ខឹងប្តីមិនចូលផ្ទះ ទៅជះសាំងដុតក្មួយប្រុសអាយុជាង១ខួបរបួសធ្ងន់
ព្រះសីហនុ ៖ កាលពីវេលាម៉ោងជិត៧យប់ ថ្ងៃទី០៤ ធ្នូ នៅសង្កាត់លេខ៣ ក្រុងព្រះសីហនុក្មេងប្រុសដែលមានអាយុទើបបាន១ខួប៣ខែ និងបុរសវ័យកណ្តាលម្នាក់ទៀតត្រូវរងរបួសរលាកពេញខ្លួន ដោយសារតែស្ត្រីម្នាក់ត្រូវជាប្អូនថ្លៃបានជះសាំងដុតក្មេងប្រុសនោះ ព្រោះតែខឹងរកប្តីខ្លួនឯងមិនឃើញ។
តាមសមត្ថកិច្ចឲ្យដឹងថា ស្ត្រីដែលបង្ករនោះមានឈ្មោះ ថៃ ស្រីរ៉ា ហៅស្តើង អាយុជាង២២ឆ្នាំ បានរត់គេចខ្លួនបន្ទាប់ធ្វើសកម្មភាពរួច ត្រូវជាមីងរបស់ក្មេងប្រុសរងគ្រោះ។ 
ចំណែកកុមាររងគ្រោះមានឈ្មោះ សុខ ចំរ៉ុង ភេទប្រុស អាយុ ១ឆ្នាំ៣ខែ និងបុរសវ័យកណ្តាលម្នាក់ទៀតត្រូវជាបងប្រុសម្តាយកុមាររងគ្រោះឈ្មោះ ចន ភេទប្រុស អាយុជាង៣៣ឆ្នាំ ត្រូវរងរបួសដោយរលាកយ៉ាងធ្ងន់ធ្ងរ។
សាក្សីដែលឃើញហេតុការណ៍បានឲ្យដឹងថា ប្តីរបស់ស្ត្រីបង្ករខាងលើបានទៅធ្វើការនៅប៉ោយប៉ែត លុះពេលត្រលប់មកវិញអត់បានចូលផ្ទះប្រហែល៤ឬ៥ថ្ងៃមកហើយ ទោះបីស្ត្រីបង្ករទូរស័ព្ទហៅយ៉ាងណាក៏ដោយ ក៏ពុំព្រមទៅដែរ តែបែរជាមកគេងនៅផ្ទះបងស្រីនេះទៅវិញ។
ដោយសារតែប្តីមិនចូលផ្ទះ និងតាមរកមិនឃើញ ស្ត្រីបង្ករបានគិតថា បងថ្លៃនោះលាក់ប្តីរបស់ខ្លួន ក៏ខឹងសម្បារ រួចក៏ទាញដបសាំងជះដុតលើកុមាររងគ្រោះដែលកំពុងដេកលើគ្រែ បណ្តាលឲ្យឆាបឆេះពេញខ្លួន ហើយពេលនោះបុរសដែលត្រូវជាអ៊ុំកុមាររងគ្រោះឃើញក្មួយត្រូវភ្លើងឆេះ ក៏ស្ទុះទៅឱបយកចេញពីអណ្តាតភ្លើង ក៏ត្រូវរលាកពេញខ្លួនប្រាណដែរ ហើយត្រូវបានអ្នកជិតខាងមកជួយបន្លត់។
ក្រោយកើតហេតុ ជនរងគ្រោះត្រូវបានបញ្ជូនទៅសង្គ្រោះភ្លាមៗនៅមន្ទីរពេទ្យ តែដោយសារកុមារាត្រូវរបួសធ្ងន់ធ្ងរពេក គ្រូពេទ្យក៏បានបញ្ជូនយកទៅសង្គ្រោះនៅមន្ទីរពេទ្យកុមារជាតិនៅ រាជធានីភ្នំពេញ ចំណែកបុរសជាអ៊ំដែលរងគ្រោះដែរនោះ កំពុងសម្រាកព្យាបាលនៅមន្ទីរពេទ្យបង្អែកខេត្តព្រះសីហនុ៕ ភ្នំពេញបច្ចុប្បន្ន