អ្នកកាសែតភូមាចេញធ្វើបាតុកម្មប្រឆាំងនឹងការរឹតត្បឹតសិទ្ធិសេរីភាពសារព័ត៌មាន
អ្នកកាសែត ភូមាបាននាំគ្នាចេញធ្វើ បាតុកម្ម នៅថ្ងៃអង្គារនេះ ដើម្បីបរិហាររិះគន់ការរឹតត្បឹតសិទ្ធិសេរីភាពសារព័ត៌មាន ព្រមទាំងទាមទារឲ្យដោះលែងអ្នកកាសែតម្នាក់ ដែលកំពុងជាប់ក្នុងពន្ធនាគារ។ ការចាប់អ្នកកាសែតដាក់ពន្ធនាគារនេះធ្វើឡើង នៅពេលដែលប្រធានាធិបតីភូមាសន្យាដោះលែងអ្នកទោសនយោបាយឲ្យអស់ ពីពន្ធនាគារ។
អ្នកកាសែត ព្រមទាំងសកម្មជនសិទ្ធិមនុស្សប្រមាណជា ១៥០នាក់ បាននាំគ្នាដើរដង្ហែក្បួន នៅក្នុងទីក្រុងរ៉ង់ហ្គូន ដោយស្រែកទាមទារឲ្យបញ្ឈប់រាល់ការគំរាមកំហែងចំពោះសិទ្ធិសេរីភាពខាង សារព័ត៌មាន ព្រមទាំងលើកបដា ដែលសរសេរនូវពាក្យស្លោកថា “សិទ្ធិទទួលព័ត៌មានគឺជាអាយុជីវិតនៃលទ្ធិប្រជាធិបតេយ្យ”។
បាតុកម្មនេះរៀបចំធ្វើឡើងដោយសមាគមអ្នកកាសែតភូមា ឈ្មោះថា Myanmar Journalist Network ដើម្បីតវ៉ាទៅនឹងសេចក្តីសម្រេចរបស់តុលាការភូមា កាលពីខែមុន ដែលបានកាត់ទោសអ្នកកាសែតម្នាក់ឲ្យជាប់ពន្ធនាគារ រយៈពេល ៣ខែ។ អ្នកកាសែតរូបនេះមានឈ្មោះថា ម៉ា ឃីន (Ma Khine) ត្រូវបានតុលាការកាត់ឲ្យជាប់ទោសពីបទបរិហារកេរ្តិ៍ រំលោភបំពានដោយពាក្យសម្តី ព្រមទាំងបំពានទៅលើទ្រព្យសម្បត្តិឯកជនរបស់មេធាវីម្នាក់។
ក៏ប៉ុន្តែ គេសង្ស័យថា ហេតុផលពិតប្រាកដនៃការកាត់ទោសអ្នកកាសែតម៉ា ឃីន នេះ គឺដោយសារតែកាសែតរបស់គាត់ធ្លាប់បានចុះផ្សាយព័ត៌មាន ដែលបើកកកាយពីអំពើពុករលួយ នៅក្នុងស្ថាប័នតុលាការ នាពេលកន្លងមក។
សមាគមអ្នកកាសែតភូមាបានលើកឡើងថា “ការណ៍ដែលអ្នកកាសែតត្រូវកាត់ទោសពីបទព្រហ្មទណ្ឌ ដោយសារតែសកម្មភាពយកព័ត៌មាន វាគឺជាការគំរាមកំហែងដោយផ្ទាល់ ចំពោះសិទ្ធិសេរីភាពសារព័ត៌មាន”។ កាលពីពេលថ្មីៗនេះ អង្គការអ្នកសារព័ត៌មានឥតព្រំដែនក៏ធ្លាប់បានចេញសេចក្តីថ្លែងការណ៍ មួយក្នុងន័យស្រដៀងគ្នានេះដែរ ព្រមទាំងបានទាមទារឲ្យអាជ្ញាធរភូមាដោះលែងម៉ា ឃីន ពីពន្ធនាគារ។
គួររំឭកថា ភូមាទើបនឹងត្រូវបានអង្គការអ្នកសារព័ត៌មានឥតព្រំដែន ដំឡើងចំណាត់ថ្នាក់សេរីភាពខាងសារព័ត៌មាន ពីលំដាប់ទី ១៧៩ មកនៅ ១៥១ កាលពីឆ្នាំ២០១៣កន្លងទៅនេះ។ ក៏ប៉ុន្តែ អង្គការសិទ្ធិមនុស្សកំពុងមានការព្រួយបារម្ភ អំពីតាក់ទិចថ្មីរបស់អាជ្ញាធរភូមា ដែលយកការចោទប្រកាន់ពីបទល្មើសព្រហ្មទណ្ឌធម្មតាមកធ្វើជាអាវុធ ដើម្បីគំរាមកំហែងទៅលើអ្នកសារព័ត៌មាន៕ដោយ សេង ឌីណា (RFI)