ចិនដាក់ទោសមនុស្សជិត១៧០០០នាក់ ពីបទរំលោភវិធានច្បាប់ក្នុងមុខងារសាធារណៈចិន
ចិនបានសំរេចដាក់ទោសមនុស្សជិត១៧ ០០០នាក់ ពីបទរំលោភវិធានច្បាប់ថ្មីៗរបស់គណបក្សកុម្មុយនិស្តចិន ក្នុងមុខងារសាធារណៈ។ នេះបើយោងតាមការផ្សាយរបស់សារព័ត៌មានរដ្ឋចិន នៅថ្ងៃចន្ទនេះ។ ចាប់តាំងពីលោក ស៊ី ជិនពីង ឡើងកាន់អំណាចជាប្រធានាធិបតីមក គណបក្សកុម្មុយនិស្តចិនបានធ្វើ យុទ្ធនាការកំចាត់អំពើពុករលួយខ្លាំងក្លា និងចេញវិធានច្បាប់ថ្មីៗជាច្រើន ដើម្បីសន្សំសំចៃថវិកាជាតិ ដាក់ កំហិតអោយសមាជិកខ្លួនធ្វើសកម្មភាពត្រឹមត្រូវ សមល្មម ក្នុងមុខងារសាធារណៈ។
យោងតាមការចុះផ្សាយរបស់សារព័ត៌មានរដ្ឋចិន នៅថ្ងៃចន្ទនេះ មានមនុស្ស១ម៉ឺន៦ពាន់ ៦រយ៩៩នាក់ បានជាប់ទោសពីបទរំលោភវិធានច្បាប់ថ្មីៗរបស់គណបក្សកុម្មុយនិស្ត ចិន ក្នុងមុខងារសាធារណៈ។ យោងតាមគណៈកម្មការមជ្ឈិមបក្សកុម្មុយនិស្តចិន មនុស្សជិតមួយម៉ឺន៧ពាន់នាក់នេះ បានធ្វើសកម្មភាពជ្រុលហួស ដូចជា បានចំណាយប្រាក់កាសហួសហេតុ ក្នុងការចាយវាយទទួលពិធីផ្សេងៗ រឺក៏បានប្រើប្រាស់យានជំនិះរដ្ឋហួសកំណត់ រឺក៏បានចាយវាយថវិកាជាតិធ្វើដំណើរទៅបរទេសច្រើនឥតប្រយោជន៍។
ចាប់ពីដើមខែធ្នូ ឆ្នាំ២០១២មក ការិយាល័យនយោបាយគណបក្សកុម្មុយនិស្តចិន ដឹកនាំដោយប្រធានាធិបតី ស៊ី ជិនពីង បានធ្វើយុទ្ធនាការកំចាត់អំពើពុករលួយខ្លាំងក្លា និងចេញច្បាប់ទំលាប់ថ្មីៗជាច្រើន ដើម្បីចៀសវាងការចាយខ្ជះខ្ជាយ ថវិកាជាតិ ដាក់កំហិតអោយសមាជិកខ្លួននានាធ្វើសកម្មភាពត្រឹមត្រូវ សមល្មម ក្នុងមុខងារសាធារណៈ។
គណបក្សកុម្មុយនិស្តចិនតែងតែលើកឡើងពីការសន្យានិងការប្តេជ្ញាចិត្ត នានាជានិច្ច។ ការសន្យាទាំងនោះប្រកាសឡើង ខណៈប្រជាជនចិនរិះគន់មេដឹកនាំនានាដែលតែងតែទទួលបានអាទិភាព ហួសកម្រិត សំរាប់សកម្មភាពខ្លួន៕ដោយ ព្រំ សឿន សូលីណា (RFI)
