វិធីបន្ធូរអាការៈ គ្រុនក្តៅសម្រាប់កុមារ
សារព័ត៌មាន Cambodia News /
ភ្នំពេញ(២៤ កុម្ភៈ ២០១៤) ៖ កម្តៅខ្លួនឡើងខ្លាំង ជារោគសញ្ញាប្រាប់ថា កុមារកំពុងតែមានការ ជ្រៀតជ្រែករបស់ ពពួកមេរោគ បង្កជំងឺ។ ការយកចិត្តទុកដាក់ថែទាំ ការទទួលទានថ្នាំ ប្រភេទប៉ារ៉ាសេតាមុល ការទទួលទានទឹក និងការសម្រាក អាចធ្វើឲ្យកុមារ មានអាការៈធូរស្រាល។
មាតាបិតាគ្រប់រូប គួរយល់ដឹងថា គ្រុនក្តៅមិនមែនជាជំងឺនោះទេ តែវាជារោគសញ្ញានៃជំងឺ។ កុមារ អាចមានអាការៈគ្រុនក្តៅ បានគ្រប់មូលហេតុ ទាំងអស់។
គ្រុនក្តៅភាគច្រើន កើតមានតែ ២ ទៅ ៣ថ្ងៃប៉ុណ្ណោះ។ ប៉ុន្តែជួនកាល វាកើតមានក្នុង រយៈពេលយូរ និងប្រហែលជារោគ សញ្ញានៃជំងឺរ៉ាំរ៉ៃ ឬ ជំងឺដែលមានរយៈពេលយូរ។
ជាធម្មតា មនុស្សមានសីតុណ្ហភាព រាងកាយជុំវិញ ៣៧អង្សា។ នៅក្នុងករណីកម្តៅរាងកាយ ឡើងរហូតដល់ ៣៩អង្សា វាជាអាការៈគ្រុនក្តៅស្រាល និងជាសញ្ញាប្រាប់ថា រាងកាយកំពុង ប្រឆាំងនឹងជំងឺ។
បើកម្តៅរាងកាយឡើងខ្ពស់ វាអាចធ្វើឲ្យកុមារមានអារម្មណ៍ មិនស្រួលក្នុងខ្លួន ដែលពួកគេអាច អាការៈគ្រុនរងា ឬ គ្រុនញាក់ក្នុងកំឡុងពេលដែល សីតុណ្ហភាព ចាប់ផ្តើមកើន និងជួនកាលមាន ចេញញើសច្រើន។ ជួនកាលទៀត ពួកគេអាចខ្សោះជាតិទឹក ពីដងខ្លួន ប្រសិនបើ មានការបាត់បង់ ជាតិទឹកក្នុងខ្លួនច្រើនដោយមិនបាន បំពេញបន្ថែមវិញ។
កុមារមានអាការៈគ្រុនក្តៅ អាចមានភាពធូរស្រាល ក្នុងកំឡុងពេលបីថ្ងៃតាមរយៈការថែទាំនៅផ្ទះ រួមមានការយកចិត្តទុកដាក់ ការទទួលទានថ្នាំ ប្រភេទប៉ារ៉ាសេតាមុល ការទទួលទានទឹកជាប្រចាំ និងការសម្រាកឲ្យបានច្រើន។ ចំពោះកុមារមានអាយុក្រោម ១២ខែ អាការៈគ្រុនក្តៅអាចជារោគ សញ្ញានៃជំងឺអ្វីមួយ ដូចនេះអ្នកគួរតែទៅ ពិគ្រោះជាមួយនឹងវេជ្ជបណ្ឌិត។ បើសិនជាទារកមានអាយុ ក្រោម ៣ខែ ត្រូវនាំទៅជួបនឹងវេជ្ជបណ្ឌិត ជាបន្ទាន់បើគេមាន អាការៈគ្រុនក្តៅ ព្រោះវាអាចបង្កជា ជំងឺធ្ងន់ធ្ងរបាន៕
