នាយករដ្ឋមន្រ្តីអូស្ត្រាលីនិយាយការពារចំពោះការកាត់ថវិកាជំនួយអន្តរជាតិ
លោក Tony Abbott នាយករដ្ឋមន្រ្តីអូស្ត្រាលីបានប្រកាសថា មិនមែនការផ្ដល់ជំនួយទេដែលជួយដល់ប្រទេសក្រីក្រ គឺមានតែពាណិជ្ជកម្មទេដែលជាមធ្យោបាយដ៏ល្អបំផុតក្នុងការជួយ បណ្ដាប្រទេសក្រីក្រក្នុងការបង្កើនវិបុលភាពរបស់ខ្លួនដោយនិរន្តភាព ។
ក្នុងសេចក្តី ថ្លែងការណ៍របស់លោកនៅឯទីក្រុងម៉ែលប៊ិន ប្រទេសអូស្ត្រាលីកាលពីយប់ម្សិលមិញនេះ លោក Tony Abbott បាននិយាយការពារចំពោះការកាត់ថវិកាជំនួយរបស់អូស្រ្ដាលីលើកិច្ចការ គម្រោងផ្តល់ជំនួយអន្តរជាតិ។
លោក Abbott មានប្រសាសន៍ថា ការកាត់បន្ថយអត្រាកំណើនថវិកាផ្តល់ជំនួយអន្តរជាតិសម្រាប់រយៈពេល ២ ឬ ៣ ឆ្នាំខាងមុខនេះ អាចជួយឲ្យរដ្ឋាភិបាលអូស្រ្តាលីធានាឲ្យបានថា ជំនួយដែលបានផ្តល់ឲ្យប្រទេសក្រីក្រទាំងនោះនឹងចំដល់គោលដៅ ហើយមានប្រសិទ្ធភាពខ្ពស់។
លោក Abbott បានមានប្រសាសន៍សង្កត់ធ្ងន់ថា ការធ្វើពាណិជ្ជកម្មមានអត្ថប្រយោជន៍ណាស់សម្រាប់បង្កើនវិបុលភាព ក្នុងប្រទេសក្រីក្រទាំងនោះដោយនិរន្តភាព ឧទាហរណ៍ជាក់ស្តែងមានដូចជាប្រទេសសិង្ហបុរី, ទីក្រុងហុងកុង, កោះតៃវ៉ាន់, ប្រទេសកូរ៉េខាងត្បូង, ថៃ, ម៉ាឡេស៊ី និងថ្មីៗនេះមានប្រទេសចិន និងឥណ្ឌាជាដើម៕ (Radio Australia)
