ក្រសួងមហាផ្ទៃប្រកាសធ្វើកំណែទម្រង់បោះឆ្នោត
ភ្នំពេញ៖ យោងតាមសេចក្តី ប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត (គ.ជ.ប.) ចុះ ថ្ងៃទី២៥ ខែវិច្ឆិកា បានឲ្យដឹងថា រាជរដ្ឋាភិបាលកម្ពុជា ត្រៀមធ្វើសិក្ខាសាលាថ្នាក់ជាតិ ដើម្បីជំរុញការកែទម្រង់ការបោះឆ្នោតនៅខែធ្នូ ឆ្នាំ២០១៣ ឬខែមករា ឆ្នាំ២០១៤ខាងមុខ។
ថ្លែងសុន្ទរកថាបិទបញ្ចប់សន្និបាតបូកសរុបការងារបោះឆ្នោត ជ្រើសតាំងតំណាងរាស្ត្រនីតិកាលទី៥ នាខេត្តព្រះសីហនុ កាលពីថ្ងៃទី២២ ខែវិច្ឆិកា លោក ស ខេង រដ្ឋមន្ត្រីក្រសួងមហាផ្ទៃ បានអំពាវនាវឲ្យគណបក្សនយោបាយ អង្គការសង្គមស៊ីវិលជាតិ និងអន្តរជាតិ ព្រមទាំងផ្នែកពាក់ព័ន្ធនានា ឲ្យចូលរួមពិភាក្សាស្ថាបនា ក្នុងសិក្ខាសាលាថ្នាក់ជាតិ ដើម្បីធ្វើកំណែទម្រង់ការបោះឆ្នោត នៅកម្ពុជាឲ្យបានច្រើន។
មន្ត្រី គណបក្សប្រឆាំង និងសង្គមស៊ីវិល បានថ្លែងថា បើសិនជារដ្ឋាភិបាល មានបំណងកែទម្រង់ការបោះឆ្នោតពិតប្រាកដ រដ្ឋាភិបាលត្រូវទទួលយកអនុសាសន៍ របស់ លោក សុរិយា សូប៊ែឌី អ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា ទៅដាក់បញ្ជូលក្នុងកំណែទម្រង់របស់ខ្លួនឲ្យបានច្រើន ហើយត្រូវអនុវត្តឲ្យមានប្រសិទ្ធិភាព៕ Cambodia News
