អាមេរិកបដិសេធព័ត៌មានកាសែតបារាំងជុំវិញការលួចស្តាប់ទូរសព្ទពលរដ្ឋបារាំង
ដើម្បីរំងាប់កំហឹងរបស់រដ្ឋាភិបាល បារាំង ប្រធានទីភ្នាក់ងារចារកិច្ចអាមេរិក លោក ចេម ក្លាប់ផឺ James Clapper បានបង្ខំចិត្តចេញមុខបដិសេធព័ត៌មានរបស់កាសែតបារាំង Le Monde ស្តីពីការលួចស្តាប់ទូរសព្ទពលរដ្ឋបារាំង។ លោកក្លាប់ផឺ បានចោទទៅកាសែតបារាំងវិញថា ព័ត៌មានទាំងនោះមិនមែនជាការពិតនោះទេ។ នេះបើយោងតាមសារព័ត៌មានបារាំងAFP នៅថ្ងៃពុធនេះ។ ប៉ុន្មានថ្ងៃមុននេះ កាសែតបារាំង Le Monde បានចុះផ្សាយព័ត៌មាន យកបានពី Edward Snowden ទាក់ទងសកម្មភាពទីភ្នាក់ងារចារកិច្ចអាមេរិក ដែលលួចស្តាប់ និងថតការសន្ទនាតាមទូរស័ព្ទរបស់ពលរដ្ឋបារាំង។
លោក ចេម ក្លាប់ផឺ James Clapper ប្រធានទីភ្នាក់ងារចារកិច្ចអាមេរិក បានចេញមុខដោយផ្ទាល់ បដិសេធព័ត៌មានដែលចុះផ្សាយដោយសារព័ត៌មានបារាំង ឡឺ ម៉ុងដ៍ ជុំវិញសកម្មភាពលួចស្តាប់ទូរសព្ទពលរដ្ឋ បារាំង។ លោក ចេម ក្លាប់ផឺ ចោទសារព័ត៌មានបារាំងវិញថា ព័ត៌មានដែលសារព័ត៌មាននេះចុះថា ទីភ្នាក់ងារសន្តិសុខជាតិអាមេរិក NSA បានធ្វើការលួចស្តាប់ និងថតការសន្ទនាតាមទូរស័ព្ទប្រមាណជាង ៧០លាន របស់ពលរដ្ឋបារាំងនោះ មិនមែនជាការពិតឡើយ។
លោកក្លាប់ផឺប្រាប់ថា ព័ត៌មានដែលអាមេរិកធ្វើការប្រមែរប្រមូលយកនោះ គឺមានលក្ខណៈដូចគ្នាទាំងអស់នៅគ្រប់ប្រទេស។ ប៉ុន្តែប្រធានទីភ្នាក់ងារចារកិច្ចអមេរិករូបនេះ មិនបានប្រាប់ថា តើព័ត៌មានទាំងនោះខុសពីការពិតនៅត្រង់ចំណុចណានោះទេ។
គួររំលឹកថា ដោយសារតែការចុះផ្សាយរបស់កាសែតបារាំងបែបនេះ រដ្ឋាភិបាលបារាំងបានបញ្ចេញកំហឹងចំពោះអាមេរិក ដែលជាសម្ព័ន្ធមិត្តរបស់ខ្លួន និងបានទាមទារអោយអាមេរិកបកស្រាយបញ្ហានេះ។ លោកអូបាម៉ា និងប្រមុខការទូតអាមេរិក ចន ឃែរី បានព្យាយាមបកស្រាយរំងាប់កំហឹងប្រធានាធិបតីបារាំង ហ្វ្រង់ស៊័រ ហូឡង់ រួចមកហើយ។ នៅពេលនេះ លោក ចេម ក្លាប់ផឺ James Clapper ដែលជាប្រធានគ្រប់គ្រងទីភ្នាក់ងារចារកិច្ចអាមេរិកចំនួន១៦ ក្នុងនោះក៏មានទីភ្នាក់ងារសន្តិសុខជាតិអាមេរិក NSA ដែរនោះ បានបង្ខំចិត្តចេញមុខបដិសេធព័ត៌មានរបស់កាសែតបារាំង ដើម្បីរំសាយកំហឹងរដ្ឋាភិបាលបារាំងផងដែរ។
ទោះជាមានការចោទប្រកាន់បែបនេះក្តី នៅថ្ងៃពុធម្សិលមិញនេះ កាសែតបារាំង ឡឺ ម៉ុងដ៍ នៅតែប្រាបថ់ា ព័ត៌មានដែលខ្លួនបានចុះផ្សាយទាំងអស់នោះ គឺជាការពិត។
នៅថ្ងៃពុធនេះដែរ ប្រធានាធិបតីបារាំងចង់អោយទីភ្នាក់ងារចារកិច្ចអាមេរិក និងទីភ្នាក់ងារចារកិច្ចបារាំងសហការគ្នា ដើម្បីរកពន្លឺលើបញ្ហានេះ និងក៏ដើម្បីគ្រប់គ្រងរឿងរ៉ាវទាក់ទងនឹង Edward Snowden ដែលធ្លាប់បំរើការអោយទីភ្នាក់ងារចារកិច្ចអាមេរិកផងដែរ៕ដោយ ព្រំ សឿន សូលីណា (RFI)
