ពលរដ្ឋខេត្តកំពង់ស្ពឺសុំឲ្យលោក ហ៊ុន សែន ជួយផ្ដល់កម្មសិទ្ធិដី
បន្ទាប់ពីលោក ហ៊ុន សែន ថ្លែងកាលពីថ្ងៃអង្គារ ទី២៦ មិថុនា ២០១២ ថា រដ្ឋាភិបាលនឹងមានយុវជនចំនួន ១.១០០នាក់ ស្ម័គ្រចិត្តជួយធ្វើការចុះបញ្ជីដីធ្លី ពលរដ្ឋខេត្តកំពង់ស្ពឺ ជាច្រើននាក់បានឡើងទៅជួបនាយករដ្ឋមន្ត្រី ហ៊ុន សែន នៅថ្ងៃទី២៨ មិថុនា ២០១២ ក្នុងបំណងសុំឲ្យ ជួយឲ្យក្រុមយុវជនស្ម័គ្រចិត្តចុះវាស់វែងដីធ្លី ផ្តល់កម្មសិទ្ធិជូនពួកគាត់។
អ្នកស្រី វីរ៉ាតំណាងប្រជាពលរដ្ឋរស់នៅភូមិ៣ ឃុំត្រែងត្រយឹង ស្រុកភ្នំស្រួចបាននិយាយថា មន្ត្រីសុរិយោដីស្រុក និងខេត្ត មិនព្រមធ្វើប្លង់កម្មសិទ្ធិដី និងផ្ទះឲ្យពួកគាត់ទេ គេថាដីពួកគាត់ ពាក់ព័ន្ធជាមួយប័ណ្ណកម្មសិទ្ធិរបស់ចិន មិនមែនពាក់ព័ន្ធជាមួយដីសម្បទានសេដ្ឋកិច្ច។ ទោះបីអ្នកភូមិមានលិខិតបញ្ជាក់ពីអាជ្ញាធរភូមិឃុំថា ពួកគាត់រស់នៅស្របច្បាប់យ៉ាងណាក៏ដោយ ក៏នៅតែមិនអាចធ្វើប្លង់កម្មសិទ្ធិបានដែរ។
អ្នកស្រី កែវ សុផាត ជាមេឃុំត្រែងត្រយឹងទើបជាប់ឆ្នោតថ្មី តែមិនទាន់ឡើងកាន់តំណែង បាននិយាយ អំឡុងឆ្នាំ១៩៩៤ តាមច្បាប់កាលនោះ រដ្ឋាភិបាលមិនទាន់ផ្តល់កម្មសិទ្ធិឯកជនទៅដល់ជនបរទេសទេ។ អ្នកស្រីបានគាំទ្រការទាមទារចង់បានកម្មសិទ្ធិស្របច្បាប់ របស់ប្រជាពលរដ្ឋជាម្ចាស់ឆ្នោត និងធ្វើណាដោះស្រាយជួនប្រជាពលរដ្ឋឲ្យបាន។
សម្រាប់ អ្នកភូមិដែលមិនទាន់ទទួលបានកម្មសិទ្ធិនោះ មានចំនួនជាង ៣០០គ្រួសារ រស់នៅក្នុងភូមិ៣ ចម្ការចេក ភូមិ៦ និងភូមិសម្បទានសែនជ័យ ទំហំដីសរុបពាក់ព័ន្ធកម្មសិទ្ធិឯកជនរបស់ជនបរទេសប្រមាណជាង ៥០០ហិកតារ៕
