ឆ្នាំ២០១៣ នៅតែឆ្នាំខ្មៅងងឹតសម្រាប់អ្នកសារព័ត៌មាន
ស្ថានភាពសេរីភាពរបស់អ្នកសារព័ត៌មាន មិនបានប្រសើរខ្លាំងណាស់ណាទេ បើប្រៀបធៀបនឹងឆ្នាំមុន។ របាយការណ៍របស់គណៈកម្មាធិការការពារអ្នកកាសែត ដែលមានទីតាំងនៅទីក្រុងញូវយ៉ក បានបង្ហាញឲ្យដឹង នៅថ្ងៃពុធនេះ ថា អ្នកកាសែត នៅក្នុងពិភពលោក នៅតែទទួលការគំរាមកំហែង ស្លាប់បាត់បង់ជីវិត និងត្រូវជាប់គុករបស់រដ្ឋាភិបាល។
សង្រ្គាម ស៊ីវិល នៅស៊ីរី និងការកើនឡើងនៃចំនួនអ្នកសារព័ត៌មានជាប់ពន្ធនាគារ នៅប្រទេសតួកគី បានធ្វើឲ្យ គណៈកម្មាធិការការពារអ្នកកាសែតបូកសរុប ជាអវិជ្ជមានទៅលើស្ថានភាពអ្នកសារព័ត៌មាន នៅលើពិភពលោក។
យោងតាម អង្គការ ការពារអ្នកកាសែត នៅឆ្នាំ ២០១៣ មានអ្នកសារព័ត៌មាន៥២នាក់ត្រូវបានគេសម្លាប់។ ចំនួននេះបានថយចុះ បើប្រៀបធៀបនឹងឆ្នាំមុន ដែលមានរហូតដល់៧៣នាក់។ ប្រទេសដែលកំពុងជួបអស្ថិរភាពនយោបាយ និងអសន្តិសុខ ជាប្រទេសដែល អ្នកសារព័ត៌មានទទួលការគំរាមកំហែងជីវិតច្រើនជាងគេ។ ឧទាហរណ៍ ប្រទេសស៊ីរីដែលកំពុងធ្លាក់ក្នុងសង្រ្គាមស៊ីវិល ជាកន្លែងដែលសំបូរគ្រោះថ្នាក់ បាត់បង់ជីវិតសម្រាប់អ្នកសារព័ត៌មាន។ ជារួម មានអ្នកយកព័ត៌មាន បរទេស និងស៊ីរី ២១នាក់ ត្រូវបានគេសម្លាប់ នៅក្នុងពេលបំពេញការងារ យកព័ត៌មាន នៅក្នុងសង្រ្គាម នៅស៊ីរី។ អ្នកសារព័ត៌មានក៏ត្រូវបានគេសម្លាប់ផងដែរ នៅក្នុងប្រទេសអេហ្ស៊ីប ប៉ាគីស្ថាន សូម៉ាលី អ៊ីរ៉ាក់ និងប្រទេសម៉ាលី។
គ្រោះថ្នាក់បាត់បង់ជីវិតអ្នកសារព័ត៌មានជាកង្វល់មួយ ប៉ុន្តែ កង្វល់មួយទៀតរបស់គណៈកម្មការធិការការពារអ្នកកាសែត គឺចំនួនអ្នកកាសែតដែលត្រូវអាជ្ញាធរចាប់ដាក់ពន្ធនាគារ។ ជាក់ស្តែង នៅក្នុងរយៈពេលពីរឆ្នាំជាប់គ្នានេះ ប្រទេសតួកគីបាននាំមុខគេខាងចាប់អ្នកសារព័ត៌មានដាក់ពន្ធនាគារ។ គឺនាំមុខចិន និងអ៊ីរ៉ង់ទៅទៀត។ អ្នកសារព័ត៌មានដែលជាប់ពន្ធនាគារក្នុងប្រទេសទាំងបីនេះ មានចំនួនស្មើពាក់កណ្តាលនៃចំនួនអ្នកកាសែតសរុប២១១នាក់ ដែលត្រូវអាជ្ញាធរចាប់ខ្លួន ដោយសារតែការងាររបស់គេ។
លោកJoel Simon ប្រធានរបស់គណៈកម្មការធិការការពារអ្នកកាសែត បានវាយតម្លៃថា ការចាប់អ្នកកាសែតដាក់គុក នៅក្នុងប្រទេសមួយ គឺបញ្ជាក់ពីចរិកបង្រ្កាប មិនចេះអត់ឱន របស់សង្គមប្រទេសនោះ។ ប្រធានរបស់អង្គការការពារអ្នកកាសែតបានលើកឡើងផងដែរពីក្តីបារម្ភ របស់ខ្លួន ទៅលើការបង្រ្កាបបិទសិទ្ធិសេរីភាព អ្នកកាសែត នៅក្នុងប្រទេសវៀតណាម ជាទីដែលចំនួនអ្នកសារព័ត៌មាន ត្រូវអាជ្ញាធរចាប់ដាក់គុក បានកើនឡើង បើប្រៀបធៀបនឹងឆ្នាំ ២០១២។ នៅឆ្នាំ២០១៣ ដោយសារនយោបាយរឹតបន្តឹងសិទ្ធិសេរីភាព និងការបង្រ្កាបទៅលើអ្នកសរសេររិះគន់ នៅលើអ៊ីនធ័រនែត ចំនួនអ្នកកាសែតត្រូវគេចាប់ដាក់ពន្ធនាគារបានកើនឡើង ពី១៤ ទៅ១៨នាក់ នៅវៀតណាម៕ដោយ ឈាង បុប្ផា (RFI)
