យុវវ័យគួរយកចិត្តទុកដាក់ ក្នុងការបរិភោគអាហារ
សារព័ត៌មាន Cambodia News/
សុខភាព(១១ កុម្ភៈ ២០១៤) ៖ អាហារជាទូទៅ គឺពិតជាមានប្រយោជន៍ទ្រទ្រង់ការលូតលាស់នៃរាងកាយ តែក្នុងនោះក៏មានអាហារមួយចំនួនបានផ្ដល់ទុក្ខទោសដល់រាងកាយផងដែរ ដូច្នេះ មិត្តយុវវ័យគួរតែយកចិត្តទុកដាក់ ក្នុងការបរិភោគអាហារ ដើម្បីសុខភាព។
អ្នកឯកទេស ផ្នែកសុខភាព បានព្រមានថា ប្រសិនបើយើងបរិភោគអាហារខុស វាមិនត្រឹមតែមានឥទ្ធិពលមិនល្អដល់សុខភាពទូទៅប៉ុណ្ណោះទេ វាថែមទាំងប៉ះពាល់ដល់សុខភាពបន្តពូជទៀតផង។
អ្នកឯកទេស បានឲ្យដឹងថា អាហារមានជាតិផ្អែមខ្លាំង ចំពោះយុវវ័យវាបង្កើនថាមពល ប៉ុន្តែចំពោះមនុស្សចាស់ វាមានប្រតិកម្ម ដូចជា ឈឺក្បាល ហើមពោះ បញ្ហាដំណេក អារម្មណ៍មិនមូល និងបញ្ហាផ្សេងទៀត។
សម្រាប់ អាហារប្រភេទវេចខ្ចប់វិញ ភាគច្រើនគឺពោរពេញដោយសារធាតុគីមី ដែលធ្វើឲ្យប៉ះពាល់ដល់អ័រម៉ូន ម្យ៉ាងទៀត ប្រសិនបើយើងបរិភោគតាមឃ្លាន ភាគរយធាតុអាចកើនឡើងខ្ពស់ វាមានផលប៉ះពាល់ខ្លាំងដល់សុខភាពបន្តពូជ ជាពិសេសគឺ លទ្ធភាពបង្កកំណើតទាំងបុរសនិងស្ត្រី។
វិធីដែលល្អ គឺត្រូវបរិភោគឲ្យមានតុល្យភាព និងជៀសវាងការបរិភោគអាហារណាដែលមានជាតិពុលច្រើន។ ម្យ៉ាងទៀតត្រូវរកវិធីសាស្ត្រកាត់បន្ថយអារម្មណ៍នៃភាពតានតឹង ប្រចាំថ្ងៃ ព្រោះអារម្មណ៍តានតឹង និងជាតិពុល អាចធ្វើឲ្យមនុស្សឆាប់ចាស់ អសមត្ថភាពបង្កកំណើត ខូចស្បែក ឈឺរ៉ាំរ៉ៃ និងបញ្ហាផ្សេងៗជាច្រើនទៀត៕
