ឥណ្ឌាបាញ់បង្ហោះដោយជោគជ័យនូវយានអវកាសទៅកាន់ភពព្រះអង្គារ
នៅថ្ងៃ អង្គារនេះ ឥណ្ឌាបានបាញ់បង្ហោះប្រកបដោយជោគជ័យនូវយានអវកាស ទៅកាន់ភពព្រះអង្គារ។ គឺជាប្រភេទយានគ្មានមនុស្សបើក ដើម្បីធ្វើការសិក្សាអំពីបរិយាកាសនៅភពព្រះអង្គារ។ ជោគជ័យនៃបេសកកម្មនេះនឺងអាចធ្វើឲ្យឥណ្ឌាក្លាយជាប្រទេសដំបូង បង្អស់នៅអាស៊ី ដែលអាចបង្ហោះយានអវកាសទៅកាន់ភពព្រះអង្គារ ហើយជាប្រទេសទី៤ នៅលើពិភពលោក បន្ទាប់ពីអាមេរិក រុស្ស៊ី និងសហភាពអឺរ៉ុប។
រ៉ុកែត ផ្ទុកយានអាវកាសឥណ្ឌាត្រូវបានបាញ់បង្ហោះដោយជោគជ័យ នៅម៉ោង ២ និង៣៨នាទីរសៀលថ្ងៃអង្គារ ម៉ោងក្នុងស្រុក (ត្រូវនឹងម៉ោង ៤ និង ៨នាទីរសៀល នៅប្រទេសកម្ពុជា)។
យានអាវកាសគ្មានមនុស្សបើក ដែលមានទំហំប៉ុនកូនឡាន ហើយមានទម្ងន់ជាង ១តោន នឹងត្រូវធ្វើដំណើរជុំវិញផែនដី ក្នុងរយៈពេលជិត ១ខែ ទើបអាចមានល្បឿនគ្រប់គ្រាន់ ដើម្បីចេញផុតពីទំនាញរបស់ផែនដី ហើយធ្វើដំណើរឆ្ពោះទៅកាន់ភពព្រះអង្គារ ដោយធ្វើដំណើរក្នុងរយៈចម្ងាយសរុប ៧៨០លានគីឡូម៉ែត្រ នឹងត្រូវប្រើពេលចំនួន ៣០០ថ្ងៃ (១០ខែ)។
អ្នកវិទ្យាសាស្រ្តនៅទីភ្នាក់ងារអវកាសអាមេរិក (NASA) បានឲ្យដឹងថា វាគឺជារឿងមិនគួរឲ្យជឿ ដែលឥណ្ឌាអាចបាញ់បង្ហោះយានអវកាសទៅកាន់ភពព្រះអង្គារនៅក្នុងពេល ឆាប់ៗបែបនេះ ពីព្រោះថា បេសកកម្មទៅកាន់ភពព្រះអង្គារ មានលក្ខណៈស្មុគស្មាញបំផុត ដោយសារតែវាមានចម្ងាយឆ្ងាយពីផែនដី។
គួរបញ្ជាក់ថា រហូតមកទល់នឹងពេលនេះ ក្នុងចំណោមបេសកកម្មទៅកាន់ភពព្រះអង្គារនៅទូទាំងពិភពលោក ចំនួន ៤០ មាន ២៣ដង (ពោលគឺជាងពាក់កណ្តាល) ដែលត្រូវទទួលបរាជ័យ។
ជប៉ុន និងចិន សុទ្ធតែធ្លាប់បានព្យាយាមបញ្ជូនយានអវកាសទៅកាន់ភពព្រះអង្គារ ក៏ប៉ុន្តែ បេសកកម្មទាំងនេះសុទ្ធតែត្រូវទទួលបរាជ័យទាំងអស់។ គិតរហូតមកទល់នឹងពេលនេះ មានតែអាមេរិក រុស្ស៊ី និងសហភាពអឺរ៉ុបប៉ុណ្ណោះ ដែលអាចបង្ហោះយានអវកាសគ្មានមនុស្សបើកដោយជោគជ័យ រហូតអាចធ្វើដំណើរទៅដល់ភពព្រះអង្គារបាន។ ឥណ្ឌានឹងក្លាយទៅជាប្រទេសទី៤ ប្រសិនបើយានអាវកាស ដែលបាញ់បង្ហោះនៅថ្ងៃនេះ អាចធ្វើដំណើរទៅដល់គន្លងតារាវិថីនៃភពព្រះអង្គារតាមគម្រោងពិតមែន។
អ្វីដែលគួរឲ្យកត់សម្គាល់ បេសកកម្មយានអាវកាសឥណ្ឌាទៅកាន់ភពព្រះអង្គារនៅពេលនេះ ត្រូវចំណាយលុយតែប្រមាណជា ៧៣លានដុល្លារអាមេរិកប៉ុណ្ណោះ ពោលគឺ ៦ដង តិចជាងបេសកកម្មរបស់ NASA ដែលគ្រោងបាញ់បង្ហោះ នៅថ្ងៃទី១៨វិច្ឆិកាខាងមុខ ហើយដែលត្រូវចំណាយលុយរហូតដល់ទៅ ៤៥៥លានដុល្លារ៕ដោយ សេង ឌីណា (RFI)