យូរី ប្រតិកម្មព័ត៌មានថា នាងកាច់ឫកកាច់រាងជាស្រីស្អាត
ភ្នំពេញ ៖ តារាចម្រៀងមុខដូចកូនកាត់កូរ៉េនៅក្នុងផលិតកម្មសាន់ដេ នាងយូរី បានសម្តែងការមិនសប្បាយចិត្ត និងមានប្រតិ កម្មយ៉ាងខ្លាំង បន្ទាប់ពីសារព័ត៌មាននៅក្នុងស្រុកមួយផ្សាយរិះគន់មកលើរូបនាង ថា ជាតារាមួយរូបដែលតែងតែបង្ហាញចរិតកាច់ឫកកាច់រាង តាំងខ្លួនឯងជាស្រីស្អាតគ្រប់ពេលវេលា ។
អតីតតារាចម្រៀង ចេញមកពីផលិតកម្មរ៉ុករូបនេះ ចាត់ទុកការចុះផ្សាយនូវព័ត៌មាននោះថា ជាការស្អប់ខ្ពើមដល់រូបនាង និងបានធ្វើឱ្យប៉ះពាល់ដល់កិត្តិយសរបស់នាង ក្នុងពេលដែលនាងកំពុងតែប្រឹងប្រែងទាញយកប្រជាប្រិយភាពពីអាជីព ចម្រៀងនាងផងដែរ ។
សារព័ត៌មានអេឡិចត្រូនិកនៅក្នុងស្រុក មួយបានចុះផ្សាយរិះគន់តារាចម្រៀងស្រីយូរី ថា នាងជាតារាម្នាក់ដែលមិនត្រឹមតែធ្វើចរិតកាច់ឫកកាច់រាងតាំង ខ្លួនជាស្រីស្អាតនៅលើឆាកប៉ុណ្ណោះទេ ប៉ុន្តែសូម្បីតែសកម្មភាពនៅខាងក្រៅឆាក ក៏តែងតែធ្វើដូច្នេះដែរ ធ្វើឱ្យគេឯងជ្រេញនឹងសកម្មភាពនាងផងដែរ ។
សារព័ត៌មាន នៅក្នុងស្រុកមួយនេះបានសរសេរដោយយោងតាមប្រភពពីហាងតុបតែង ខ្លួនមួយដែលយូរីតែងតែឧស្សាហ៍ទៅជាញឹកញាប់ដោយបានបង្ហើប ឱ្យដឹងថា យូរី មិនត្រឹមតែសម្តែងស្ទីល «ចរិតស្រីស្អាត» ក្នុងបទចម្រៀង ឬនៅលើវេទិកាតន្រ្តីទេ សូម្បីតែពេលធម្មតាក៏នាងធ្វើចរិតបែបហ្នឹងដែរ។ សារព័ត៌មាននោះបានបន្តដោយយោងលើប្រភពដដែលបញ្ជាក់ថា វាមិនគួរឱ្យស្រឡាញ់ទេ មើលទៅគួរឱ្យជ្រេញខ្លាំងណាស់ ព្រោះវាចូលលក្ខណៈម្ញុិកម៉្ញក់បែបពួកខ្ទើយ ដែលមិនសមភ្នែកសោះ ។ តាំងពីនាងដើរចូលហាង នាងក៏អង្គុយផ្អៀងផ្អងមុខកញ្ចក់ ធ្វើមុខធ្វើមាត់ដាក់កញ្ចក់ ដែលមើលទៅគួរឱ្យជ្រេញ ។
សារព័ត៌មាននោះក៏បានសរសេរពី ការរិះគន់ចេញពីមហាជនមួយចំនួនទៅលើតារាចម្រៀងយូរី ផងដែរពាក់ព័ន្ធនឹងការកែច្រមុះរបស់នាង ថាច្រមុះស្អាត បែរជាកែមើលទៅចង់ធំជាងមុខទៀត ។
យូរី បានបញ្ចេញប្រតិកម្មយ៉ាងខ្លាំងចំពោះការចុះផ្សាយនោះ ដោយនាងចាត់ទុកថា ហាក់មិនសមរម្យ និងមិនមានប្រភពច្បាស់លាស់ ដែលធ្វើឱ្យប៉ះពាល់ដល់កិត្តិយសនាង ។
យូរី បានសរសេរសារមួយខ្លីបង្ហោះនៅក្នុងគណនេយ្យហ្វេសប៊ុករបស់នាង កាលពីពេល ថ្មីៗនេះថា «គិតយ៉ាងម៉េច បានធ្វើបែបនេះដាក់ យូរី ? យូរី ធ្វើខុសអីចំពោះអ្នកទាំងអស់គ្នា ទើបចង់ធ្វើបាបយូរីមិនចប់… ស្អប់យូរីត្រង់ណា ប្រាប់យូរីមក កុំបង្ហោះព័ត៌មានដែលមិនដឹងមុខម្ចាស់បែបនេះដាក់យូរីណាច៎ា… យូរី ក៏ចេះឈឺចាប់ដែរ» ។
ក្រោយពេលបង្ហោះសារនេះរួចមក មានមិត្តភក្តិរបស់យូរីជាច្រើន នាំគ្នាសរសេរឆ្លើយតបក្នុងន័យលើកទឹកចិត្តដល់តារារូបនេះមិន ឱ្យគិតច្រើនពីការចុះផ្សាយព័ត៌មានមួយនេះ ហើយយូរី ក៏បញ្ជាក់ទៅកាន់មិត្តភក្តិ និងអ្នកគាំទ្ររបស់នាងថា នាងមិនខ្វល់ពីបញ្ហានេះឡើយ ប៉ុន្តែនាងគ្រាន់តែសោកស្តាយប៉ុណ្ណោះ ។
បន្ទាប់ពីបាន ប្រឡូកក្នុងពិភពសិល្បៈប្រហែលជាពីរឆ្នាំមកនេះ យូរី ធ្លាប់ទទួលរងព្យុះភ្លៀងព័ត៌មានស្នេហាជាបន្តបន្ទាប់ ហើយមួយរយៈចុងក្រោយនេះមានការលេចឮថា តារាចម្រៀងរូបនេះកំពុងមានសម្ព័ន្ធភាពស្នេហាខាងក្រោយឆាកជាមួយ តារាចម្រៀងប្រុសប្រចាំផលិតកម្មសាន់ដេ ដូចគ្នា គឺលោកអាន គុណកូឡា ប៉ុន្តែជានិច្ចកាលពួកគេទាំងពីរនាក់តែងតែចេញមុខបដិសេធ ដោយអះអាងថា ពួកគេត្រឹមតែជាមិត្តជិតស្និទ្ធរួមទ្រនំសិល្បៈប៉ុណ្ណោះ ៕ ស.រ/Cambodia News
