ធនាគារ JP Morgan ត្រូវអាជ្ញាធរផាករាប់ពាន់លានដុល្លារ
មានរបាយការណ៍ថា ធនាគារ JP Morgan ដ៏ធំបំផុតរបស់អាម៉េរិកបានព្រមព្រៀងបង់ប្រាក់ផាកពិន័យចំនួន១៣ ពាន់លានដុល្លារដល់អាជ្ញាធរ ជុំវិញសកម្មភាពពាណិជ្ជកម្មជាច្រើនរបស់ធនាគារនេះនៅមុនពេលមាន ព្រឹត្ដិការណ៍វិបត្ដិហិរញ្ញវត្ថុសកលលោកនៅឆ្នាំ២០០៧។
ឆ្នាំនេះ គឺជាឆ្នាំមួយដ៏ពិបាកសម្រាប់ធនាគារនេះ ដែលទើបបានងើបមុខពីវិបត្ដិហិរញ្ញវត្ថុពិភពលោកក្នុងស្ថានភាព ប្រសើរជាងក្រុមហ៊ុនប្រកួតប្រជែងជាច្រើនទៀតរបស់ខ្លួន។
កាល ពីខែមុនធនាគារ JP Morgan ត្រូវអាជ្ញាធរផាកពិន័យអស់ជាង៩រយលានដុល្លារ ចំពោះការធ្វើពាណិជ្ជកម្មដែលមានគ្រោះថ្នាក់ប្រថុយប្រថានជាច្រើន បន្ដបន្ទាប់នៅក្នុងសាខាជំនួញរបស់ក្រុមហ៊ុននៅក្រុងឡុងដ៍ប្រទេស អង់គ្លេស។
ឥឡូវនេះមានរបាយការណ៍មកថា ធនាគារនេះបានព្រមព្រៀងបង់ការផាកពិន័យស៊ីវិលជាទឹកប្រាក់ខ្ពស់ បំផុតមិនធ្លាប់មានចំនួន១៣ពាន់លានដុល្លារ ប៉ុន្ដែនៅក្រុមហ៊ុននេះនៅតែអាចប្រឈមមុខនឹងការប្ដឹងបទឧក្រិដ្ឋ កម្មផងដែរ។
ធនាគារ JP Morgan នេះបានរងការចោទប្រកាន់ថា បានលក់មូលប័ត្រជាច្រើនដែលផ្អែកលើសន្ដិសុខថវិកាពីប្រាក់កម្ចី ទិញផ្ទះ ដែលធនាគារបានដឹងថា មានហានិភ័យខ្ពស់ខ្លាំងបំផុត ហើយក្រោយមកទ្រព្យសម្បត្ដិទាំងនោះបានក្លាយជាសម្បត្ដិ ដែលមានវិបត្តិលែងមានតម្លៃ ឬ Toxic Assets ក្រោយពីមានវិបត្ដិហិរញ្ញវត្ថុ។
មកទល់ពេលនេះ ធនាគារ និងក្រសួងយុត្ដិធម៌អាម៉េរិកមិនបានបញ្ជាក់ឲ្យដឹងព័ត៌មាននេះទេ ប៉ុន្ដែមានរបាយការណ៍ថា អាជ្ញាធរនឹងប្រកាសឲ្យដឹងនូវព័ត៌មាននេះនៅពេលឆាប់ៗនេះ៕ (Radio Australia)
