ការប្រហារជីវិតពូលោកគឹម ជុងអ៊ុន គឺដោយសារគាត់ចង់បានប្រយោជន៍ផ្នែកធ្យូងថ្មហួសហេតុ
ប្រធានចារកិច្ច កូរ៉េខាងត្បូង បានផ្តល់ព័ត៌មាន នៅថ្ងៃចន្ទនេះថា លោក ចាង សុងថេក ជាឳពុកមារបស់មេដឹកនាំកូរ៉េខាងជើង គឹម ជុងអ៊ុន ត្រូវបានគេប្រហារជីវិតកាលពីថ្ងៃ១២ធ្នូ កន្លងទៅ ដោយសារតែគាត់មានអត្តចរិតក្រអឺតក្រទមចង់បានប្រយោជន៍ហួសហេតុ ពោលគឺគាត់បានព្យាយាមគ្រប់គ្រងផ្នែកនាំចេញធ្យូងថ្មរបស់កូរ៉េខាងជើង និងចង់បានប្រយោជន៍ហួសពីអ្វីដែលគាត់ត្រូវបានទទួល។
លោក ណាំ ចាចុង ប្រធានផ្នែកចារកិច្ចកូរ៉េខាងត្បូង បានផ្តល់ព័ត៌មាន នៅថ្ងៃចន្ទនេះថា កូរ៉េខាងជើងបានប្រហារជីវិតលោក ចាង សុងថេក ជាឳពុកមារបស់មេដឹកនាំកូរ៉េខាងជើង គឹម ជុងអ៊ុន កាលពីពេលថ្មីៗកន្លងទៅ ក៏ដោយសារតែលោក ចាង សុងថេក បានព្យាយាមគ្រប់គ្រងផ្នែកនាំចេញធ្យូងថ្មរបស់កូរ៉េខាងជើង និងចង់បានប្រយោជន៍ហួសពីអ្វីដែលគាត់ត្រូវទទួល។
គួររំលឹកថា លោកចាង សុងថេក ជាឥស្សរជននយោបាយកំពូលទី២ក្នុងរបបកុម្មុយនិស្តកូរ៉េខាងជើង ត្រូវបានរដ្ឋាភិបាលក្រុងព្យុងយ៉ាងដកតំណែង និងចោទប្រកាន់ថាក្បត់ជាតិ និងបានឃុបខិតក្នុងអំពើពុករលួយ។ កូរ៉េខាងជើងបានបើកសវនាការយ៉ាងទាន់ហន់ថ្កោលទោសលោកចាង សុងថេក និងប្រហារជីវិតលោក នៅថ្ងៃ១២ធ្នូ កន្លងទៅ។
យោងតាមផ្នែកចារកិច្ចកូរ៉េខាងត្បូង លោកចាង សុងថេក បានធ្វើសកម្មភាពជ្រុលហួសក្នុងវិស័យនាំចេញធ្យូងថ្មរបស់កូរ៉េខាងជើង ដែលជាវិស័យផ្តល់ចំណូលខ្ពស់ដល់រដ្ឋាភិបាលក្រុងព្យុងយ៉ាង។ ចរិតជ្រុលហួសនេះ បានធ្វើអោយអ្នកដឹកនាំកូរ៉េខាងជើងជាច្រើនរូបនៃគណបក្សកាន់អំណាច មានការខឹងសម្បារ។ អាស្រ័យហេតុនេះ ប្រមុខដឹកនាំកូរ៉េខាងជើង គឹម ជុងអ៊ុន ត្រូវជាក្មួយរបស់លោក ចាង បានចេញបញ្ជាអោយមានការដោះស្រាយបញ្ហាអោយបានត្រឹមត្រូវ។ ប៉ុន្តែ អ្នកជំនិតនឹងលោកចាង សុងថេក ជាច្រើនរូប មិនបានគោរពតាមបញ្ជានោះភ្លាមៗទេ ដូច្នេះហើយទើបរដ្ឋអំណាចក្រុងព្យុងយ៉ាងបានធ្វើសកម្មភាពកំចាត់ ក្រុមប្រឆាំងនេះឡើង រហូតដល់ប្រហារជីវិតលោក ចាង សុងថេក។
គួររំលឹកថា កូរ៉េខាងជើងជាប្រទេសក្រីក្រច្រើនទស្សវត្សរមកហើយ។ សេដ្ឋកិច្ចក្រុងព្យុងយ៉ាងពឹងផ្អែកលើចំណូលបានមកពីការនាំចេញ វត្ថុធាតុដើមទៅប្រទេសចិន។ កូរ៉េខាងជើងសំបូរទៅដោយធនធានរ៉ែគួរអោយកត់សម្គាល់។ ក្នុងឆ្នាំ២០១២ ការនាំចេញវត្ថុធាតុដើម ពិសេសធ្យូងថ្ម និងរ៉ែដែក ទៅអោយចិន បាននាំចំណូលប្រមាណជាងពីរពាន់បួនរយលានដុល្លារ ជួយដល់សេដ្ឋកិច្ចជាតិ៕ដោយ ព្រំ សឿន សូលីណា (RFI)
