បុរសវៀតណាមម្នាក់ទទួលទោសជាប់ឃុំក្នុងផ្ទះ១៥ខែ ពីបទចុះផ្សាយការរិះគន់រដ្ឋាភិបាលក្នុងហ្វេសប៊ុក
នៅថ្ងៃអង្គារម្សិលមិញនេះ តុលាការវៀតណាមបានសំរេចដាក់ទោសបុរសវៀតណាមម្នាក់ ឈ្មោះ Dinh Nhat Uy ឌិន ញ៉ាត់វុយ អោយជាប់ឃុំនៅក្នុងផ្ទះខ្លួនរយៈពេល១៥ខែ ដោយស្ថិតក្រោមការឃ្លាំមើល។ បុរសនេះជាប់ចោទពីបទចុះផ្សាយអត្ថបទស្តីពីការរិះគន់ប្រឆាំង រដ្ឋាភិបាលវៀតណាម លើគេហទំព័រហ្វេសប៊ុក។ ការដាក់ទោសរបស់តុលាការវៀតណាមត្រូវគេចាត់ទុកថា ជាការរំលោភលើលទ្ធិប្រជាធិប តេយ្យ ដើម្បីជាប្រយោជន៍របស់រដ្ឋ។
Dinh Nhat Uy អាយុ៣០ឆ្នាំ ត្រូវបានតុលាការខេត្ត Long An វៀតណាម កាត់ទោសអោយជាប់ឃុំក្នុងគេហដ្ឋានខ្លួនរយៈពេល១ឆ្នាំ៤ខែ ដោយមានការឃ្លាំមើលពីអាជ្ញាធរ។ ហើយរយៈពេលនេះជាប់ឃុំក្នុងផ្ទះក្រោមការឃ្លាំមើលនេះ អាចនឹងបន្តថែមដល់មួយឆ្នាំទៀត។
មូលហេតុ គឺមកពីគាត់បានចុះផ្សាយខ្លឹមសាររិះគន់រដ្ឋាភិបាលវៀតណាម ក្នុងបណ្តាញសង្គមហ្វេសប៊ុក។ លោក វុយ ជាប់ចោទពីបទចុះផ្សាយព័ត៌មានភូតកុហក ស្តីពីរដ្ឋវៀតណាម។ លោកជាសកម្មជនទីមួយ ដែលជាប់ចោទតាមផ្លូវច្បាប់វៀតណាម ដោយសារតែបានចុះផ្សាយការរិះគន់រដ្ឋាភិបាល ក្នុងបណ្តាញសង្គមហ្វេសប៊ុក។
បុរសរូបនេះធ្លាប់បានចុះផ្សាយអត្ថបទមួយក្រោមចំណងជើងថា៖ សមាជិកគណបក្សទាំងនេះបានទទួលស្គាល់ការពិត។ អត្ថបទនេះបង្ហាញពីមន្ត្រីជាន់ខ្ពស់គណបក្សកុម្មុយនិស្តវៀតណាមពីរ រូប ដែលបានជជែកគ្នា ក្នុងសំដីសំដៅបែបប្រមាថលើនយោបាយថ្នាក់ដឹកនាំប្រទេស។ ក្នុងគេហទំព័រហ្វេសប៊ុក មនុស្សជាច្រើនបានអានអត្ថបទនេះ ហើយបានចែកផ្សាយតៗគ្នា ព្រមទាំងមានសរសេរអត្ថាធិប្បាយលើអត្ថបទផងដែរ។ អញ្ចឹងមានន័យថា ពួកគេទាំងនោះក៏បានរិះគន់រដ្ឋាភិបាលផងដែរ។
ការចោទប្រកាន់លោកវុយ គឺស្របតាមក្រមព្រហ្មទណ្ឌវៀតណាម មាត្រា២៥៨។ តាមច្បាប់វៀតណាម លោកវុយ អាចទោសជាប់ពន្ធនាគាររហូតដល់ទៅ៧ឆ្នាំឯណោះ។ អង្គការសិទ្ធិមនុស្ស Human Rights Watch បានទាមទារអោយមានការដោះលែងលោកវុយ ជាបន្ទាន់។ យោងតាមអង្គការ Human Rights Watch នៅដើមឆ្នាំ២០១៣នេះ មានមនុស្សយ៉ាងហោច៦១នាក់ បានជាប់ទោសពីបទធ្វើសកម្មភាពប្រឆាំងរដ្ឋអំណាចវៀតណាម។ ចំនួននេះមានត្រឹមតែ៤០នាក់ប៉ុណ្ណោះ កាលពីឆ្នាំ២០១២។
នីតិវិធីតុលាការ ដាក់ទោសអោយជាប់ឃុំក្នុងផ្ទះនេះ គឺជានិតិវិធីមួយទូទៅទៅហើយ នៅវៀតណាម។ វៀតណាមទើបតែបានបង្កើតច្បាប់ថ្មីមួយហាមឃាត់មិនអោយគេផ្សាយបន្ត ក្នុងបណ្តាញសង្គមដូចជា Facebook Twitter Blog នូវព័ត៌មានបច្ចុប្បន្នភាពនានា ដែលទីភ្នាក់ងារព័ត៌មាន ឬវិបសៃតិ៍ព័ត៌មានរបស់រដ្ឋបានចុះផ្សាយរួចហើយ៕ដោយ ព្រំ សឿន សូលីណា (RFI)
