អាជ្ញាធរអូស្រ្ដាលីបារម្ភអំពីការរាលដាលភ្លើងឆេះព្រៃនៅ NSW
ស្ថានភាពប្រកាសគ្រាអាសន្ននៃរដ្ឋ NSW ប្រទេសអូស្រ្ដាលីកំពុងឋិតនៅជាធរមាននៅឡើយទូទាំងរដ្ឋនេះ នៅក្នុងខណៈពេលដែលអាជ្ញាធរចេញការព្រមាននូវគ្រោះអាសន្នអគ្គិភ័យដ៏ ខ្លាំងក្លាមិនធ្លាប់មានពីមុនមក។
ភ្លើងឆេះព្រៃធំៗចំនួន៣ដាច់ពីគ្នា កំពុងតែឆាបឆេះសន្ធោសន្ធៅនៅភ្នំ Blue Mountains ហើយអាជ្ញាធរពន្លត់អគ្គិភ័យជនបទមានការបារម្ភថា ភ្លើងឆេះព្រៃទាំងបីកន្លែងនេះ អាចរួមគ្នាជាកម្លាំងតែមួយនៅក្នុងពេលប៉ុន្មានថ្ងៃខាងមុខនេះ ដែលមានអាកាសធាតុក្ដៅ។
កាលពីយប់មិញ ក្រុមអ្នកពន្លត់អគ្គិភ័យបានចំណាយពេលអស់មួយយប់ដើម្បីឆ្ការព្រៃបង្កើត ឲ្យមានខ្សែបន្ទាត់បង្អាក់ការឆ្លងរាលដាល ដើម្បីទប់ទល់កុំឲ្យភ្លើងព្រៃឆាបឆេះទៅកន្លែងផ្សេងៗទៀត ដោយសារមានការព្យាករថា ខ្យល់ខ្លាំង និងអាកាសធាតុក្ដៅអាចធ្វើឲ្យមានបញ្ហាកាន់តែធំ។
អាជ្ញាធរ ពន្លត់ភ្លើងជនបទនៅក្នុងរដ្ឋ NSW និយាយថា វិធីសាស្រ្ដនៃការដុតព្រៃឆ្ការទប់ស្កាត់ការរាលដាលដែលមានគ្រោះ ថ្នាក់ខ្ពស់ កំពុងត្រូវអាជ្ញាធរយកមកគិតគូរពិចារណា ដើម្បីព្យាយាមគ្រប់គ្រងភ្លើងឆេះព្រៃក្នុងទំហំ៣០០គីឡូម៉ែត្រនៅជិត តំបន់ Lithgow៕ (Radio Australia)
