ភេវកម្មបំផ្ទុះរថយន្តនៅអេហ្ស៊ីប ស្លាប់យ៉ាងហោច១២នាក់
នៅប្រទេសអេហ្ស៊ីប កាលពីយប់ថ្ងៃចន្ទឈានចូលព្រឹកថ្ងៃអង្គារនេះ មានមនុស្ស១២នាក់បានស្លាប់ និង១៣៤នាក់រងរបួស ក្នុងអំពើភេរវកម្មបំផ្ទុះរថយន្តមួយ នៅទីស្នាក់ការកណ្តាលប៉ូលិសក្រុងម៉ាន់ស៊ូរ៉ា នៅភាគខាងជើងប្រទេស។ ប៉ូលិសអេហ្ស៊ីបច្រើននាក់ ក៏ជាជនរងគ្រោះនៃអំពើភេរវកម្មនេះដែរ។ នេះជាអំពើភេរវកម្មសម្លាប់មនុស្សច្រើនបំផុត នៅអេហ្ស៊ីប គិតចាប់ពីពេលអតីតប្រធានាធិបតីមរស៊ី ត្រូវកងទ័ពទំលាក់ចេញពីអំណាច កាលពីខែកក្កដាមក។
នៅអេហ្ស៊ីប អំពើភេរវកម្មបំផ្ទុះរថយន្តសម្លាប់មនុស្ស បានកើតឡើងនៅម៉ោងមួយភ្លឺ ថ្ងៃអង្គារនេះ នៅទីស្នាក់ការកណ្តាលប៉ូលិស ក្រុងម៉ាន់ស៊ូរ៉ា ភាគខាងជើង ស្ថិតត្រង់ចំណុចប្រសព្វនៃដៃទន្លេនីល។
ភ្លាមៗ ក្រោយការផ្ទុះនេះ រដ្ឋាភិបាលយោធាស្តីទីអេហ្ស៊ីបបានចោទក្រុមភាតរអ៊ីស្លាមរបស់ អតីតប្រធានាធិបតីមរស៊ី ថា បានបង្កភេរវកម្មនេះឡើង ហើយថែមទាំងបានចាត់ទុកក្រុមភាតរអ៊ីស្លាមថា ជាក្រុមភេរវជនទៀតផង។ ប៉ុន្តែបន្តិចក្រោយមក រដ្ឋាភិបាលចេញសេចក្តីថ្លែងការណ៍មួយ ដែលខ្លឹមសារចោទប្រកាន់មិនបានចោទត្រង់ៗទៅលើក្រុមភាតរអ៊ីស្លាមនោះទេ។ រដ្ឋាភិបាលស្តីទីអេហ្ស៊ីបបានស្បថថា នឹងបន្តការប្រយុទ្ធប្រឆាំងអំពើភេរវកម្មតទៅទៀត។
ដោយឡែក ក្រុមភាតរអ៊ីស្លាមបានថ្កោលទោសអំពើភេរវកម្មនៅទីស្នាក់ការកណ្តាល ប៉ូលិស ហើយបានសំដែងមរណទុក្ខដល់គ្រួសារជនរងគ្រោះ។ ក្រុមភាតរអ៊ីស្លាមបានលើកឡើងថា អំពើភេរវកម្មនេះគឺជាការវាយប្រហារផ្ទាល់ទៅលើចំណងរួបរួមនៃប្រជាជន អេហ្ស៊ីប។
អំពើភេរវកម្មនៅពេលទាបភ្លឺថ្ងៃអង្គារនេះ ធ្វើអោយមានការបារម្ភថា អំពើហិង្សានឹងបន្តវាយលុកអេហ្ស៊ីប ពិសេសនៅស៊ីណៃ ក្នុងតំបន់ប្រសព្វនៃដៃទន្លេនីល ដែលមិនដែលជួបប្រទះអំពើភេរវកម្មធ្ងន់ធ្ងរបែបនេះនៅឡើយទេ។ ចាប់ពីពេលដែលអតីតប្រធានាធិបតី ម៉ូហាមេដ មរស៊ី ត្រូវកងទ័ពទំលាក់ពីតំណែង ក្នុងខែកក្កដាមក អំពើហិង្សានយោបាយបានកើតឡើងស្ទើរតែជាប្រចាំទៅហើយ ក្នុងប្រទេស។ ប្រជាជនអេហ្ស៊ីបជាង១៥០០នាក់ បានបាត់បង់ជីវិត គិតពីថ្ងៃរដ្ឋប្រហារ៣កក្កដាមក។ ប៉ូលិសនិងទាហានប្រមាណ២០០នាក់ ក៏ត្រូវបានសម្លាប់ផងដែរ ពិសេសក្នុងតំបន់ស៊ីណៃដែលសំបូរទៅដោយក្រុមឧទ្ទាមជីហាដ។
កាលពីសប្តាហ៍មុន តុលាការអេហ្ស៊ីប បានដាក់ពិរុទ្ធអតីតប្រធានាធិបតីមរស៊ី និងអ្នកទទួលខុសត្រូវក្រុមភាតរអ៊ីស្លាមរបស់លោក ពីបទធ្វើអំពើអាក្រក់ជាមួយក្រុមឧទ្ទាមហាម៉ាស ប៉ាឡេស្ទីន និងក្រុមអេស្បូឡាលីបង់ ដើម្បីបង្កភេរវកម្មនៅអេហ្ស៊ីប កាលពីពេលដែលលោកមូបារ៉ាក់ នៅជាប្រធានាធិបតីនៅឡើយ៕ដោយ ព្រំ សឿន សូលីណា (RFI)