ក្រុមប្រឆាំងនៅថៃមិនទាន់សម្រេចចូលបោះឆ្នោតហើយទាមទារអោយលើកពេល
គណបក្សប្រជាធិបតេយ្យដែលជា គណបក្សប្រឆាំងក្នុងប្រទេសថៃ នៅមិនទាន់សម្រេចចិត្តនៅឡើយថា ត្រូវចុះឈ្មោះចូលរួមបោះឆ្នោត ឬក៏អត់នោះ។ ទន្ទឹមគ្នានេះ លោកស៊ូថេប ថងស៊ូបាន ដែលជាមេដឹកនាំបាតុកម្មបានទាមទារអោយគណកម្មការបោះឆ្នោតពន្យាពេលថ្ងៃ បោះឆ្នោត និងប្រកាសធ្វើបាតុកម្មទ្រង់ទ្រាយធំនៅថ្ងៃអាទិត្យខាងមុខនេះ ដើម្បីទាមទារអោយលោកស្រីយីងឡាក់ ស៊ីណាវ៉ាត់ចុះចេញពីតួនាទីជាប្រមុខរដ្ឋាភិបាលចាំផ្ទះ។
បើទោះជាមានការជជែកពិភាក្សាផ្ទៃក្នុងនៅថ្ងៃម្សិលមិញក៏ដោយ គណបក្សប្រជាធិបតេយ្យ ដែលជាគណបក្សប្រឆាំងក្នុងប្រទេសថៃនោះ នៅមិនទាន់រកឃើញសេចក្តីសម្រេច ថាត្រូវចុះឈ្មោះចូលរួមប្រកួតក្នុងការបោះឆ្នោតថ្ងៃទី២កុម្ភៈ ឬក៏អត់នៅឡើយទេ។ ការចុះឈ្មោះគណបក្សចូលរួមការបោះឆ្នោត នឹងចាប់ផ្តើមនៅថ្ងៃចន្ទដើមសប្តាហ៍ក្រោយនេះហើយ។
គណបក្សប្រឆាំងនៅខ្វែងគំនិតគ្នានៅឡើយរវាងក្រុមដែលចង់ចូលរួម បោះឆ្នោត មុនការតវ៉ាស្នើអោយរដ្ឋាភិបាលធ្វើកំណែទម្រង់ថ្នាក់ជាតិ និង ក្រុមដែលចង់បានកំណែទម្រង់ មុនការបោះឆ្នោត។
ទន្ទឹមគ្នានេះ លោកស៊ូថេប ថងស៊ូបាន មេដឹកនាំបាតុកម្មបានកំពុងព្យាយាមស្នើអោយគណកម្មការរៀបចំការបោះឆ្នោត លើកពេលនៃការបោះឆ្នោតទៅពេលក្រោយផង និងអំពាវនាវប្រមូលកំលាំងធ្វើមហាបាតុកម្មនៅថ្ងៃអាទិត្យខាងមុខនេះ ដើម្បីទាមទារអោយលោកស្រីយីងឡាក់ ស៊ីណាវ៉ាត់ លាលែងពី ដំណែងនាយករដ្ឋមន្ត្រីនៃរដ្ឋាភិបាលចាំផ្ទះសព្វថ្ងៃ។ លោកស្រីយីងឡាក់បានប្រកាសរួចហើយថា លោកស្រីនឹងមិនចុះចេញឡើយ។
លោកស៊ូថេប ថងស៊ុបាន ដែលកំពុងដឹកនាំគណកម្មការកំណែទម្រង់ប្រជាធិបតេយ្យរបស់ប្រជាជន បានអំពាវនាវរកតែបាតុករស្ត្រី ដើម្បី ដង្ហែក្បួនទៅនិវេសនដ្ឋានលោកស្រីយីងឡាក់ នៅថ្ងៃអាទិត្យនោះ ដើម្បីស្នើអោយលោកស្រីយីងឡាក់លាលែងពីដំណែងតាមសម្រួល។
គួរបញ្ជាក់ថា លោកស៊ូថេប ថងស៊ូបាន ដែលជាអតីតឧបនាយករដ្ឋមន្ត្រីទទួលបន្ទុកសន្តិសុខក្នុងអណត្តិ រដ្ឋាភិបាលរបស់លោកអាប់ភីស៊ីត វេចាជីវ៉ា កំពុងតែរងការស៊ើបអង្កេតថា តើលោកស៊ូថេបដែលកំពុងមានតួនាទីជាអគ្គលេខាធិការនៃចលនាកំណែទម្រង់ ប្រជាធិបតេយ្យរបស់ប្រជាជន និងកំពុងដឹកនាំបាតុកម្មផងនោះ នៅតែជាសមាជិករបស់គណបក្សប្រឆាំងដដែលឬយ៉ាងណា? ប្រសិនបើយ៉ាងដូច្នេះមែន គណបក្សភឿថៃដែលជាដើមបណ្តឹងនៃការស៊ើបអង្កេតលើអត្តសញ្ញាណរបស់លោកស៊ូ ថេបនោះ ទាមទារអោយរំលាយគណបក្សប្រជាធិបតេយ្យ៕ដោយ លាង ដឺលុច (RFI)