គណកប្សប្រឆាំងសុំធ្វើពិធីរំលឹកវិញ្ញាណក្ខន្ធអ្នកស្លាប់នៅស្ពានពេជ្រ
ភ្នំពេញ៖ នៅព្រឹកថ្ងៃទី២០ ខែវិច្ឆិកា នេះគណបក្សសង្គ្រោះជាតិ បានដាក់លិខិតជូនដំណឹងទៅសាលារាជធានីភ្នំពេញ ស្តីពីការរៀបចំ ប្រារព្ធពិធីបង្សុកូលឧទ្ទិសកុសលដល់អ្នកដែលបានស្លាប់នៅក្នុង ព្រឹត្តិការណ៍ជាន់គ្នានៅលើស្ពានពេជ្រដែលគ្រោងនឹងធ្វើនៅរសៀលថ្ងៃទី ២១ខែវិច្ឆិកាឆ្នាំ២០១៣ ប៉ុន្តែនៅមិនទាន់បានការអនុញ្ញាតពីសាលារាជធានីភ្នំពេញនៅឡើយទេ។ 
អនុប្រធាន គណៈកម្មាធិការវិន័យគណបក្សសង្គ្រោះជាតិ លោកហូរ វ៉ាន់ បានឲ្យដឹងថា នៅម៉ោង៣រសៀល ថ្ងៃទី២១ ខែវិច្ឆិកា ក្រុមយុវជនគណបក្សសង្គ្រោះជាតិ ប្រមាណជាង១០០នាក់ រួមទាំងមន្ត្រីជាន់ខ្ពស់គណបក្ស នឹងធ្វើការជួបជុំគ្នានៅស្តូបស្ពានពេជ្រ ដើម្បីរំលឹកវិញ្ញាណក្ខន្ធអ្នកដែលបានស្លាប់នៅក្នុងព្រឹត្តិការណ៍ ជាន់គ្នានៅលើស្ពានពេជ្រ។
ចំណែក លោកឡុង ឌីម៉ង់ អ្នកនាំពាក្យសាលារាជធានីភ្នំពេញ ក៏បានឲ្យដឹងផងដែរថា នៅរសៀលម៉ោង៣ ថ្ងៃទី២០ ខែវិច្ឆិកា នេះ ខាងសាលារាជធានីភ្នំពេញនឹងជួបជាមួយខាងតំណាងគណបក្សសង្គ្រោះជាតិ ទាក់ទងការប្រារព្ធពិធីគោរពវិញ្ញាណក្ខន្ធអ្នកស្លាប់នៅលើស្ពានព ពេជ្រ។
សូមជម្រាបថា នៅថ្ងៃទី២២ ខែវិច្ឆិកា ខាងមុខនេះ សាលារាជធានីភ្នំពេញ នឹងរៀបចំពិធីបង្សុកូលឧទ្ទិសកុសលដល់ដួងវិញ្ញាណក្ខន្ធ ជនរងគ្រោះ នៅក្នុងឧបទ្ទេវហេតុរត់ជាន់គ្នាលើស្ពានកោះពេជ្រ នៃមជ្ឈមណ្ឌលសន្និបាត និងពិព័រណ៍កោះពេជ្រ កាលពីថ្ងៃ ទី២២ ខែវិច្ឆិកា ឆ្នាំ ២០១០។
នេះគឺជាខួបបីឆ្នាំនៃព្រឹត្តការណ៍រត់ជាន់គ្នា ស្លាប់នៅលើ ស្ពានកោះពេជ្រ។ ឧបទ្ទវហេតុនេះ បានបណ្តាលអោយមនុស្ស ប្រមាណ៣៤០នាក់ ស្លាប់ និងជាង៧០០នាក់ទៀតបានរងរបួស។ Cambodia News