តុលាការដាក់ទោសអ្នកពាក់ព័ន្ធនឹងហិង្សាលើស្ពានក្បាលថ្នល់
សារព័ត៌មាន Cambodia News/
ភ្នំពេញ(០១ មិនា ២០១៤)៖ យោងតាមប្រភពព័ត៌មានពីមន្ត្រីតុលាការ កាលពីនៅថ្ងៃទី២៨ ខែកុម្ភៈ ២០១៤ បានឲ្យដឹងថា តុលាការក្រុងភ្នំពេញបានសម្រេចផ្តន្ទាទោសជនជាតិវៀត ណាមម្នាក់ឈ្មោះ ង្វៀង ធីឌឹក អាយុ២១ឆ្នាំ ឱ្យជាប់ពន្ធនាគាររយៈពេល៣ឆ្នាំ ក៏ប៉ុន្តែតុលាការបានបង្គាប់ឱ្យអនុវត្តន៍ទោសក្នុងពន្ធនាគាររយៈពេល តែមួយឆ្នាំប៉ុណ្ណោះ ពីបទប្រព្រឹត្តអំពើហិង្សាដោយចេតនានិងធ្វើឱ្យខូចខាតដោយចេតនាដោយ មានស្ថានទម្ងន់ទោស។
លោក ប្រធានចៅក្រមជំនុំជម្រះ សេង នាង ក៏បានសម្រេចផ្តន្ទាទោសមនុស្សចំនួន២ពីរនាក់ផ្សេងទៀតជាកម្មករ រោងអារឈើគឺលោក វ៉ា នឿន និង លោក ឡាញ់ សំនឿន ហៅ (ហេង) ឱ្យជាប់ពន្ធនាគាររយៈពេល៣ឆ្នាំ តែអនុវត្តទោសក្នុងរយៈពេលនៃការឃុំខ្លួនបណ្តោះអាសន្នតែប៉ុណ្ណោះ។ ទោសទាំងប៉ុន្មានត្រូវព្យួរ។
ចំណែកឯជនជាប់ចោទ៣នាក់ផ្សេងទៀតគឺលោក ឯក ចាន់នូ សុខ និស្ស័យ និង តាំង ចុងស៊ែង ជាសិស្សនិងនិស្សិត តុលាការបានសម្រេចឱ្យរួចខ្លួនផុតពីបទចោទប្រកាន់។
តុលាការក្រុងភ្នំពេញកាលពីថ្ងៃទី១៧ខែកុម្ភៈបានបើកសវនាការជំនុំ ជម្រះលើជនជាប់ចោទចំនួន៦រូបពាក់ព័ន្ធនឹងការបង្ក្រាបដោយអំពើ ហិង្សាមួយនៅលើស្ពានក្បាលថ្នល់កាលពីថ្ងៃទី១៥ខែមករាក្នុងអំឡុង ពេលមហាបាតុកម្មមួយរបស់គណបក្សសង្គ្រោះជាតិ។
យ៉ាងតិចមានមនុស្សប្រមាណជាង១០នាក់បានរងរបួសនិងមនុស្សចំនួន ៦នាក់ត្រូវចាប់ខ្លួនក្នុងការបាញ់បង្ក្រាបរបស់កងកម្លាំងមាន សមត្ថកិច្ច។ នៅពេលនោះក៏បានបាញ់សម្លាប់កម្មករសំណង់ម្នាក់ឈ្មោះ ម៉ៅ សុខចាន់អាយុ២៩ឆ្នាំបានត្រូវគ្រាប់ចំក្បាលបណ្តាលឱ្យស្លាប់ភ្លាមៗ នៅកន្លែងកើតហេតុ។
សំណុំរឿងនេះភាគីដើមបណ្តឹងសុទ្ធសឹងជាកងកម្លាំងមានសមត្ថកិច្ចចំនួន ៤៥នាក់នៅពេលប្រាប់តុលាការកាលពីថ្ងៃទី១៧ខែកុម្ភៈកងកម្លាំងមាន សមត្ថកិច្ចទាំងនោះមិនបានឃើញជនជាប់ចោទផ្ទាល់នឹងភ្នែកទេគ្រាន់តែ បានអះអាងថាបានឃើញមានក្រុមអាណាធិបតេយ្យបានគប់ដុំថ្មមកលើកម្លាំង មានសមត្ថកិច្ចតែប៉ុណ្ណោះ៕
