អង្គការសហប្រជាជាតិអំពាវនាវឲ្យកាតាកែលម្អលក្ខខណ្ឌការងាររបស់ពលករបរទេស
អ្នករាយការណ៍ពិសេសរបស់អង្គការ សហប្រជាជាតិទទួលបន្ទុកសិទ្ធិរបស់ជនអន្តោប្រវេសន៍បានអំពាវនាវដល់ រដ្ឋាភិបាលប្រទេសកាតាឲ្យយកចិត្តទុកដាក់ កែលម្អលក្ខខណ្ឌការងាររបស់ពលករបរទេស។ ពលករបរទេសដែលកំពុងធ្វើការយ៉ាងប្រញឹកដៃ នៅក្នុងការដ្ឋានសំណង់ដែលកាតាបង្កើតឡើង ដើម្បីត្រៀមទទួលការប្រកួតកីឡាបាល់ទាត់ពិភពលោក នៅឆ្នាំ ២០២២។
នៅក្នុងពិភពលោក កាតាជាប្រទេសដែលមានពលករបរទេសរស់នៅ ច្រើនជាងគេ។ ពលករបរទេសតំណាងឲ្យ៨៨ភាគរយនៃប្រជាជនសរុបនៅកាតា គឺច្រើនជាងចំនួនប្រជាជនម្ចាស់ស្រុកទៅទៀត។ ពលករបរទេសមានចំនួនកាន់តែច្រើន បន្ទាប់ពីប្រទេសកាតាកំពុងប្រញឹកដៃសាងសង់ហេដ្ឋារចនាសម្ព័ន្ធថ្មី ដើម្បីទទួលការប្រកួតកីឡាបាល់ទាត់ពិភពលោក នាឆ្នាំ ២០២២ខាងមុខ។
ប៉ុន្តែយោងតាមអ្នករាយការណ៍ពិសេសរបស់អង្គការសហប្រជាជាតិ ដែលទើបបិទបញ្ចប់ការងារស៊ើប អង្កេត លើលក្ខខណ្ឌការងាររបស់ពលករបរទេស នៅប្រទេសកាតា ពលករបរទេសកំពុងទទួលរងការរំលោភសិទ្ធិមនុស្សនៅកន្លែងធ្វើការ។ ឧទាហរណ៍ ដូចជា ពួកគេមិនបានទទួលប្រាក់ខែតាមកាលកំណត់ ឬក៏បានតិច ជាងចំនួនដែលមានកំណត់ ក្នុងកិច្ចសន្យាការងារ។
អ្នករាយការណ៍ពិសេសរបស់អង្គការសហប្រជាជាតិមានក្តីកង្វល់ផងដែរពី គ្រោះថ្នាក់ និងលក្ខខណ្ឌការងារដ៏អាក្រក់ដែលជំរុញឲ្យមានគ្រោះថ្នាក់បាត់បង់ ជីវិតរបស់ពលករ ក្នុងកន្លែងធ្វើការងារ។ រហូតមក អង្គការការពារសិទ្ធិមនុស្ស និងសហជីពតែងតែបរិហារពីលក្ខខណ្ឌការងារមិនល្អនៅក្នុងប្រទេសកាតា ជាពិសេស នៅតាមការដ្ឋានសំណង់ថ្មីៗ។ កាសែតអង់គ្លេស The Guardian ធ្លាប់បានចុះផ្សាយថា គ្រាន់តែនៅចន្លោះ ខែមិថុនា និងខែសីហា មានកម្មករ៤៤នាក់ ជួបគ្រោះថា្នក់បាត់បង់ជីវិត នៅក្នុងការដ្ឋាន សំណង់ ដែលរដ្ឋាភិបាលកាតាសម្រុកធ្វើ ដើម្បី ទទួលការប្រកួតបាល់ទាត់ពិភពលោក។ រដ្ឋាភិបាលកាតាវិញបានរុញច្រានចោលព័ត៌មានរបស់កាសែតអង់គ្លេស ប៉ុន្តែ សន្យាកែលម្អឡើងវិញ លក្ខខណ្ឌការងាររបស់ពលករបរទេស។
នៅក្នុងសន្និសីទកាសែត កាលពីថ្ងៃអាទិត្យម្សិលមិញ មន្រ្តីរបស់អង្គការសហប្រជាជាតិ បានទទូចផងដែរដល់រដ្ឋាភិបាលកាតាឲ្យលុបចោលប្រព័ន្ធកាហ្វាលា ដែលអនុញ្ញាតឲ្យថៅកែមានសិទ្ធិពេញទី ដើម្បីហាមឃាត់មិនឲ្យពលករទៅបម្រើការនៅកន្លែងផ្សេង ឬដកហូតលិខិតឆ្លងដែនរបស់ពលករមិនឲ្យចាក ចេញពីប្រទេស៕ដោយ ឈាង បុប្ផា (RFI)
