុជា ឲ្យមានច្បាប់គ្រប់គ្រងអង្គការនោះ ប្រធានគណៈកម្មការចម្រុះ គណបក្សសង្គ្រោះជាតិ លោក សុន ឆ័យ យល់ថា ចំណុចនេះ ជារឿងថ្មីមួយ ដែលមិនស្ថិតក្នុងក្របខណ្ឌកំណែទម្រង់ការបោះឆ្នោត ហើយទាមទារឲ្យមានការពិគ្រោះយោបល់លម្អិត ជាមួយដៃគូពាក់ព័ន្ធផងដែរ។
យ៉ាងណាក៏ដោយ គណៈកម្មការចម្រុះកែទម្រង់ការបោះឆ្នោតបក្សទាំងពីរ អះអាងថា នឹងជួបគ្នាជាថ្មីទៀត នៅថ្ងៃទី១៧ ខែមីនា ដើមសប្តាហ៍ក្រោយ ដើម្បីទុកឱកាសពិភាក្សាជាមួយថ្នាក់ដឹកនាំ និងលើករបៀបវារៈទាំងនេះ ពិចារណាបន្ត៕