បង់ក្លាដែស៖ ការប៉ះទង្គិចគ្នារវាងប៉ូលិស និងហ្វូងបាតុករបានបណ្តាលឲ្យស្លាប់បាតុករម្នាក់
នៅ ក្នុងប្រទេសបង់ក្លាដែស ទោះបីជាមានការហាមឃាត់ពីអាជ្ញាធរមិនឲ្យធ្វើបាតុកម្មក៏ដោយ ក៏ក្បួនបាតុកម្មរៀបចំដោយក្រុមគណបក្សប្រឆំាងនៅតែកើតមានដូចការ គ្រោងទុកនាថ្ងៃអាទិត្យ ទី២៩ ធ្នូម្សិលមិញ។ តែការប៉ះទង្គិចគ្នាយ៉ាងអំពើហិង្សារវាងកម្លំាងប៉ូលិស និងក្រុមបាតុករបានផ្ទុះឡើងតំាងពីពេលហែរក្បួនដំបូង ដោយបណ្តាលឲ្យមានស្លាប់បាតុករម្នាក់។ សូមរម្លឹកជូនថា ក្រុមគណបក្សប្រឆំាងបានបន្តទាមទារឲ្យរដ្ឋាភិបាលលើកថ្ងៃបោះឆ្នោតដែល គ្រោងរៀបចំនៅថ្ងៃទី ៥ មករាខាងមុខ និងបានទាមទារឲ្យលោកស្រីនាយករដ្ឋមន្រ្តីចុះចេញពីមុខតំណែង។
ក្បួនបាតុកម្ម ថ្មីនេះត្រូវបានក្រុមគណបក្សប្រឆំាងឲ្យឈ្មោះថា « ដំណើរស្វែងរកលទ្ធិប្រជាធិបតេយ្យ »។ នៅទីបំផុត ក្បួនបាតុកម្មដែលរដ្ឋអំណាចហាមឃាត់បានពើបប្រទះនឹងភាពប្រទូស្ត្រាយ គ្នាយ៉ាងហិង្សារវាងកម្លំាងប៉ូលិស និងក្រុមបាតុករដោយបានបណ្តាលឲ្យបាតុករស្លាប់ម្នាក់ និងរបួសជាច្រើននាក់ផ្សេងទៀត។ ក្រុមប៉ូលិស និងកម្លំាងសន្តិសុខផ្សេងទៀតដែលមានគ្នាសរុបប្រមាណជា ១១ ០០០នាក់បានអះអាងថា ការដែលខ្លួនបានប្រើកាណុងបាញ់ទឹក និងគ្រាប់កំាភ្លើងពិតបាញ់បង្រ្កាបលើហ្វូងបាតុករ មកពីពួកបាតុករបានចោលគ្រាប់បែកឆ្នៃទៅលើប៉ូលិស។ អ្វីជាការកត់សម្គាល់ លោកស្រី Khaleda Zia អតីតនាយករដ្ឋមន្រ្តី និងជាប្រធានគណបក្សប្រឆំាង គឺគណបក្សជាតិនិយមបង់ក្លាដែសត្រូវបានកម្លំាងប៉ូលិសរារំាងមិនឲ្យ ចូលរួមនៅក្នុងក្បួនបាតុកម្មនោះទេ។ លោកស្រី Zia ដែលកំពុងជាប់ឃុំឃំាងនៅក្នុងគេហដ្ឋានរបស់លោកស្រីក្នុងទីក្រុង ដាកា។
គួរជម្រាបជូនថា អស់រយៈពេលជាច្រើនឆ្នំាកន្លងមកហើយ ដែលប្រទេសបង់ក្លាដែសបានធ្លាក់ក្នុងវិបត្តិនយោបាយនៃការប្រឈមមុខ ដាក់គ្នាខ្លំាងរវាងស្រ្តីពីររូបដើម្បីអំណាច គឺលោកស្រី Sheikh Hasina ដែលបច្ចុប្បន្នជានាយរដ្ឋមន្រ្តី និងជាប្រធានគណបក្សសម្ព័ន្ធ Awami និងលោកស្រី Khaleda Zia ដែលជាអតីតនាយករដ្ឋមន្រ្តី និងជាប្រធានគណបក្សជាតិនិយមបង់ក្លាដែស។ អ្វីដែលលោកស្រី Zia បាន និងកំពុងបន្តទាមទារមកដល់សព្វថ្ងៃ គឺការលើកថ្ងៃបោះឆ្នោតដែលគ្រោងរៀបចំនៅថ្ងៃទី៥ មករាខាងមុខ និងការចុះចេញពីអំណាចរបស់លោកស្រី Hasina។ ជាមួយគ្នានេះ លោកស្រី Zia ក៏បានស្នើឲ្យបង្កើតរដ្ឋាភិបាលមួយ អព្យាក្រឹត និងបណ្តោះអាសន្ន នៅមុនការរៀបចំបោះឆ្នោត។ តែលោកស្រី Hasina មិនព្រម។ តំាងពីពេលនោះមក លោកស្រី Zia ក៏បានរៀបចំក្បួនបាតុកម្មជាបន្តបន្ទាប់។
គិតត្រឹមមួយឆ្នំា ២០១៣ នេះ អំពើហិង្សានៅក្នុងក្បួនបាតុកម្មនានាបានសម្លាប់ប្រជាជនបង់ក្លាដែស យ៉ាងតិច ២៧៤នាក់។ គឺជាតួលេខសោកនាដកម្មមួយយ៉ាងខ្ពស់ដែលបង់ក្លាដែសមិនធ្លាប់ប្រទះទេ តំាងពីប្រទេសទទួលបានឯករាជ្យក្នុងឆ្នំា ១៩៧១ មក។ មួយវិញទៀត តំាងពីឆ្នំា ១៩៧១ មក បង់ក្លាដែសក៏បានស្គាល់រដ្ឋប្រហារយោធាប្រមាណជា ២០ដងដែរ៕ដោយ គួច គន្ធារ៉ា (RFI)