អង្គការសហប្រជាជាតិបារម្ភខ្លាចអាចម៍ផ្កាយប៉ះទង្គិចផែនដី
អង្គការសហប្រជាជាតិមិនបានមើលរំលងពី លទ្ធភាពដែលអាចម៍ផ្កាយ អាចហោះមកប៉ះទង្គិចភពផែនដី យើងនោះឡើយ។ ក្នុងសប្តាហ៍នេះ អង្គការសហប្រជាជាតិបានអនុម័តវិធានការជាច្រើនសំរេចអោយមាន កិច្ចសហប្រតិបត្តិការជាអន្តរជាតិ ដើម្បីចាប់យកពីវត្តមានអាចម៍ផ្កាយ។ អ្នកតារាសាស្ត្រ និងអ្នកតារារូប និយមនានាបានជួបជុំគ្នា នៅក្រុងញូវយក ដើម្បីអបអរការសំរេចរបស់អង្គការសហប្រជាជាតិ។
ប្រសិនបើយើងហាក់មិនបានព្រួយបារម្ភថា នឹងមានការប៉ះទង្គិចរវាងអាចម៍ផ្កាយជាមួយភពផែនដីយើង នោះទេ អង្គការសហប្រជាជាតិបានចាត់ទុកថា ការប៉ះទង្គិចនេះគឺជារឿងមិនអាចមើលស្រាលបានឡើយ ។ ក្នុងសប្តាហ៍នេះ អង្គការសហប្រជាជាតិបានសំរេចអោយមានកិច្ចសហប្រតិបត្តិការក្នុងបែបផែន អន្តរ ជាតិ ដើម្បីចាប់យកពីវត្តមានអាចម៍ផ្កាយ។
គួរបញ្ជាក់ថា អង្គការណាសា បានតាមដានពិនិត្យអាចម៍ផ្កាយធំៗប្រមាណ១៤០០ ប៉ុន្តែអាចម៍ផ្កាយទំហំតូចៗ មិនត្រូវបានគេកត់ត្រាក្នុងបញ្ជីនោះទេ។ លោក Rusty Schweickart ជាអតីតអ្នកតារានិយមមួយរូប បានប្រាប់ថា អាចម៍ផ្កាយតូចៗក៏អាចបង្កគ្រោះថា្នក់បានដែរ។ អាចម៍ផ្កាយមានទំហំចាប់ពី៣០ម៉ែត្រនៃវិជ្ឈមាត្រទៅ អាចបង្កគ្រោះថា្នក់បាន។ ការប៉ះទង្គិចរវាងអាចម៍ផ្កាយជាមួយភពផែនដី មានរៀងរាល់២៥០ឆ្នាំ រឺរាល់៣០០ឆ្នាំម្តង។ កាលពីឆ្នាំ១៩០៨ រុស្ស៊ីធ្លាប់រងការប៉ះទង្គិចបែបនេះម្តងមកហើយ ដែលកាល ណោះ ព្រៃទំហំ២០០០គីឡូម៉ែត្រក្រឡា ត្រូវបានអាចម៍ផ្កាយបំផ្លាញខ្ទេចខ្ទាំ។
អ្នកវិទ្យាសាស្ត្រនានារំពឹងថា អាចម៍ផ្កាយដែលអាចបំផ្លាញក្រុងផ្សេងៗដូចជា ក្រុងញូវយក សហរដ្ឋ អាមេរិកនោះ អាចមានចំនួនដល់ទៅមួយលានឯណោះ។ អង្គការសហប្រជាជាតិបានបង្កើតក្រុមការងារមួយ ដើម្បីពង្រឹងការចាប់យកវត្តមានអាចម៍ផ្កាយអោយកាន់តែប្រសើរឡើង។ យោងតាមអង្គការសហ ប្រជាជាតិ យើងអាចដឹងបាន ១០ឆ្នាំ ទៅ១៥ឆ្នាំមុន ថានឹងមានហេតុការណ៍ប៉ះទង្គិចរវាងអាចម៍ផ្កាយជាមួយផែនដី។ ដូច្នេះ ជាមួយនឹងឧបករណ៍ដែលមានរួចមកហើយ អ្នកវិទ្យាសាស្ត្រអាចនឹងខិតទៅជីតអាចម៍ផ្កាយ និងផ្ទៀងផ្ទាត់ពីដំណើរចរណ៍របស់វា ហើយអាចបង្វែរល្បឿនអាចម៍ផ្កាយនោះ ដើម្បីអោយវាចៀសប៉ះទង្គិចផែនដី នៅ១៥ឆ្នាំក្រោយ។ ពោលគឺអោយវាហោះមកប្រកៀកក្បែរផែនដីយើងប៉ុណ្ណោះ ដោយគ្មានការទង្គិច។
គួររំលឹកថា កាលពីខែកុម្ភៈដើមឆ្នាំ អាចម៍ផ្កាយតូចមួយទំហំត្រឹម២០ម៉ែត្រនៃវិជ្ឈមាត្រ បានធ្វើអោយមានមនុស្សជាង១០០០នាក់រងរបួស នៅរុស្ស៊ី និងបង្កការខូចខាតរាប់លានដុល្លារ៕ដោយ ព្រំ សឿន សូលីណា (RFI)
