បាតុករថៃ កំណត់គោលដៅតវ៉ាឡោមព័ទ្ធវិមានរដ្ឋាភិបាលជាថ្មីម្តងទៀត
សារព័ត៌មាន Cambodia News /
ថៃ(១៥ មករា ២០១៤) ៖ កាលពីថ្ងៃអង្គារ ទី១៤ ខែមករា ម្សិលមិញ បាតុករនៅថៃបានកំណត់គោលដៅការតវ៉ាឡោមព័ទ្ធវិមានរដ្ឋាភិបាលជាថ្មី ខណៈបាតុករផ្សេងទៀតកំពុងកាន់កាប់ផ្នែកខ្លះនៃទីក្រុងបាងកកដើម្បី ដាក់សម្ពាធឲ្យ លោកស្រី យីងឡាក់ ចុះចេញពីតំណែងដោយមិនបាច់បោះឆ្នោត។
យោងតាមសារព័ត៌មាន Channel News Asia ចុះផ្សាយកាលពីថ្ងៃអង្គារ ម្សិលមិញបានឲ្យដឹងថា បាតុកររាប់ពាន់នាក់បានឡោមព័ទ្ធវិមានរដ្ឋាភិបាល ហើយពួកគេព្យាយាមរំខានដល់ការបំពេញការងាររបស់មន្ត្រីរដ្ឋាភិបាល ដើម្បីដាក់សម្ពាធឲ្យលុបចោលការបោះឆ្នោតនៅខែកុម្ភៈ ហើយទាមទារឲ្យលោកស្រី យីងឡាក់ ចុះចេញពីតំណែងដោយមិនបាច់បោះឆ្នោត។
កាលពីខែធ្នូ ឆ្នាំ២០១៣ បាតុករបានចូលលុកលុយវិមានរដ្ឋាភិបាលម្តងរូចមកហើយ ហើយពួកគេក៏បានបណ្តេញមន្ត្រីនៅក្រសួងមួយចំនួនចេញពីការិល័យបំពេញ ពេលកំពុងបំពេញការងារទៀតផង ហើយនៅថ្ងៃម្សិលមិញ បាតុកររាប់ពាន់នាក់ក៏បាន ប្រមូលផ្តុំមុខនាយករដ្ឋានពន្ធដារផងដែរ គឺរារាំងមិនឲ្យមន្ត្រីនៃនាយករដ្ឋាននោះអាចបំពេញការងារបាន។
ការតវ៉ានៅទីក្រុងបាងកក ក្នុងរយៈពេលពីរខែកន្លងទៅដែលទាមទារឲ្យលោកស្រី យីងឡាក់ ចុះចេញពីតំណែងនោះ បានបណ្តាលឲ្យមនុស្ស៨នាក់រួមទាំងបាតុករ និងនគរបាលបានស្លាប់ និងរាប់រយនាក់រងរបួស៕
