សពពលករខ្មែរ ៧នាក់ ដែលស្លាប់នៅថៃ បញ្ជូនមកដល់ស្រុកកំណើតហើយ
សារព័ត៌មាន Cambodia News/
លោក នេត សេរី អគ្គកុងស៊ុលកម្ពុជាប្រចាំខេត្តស្រះកែវ ប្រទេសថៃបានប្រាប់ថា សពពលករខ្មែរ ៦ នាក់ ក្នុងចំណោម ៧ នាក់ដែលស្លាប់ក្នុងឧបទ្ទវហេតុ បាក់អគារនៃការដ្ឋានមន្ទីរពេទ្យនៅស្រុកបាងភី ខេត្តសាមុតប្រាកាន ប្រទេសថៃ កន្លងមកនោះ ទៅដល់ស្រុកកំណើតអស់ហើយ នៅព្រឹកថ្ងៃទី២៨ កុម្ភៈនេះ។
ប៉ុន្តែ សាកសពមួយ ត្រូវក្រុមគ្រួសារបូជានៅវត្តបាលីលេយ្យ ក្រុងប៉ោយប៉ែត ជាទីដែលផ្ទេរសពពីរថយន្តថៃ មករថយន្តខ្មែរ កាលពីយប់ថ្ងៃទី២៧ កុម្ភៈ។ គ្រួសារបានយកតែឆ្អឹង ទៅស្រុកកំណើតនៅស្រុកមោងឫស្សី ខេត្តបាត់ដំបង។ ឯ សព ៦ នាក់បញ្ជូនទៅស្រុកកំណើតឯខេត្តព្រៃវែង។
គួររំលឹកថា សោកនាដកម្មបាក់ពិដានអគារការដ្ឋានមន្ទីរពេទ្យមួយ នៅស្រុកបាងភី ខេត្តសាមុតប្រាកាន កាលពីម៉ោង១១កន្លះថ្ងៃទី២៤ កុម្ភៈបានសម្លាប់ កម្មករ ២០នាក់ របួស ១៧នាក់។ ក្នុងចំណោមអ្នកស្លាប់មានពលករខ្មែរ ៧នាក់ ក្នុងនោះស្រី៣នាក់។ ឯអ្នករបួស មានពលរដ្ឋខ្មែរ ១៤នាក់ ក្នុងនោះស្រី៤នាក់។ ក្រៅពីនោះជាជនជាតិភូមា និងថៃ៕
