អ៊ិត សេដ្ឋា និងក្រុមការងាររបស់ខ្លួននៃស្ថានីយទូរទស្សន៍ស៊ីធីអិនកាន់តែចោលម្សៀត
Cambodia News/យុវវ័យថ្មី
ភ្នំពេញ (៩ មករា ២០១៣)៖ លោក អ៊ិត សេដ្ឋា និងក្រុមការងាររបស់ខ្លួននៃស្ថានីយទូរទស្សន៍ស៊ីធីអិនត្រូវ បានបូរាណវិទូ អ្នកប្រវត្តិសាស្រ្ត និងមហាជនរិះគន់មិនសំចៃពីកំហុសឆ្គងផ្ទួនៗនៅក្នុងកម្មវិធី “អ្នកនឹងក្លាយជាសេដ្ឋី” របស់ស្ថានីយ ទូរទស្សន៍មួយនេះដែលគ្រប់ដោយលោក ឧកញ៉ា គិត ម៉េង សេដ្ឋីម្នាក់ក្នុងចំណោមសេដ្ឋីជាច្រើននៅកម្ពុជា។
នៅរាត្រីថ្ងៃសៅរ៍ទី ៤ មករា កន្លងមកនេះ នៅក្នុងកម្មវិធី “អ្នកនឹងក្លាយជាសេដ្ឋី” អ៊ិត សេដ្ឋា និងក្រុមការងាររបស់ខ្លួនបានសម្រេចឲ្យចម្លើយដែលថា “ប្រាសាទកោះកេរស្ថិតនៅក្នុងខេត្តសៀមរាប” ជាចម្លើយត្រឹមត្រូវ។ ចម្លើយនេះត្រូវបានអ្នកបូរាណវិទូបដិសេធថាមិនត្រឹមត្រូវទេ គឺថា “ប្រាសាទកោះកេរស្ថិតនៅក្នុងខេត្តព្រះវិហារ”។
កាសែតរស្មីកម្ពុជានៅថ្ងៃព្រហស្បតិ៍នេះក៏បានដកស្រង់សំដីបូរាណវិទូ ដោយបានពន្យល់យ៉ាងច្បាស់ពីទីតាំងប្រាសាទកោះកេរនេះថា ប្រាសាទស្ថិតនៅក្នុងភូមិស្រយង់ខាងជើង ឃុំស្រយង់ ស្រុកគូលែន ខេត្តព្រះវិហារ។
នេះមិនមែនលើកទីមួយទេដែល អ៊ិត សេដ្ឋា និងក្រុមការងាររបស់ខ្លួននៃស្ថានីយទូរទស្សន៍ស៊ីធីអិនត្រូវបាន មហាជនចោទថា ដឹងមិនច្បាស់ពីប្រទេសខ្លួនឯង ហើយនាំពលរដ្ឋឲ្យវង្វេងភូមិសាស្រ្តនិងប្រវត្តិសាស្រ្តរបស់ ខ្លួនទៅវិញ។
កាលពីថ្ងៃទី ១៧ ធ្នូ ២០១៣ កន្លងទៅ អ៊ិត សេដ្ឋា និងក្រុមការងាររបស់ខ្លួនក៏បានប្រកាសដែរថា ល្ខោនបាសាក់មានដើមកំណើតនៅប្រទេសវៀតណាម ដែលចម្លើយនេះធ្វើឲ្យមានការភ្ញាក់ផ្អើលយ៉ាងខ្លាំងពីមហាជន ពិសេសក្រុមបញ្ញវន្តនិងអ្នកស្រាវជ្រាវផ្នែកប្រវត្តិសិល្បៈខ្មែរ។
លោក ឃុត សុខឿន អ្នកបម្រើការនៅមជ្ឈមណ្ឌលព័ត៌មានស្រ្តីកម្ពុជាបានរៀបរាប់នៅ ក្នុងហ្វេសប៊ុកវ៉លរបស់លោកថា អ៊ិត សេដ្ឋា និងអ្នករៀបចំកម្មវិធីទូរទស្សន៍មួយនេះត្រូវតែសិក្សាស្រាវជ្រាវ ពីប្រវត្តិសិល្បៈខ្មែរនិងប្រវត្តិល្ខោនបាសាក់ឡើងវិញ ដោយលោកបញ្ជាក់ថា “តាមពិតល្ខោនបាសាក់មានដើមកំណើតនៅស្រុកបាសាក់ខេត្តឃ្លាំង កម្ពុជាក្រោម។ ទឹកដីកម្ពុជាក្រោមនេះត្រូវបានពួកអាណានិគមនិយមបារាំងកាត់ទៅឲ្យ ប្រទេសយួន ថ្ងៃទី ២១ ខែ ឧសភា ឆ្នាំ ១៩៤៩ ហើយល្ខោនបាសាក់មានកំណើតមុនពេលបារាំងប្រគល់ទឹកដីកម្ពុជា ក្រោម ទៅឲ្យយួនទៅទៀត”។
ហេតុនេះ អ៊ិត សេដ្ឋា និងក្រុមការងាររបស់ខ្លួនត្រូវប្រយ័ត្នប្រយែង កុំឲ្យកុមារាកុមារីនៅថ្នាក់បឋមសិក្សា និងយុវជនដៀលថា ”ក្បាលកញ្ចាស់ហើយ នៅតែចោលម្សៀត។ បើចោលម្សៀតតែខ្លួនឯងនិងក្រុមរបស់ខ្លួនវាមិនអីទេ តែកុំនាំមហាជនឲ្យចោលម្សៀតតាមខ្លួនទៀត”៕