វិបត្តិស៊ីរី ៖ រុស្ស៊ី-អាមេរិក និយាយគ្នាមិនត្រូវ ងាកទៅទាមទាររក “បទឈប់បាញ់”
១០ ថ្ងៃមុនបើកសន្និសីទអន្តរជាតិ ស្វែងរកសន្តិភាពឱ្យស៊ីរី ឬហៅកាត់ថា ហ្សឺណែវ២មានជំនួបពីរផ្សេងគ្នា ម្សិលមិញ នៅទីក្រុងប៉ារីសប្រទេសបារាំង ។ លោក ចន ឃែរី (John Kerry) បានជួបជាមួយសមភាគីរុស្ស៊ី សែកហ្គៃ ឡាវ្រូវ (Sergueï Lavrov) បន្ទាប់មកជាមួយតំណាងអង្គការសហប្រជាជាតិ ឡាក់ដារ ប្រាហ៊ិមី ដើម្បីបញ្ចុះបញ្ចូលក្រុមសម្ព័ន្ធបក្សប្រឆាំងស៊ីរី ឱ្យចូលតុចរចា។ រហូតមកដល់ពេលនេះ គេអាចនិយាយពាក្យថាបរាជ័យបាន។ រុស្ស៊ីនិងអាមេរិកបានងាកទៅអំពាវនាវឱ្យមានបទឈប់បាញ់គ្នាមួយ តែភាពមិនចុះសម្រុងនឹងគ្នានៅតែមានជុំវិញវត្តមានរបស់អ៊ីរ៉ង់ ក្នុងសន្និសីទហ្សឺណែវដដែល។
ក្នុងពេលធ្វើសន្និសីទកាសែត ត្រីភាគី នៅទីក្រុងប៉ារីស ថ្ងៃចន្ទនេះ រដ្ឋមន្ត្រីក្រសួងការបទេសរុស្ស៊ី លោក សែកហ្គៃ ឡាវ្រូវ (Sergueï Lavrov) និងតំណាងពិសេសរបស់អង្គការសហប្រជាជាតិទទួលបន្ទុកដោះស្រាយវិបត្តិ ស៊ីរី លោក ឡាក់ដារ ប្រាហ៊ិមី (Lakdhar Brahimi)ទាំងពីរនាក់បានទាមទារឱ្យក្រុងតេអេរ៉ង់ មានមុខក្នុងសន្និសីទអន្តរជាតិហ្សឺណែវពីរ ដែលសហរដ្ឋអាមេរិកតែងប្រឆាំងជារហូតមក។
ប៉ុន្តែសម្រាប់ ប្រមុខការទូតសហរដ្ឋអាមេរិកវិញ លោក ចន ឃែរី បែរជាបានលើកឡើងពីវត្តមានអ៊ីរ៉ង់ក្នុងសន្និសីទថ្ងៃទី ២២មករាខាងមុខ ដោយអះអាងស្វាគមន៍ និងអញ្ជើញក្រុងតេអេរ៉ង់ ឱ្យចូលរួមក្នុងជំនួបស្វែងរកសន្តិភាពឱ្យស៊ីរី ប្រសិនបើអ៊ីរ៉ង់ទទួលយកគោលការណ៍អន្តរកាលនយោបាយដូចមានចែងក្នុង សន្និសីទហ្សឺណែវកាលពី ថ្ងៃទី៣០មិថុនា ២០១២។
ពេលនេះវត្តមានអ៊ីរ៉ង់ក្នុងវិបត្តិស៊ីរី កំពុងក្លាយជាបញ្ហាចោទ ព្រោះរុស្ស៊ីអ្នកគាំទ្ររបបក្រុងដាម៉ាសរបស់លោក បាស្ហារអាល់អាសាទ ត្រូវការឃើញអ៊ីរ៉ង់ និងអារ៉ាប៊ីសាអ៊ូឌីតមានមុខក្នុងការចរចាសន្តិភាព អាមេរិកយល់ព្រមតែត្រូវដាក់លក្ខខណ្ឌដល់តេអេរ៉ង់។ ចំណែកលោក ឡាក់ដារ ប្រាហ៊ិមី តំណាងពិសេសអង្គការសហប្រជាជាតិ បានអញ្ជើញប្រទេសអាប៊ីសាអ៊ូឌីតរួចហើយ តែមិនបានបញ្ជូនលិខិតទៅអ៊ីរ៉ង់ទេ ទោះបីយល់ថាអ៊ីរ៉ង់ដើរតួនាទីចាំបាច់ក្នុងការដោះស្រាយវិបត្តិ ក្នុងតំបន់ក៏ដោយ។
អ្វីជាលទ្ធផលនៃជំនួបនៅទីក្រុងប៉ារីសលើកនេះ សហរដ្ឋអាមេរិក និងរុស្ស៊ី បានព្រមព្រៀងគ្នាលើកទឹកចិត្តឱ្យមានបទឈប់បាញ់គ្នា ដ៏មានកំរិត ពោលគឺយ៉ាងហោចណាស់នៅតំបន់អាឡិប ភាគខាងជើងប្រទេសស៊ីរី មុននឹងសន្និសីទសន្តិភាពអាចចាប់ផ្តើម។
ដោយឡែកលោក បានគីមូន អគ្គលេខាធិការអង្គការសហប្រជាជាតិវិញ ក្នុងខណៈដែលមានការខិតខំប្រឹងប្រែងនៅប៉ារីស លោកបានអញ្ជើញទៅក្រុងបាតដាត ដើម្បីជួយពិភាក្សាជាពិសេសជាមួយមេដឹកនាំអ៊ីរ៉ាក់ ស្តីអំពីវិបត្តិស៊ីរី៕ដោយ អៀង សុខម៉ិញ (RFI)