បស្ចឹមលោកអំពាវនាវឱ្យទេសចរបរទេសប្រយ័ត្ននឹងគ្រោះភេរវកម្មនៅភូមា
បណ្តាប្រទេសបស្ចឹមលោកជាច្រើនបានជូន ដំណឹងដល់ពលរដ្ឋរបស់ខ្លួនឱ្យមានការប្រុងប្រយ័ត្ន នៅពេលធ្វើដំណើរទៅប្រទេសភូមា។ ភូមា ដែលបានរងការវាយប្រហារបំផ្ទុះគ្រាប់បែកតៗគ្នា ជាច្រើនលើកច្រើន នារយៈពេលប៉ុន្មានថ្ងៃចុងក្រោយនេះ ក្នុងនោះមានគ្រាប់ផ្ទុះនៅក្នុងសណ្ឋាគារប្រណិតនៅទីក្រុង រ៉ង់ហ្គូន។
មិនមែនជាការហាមឃាត់ទេ តែជាសេចក្តីប្រកាសណែនាំ ! ប្រទេសលោកខាងលិច មានជាអាទិ៍ បារាំង អង់គ្លេស សហរដ្ឋអាមេរិក និងអូស្ត្រាលី បានអំពាវនាវឱ្យពលរដ្ឋខ្លួន ដែលកំពុងស្ថិតនៅក្នុងប្រទេសភូមា ប្រុងប្រយ័ត្ន។ ជាការគំរាមកំហែងភេរវកម្មដ៏សំខាន់មួយ ដែលគេមិនទាន់ដឹងពីកម្មវត្ថុ និងអាចកើតឡើងដោយចៃដន្យនៅតាមកន្លែងមានទេសចរច្រើន! នេះបើតាមភាសាទូតអង់គ្លេស។ នឹងមានភេរវកម្មបំផ្ទុះគ្រាប់បែកថ្មីទៀត ! នេះជាការព្រមានរបស់ស្ថានទូតអូស្រ្តាលី។
បើតាមអ្នកសង្កេតការណ៍ សកម្មភាពបំផ្ទុះគ្រាប់បែកនេះ ទំនងជាដើម្បីបង្កភាពភ័យស្លន់ស្លោ និងបង្អាក់ដំណើរការធ្វើកំណែទម្រង់ប្រទេសតែប៉ុណ្ណោះ គឺគ្មានចេតនាធ្វើឱ្យមានជនរងគ្រោះច្រើនទេ។ បើតាម សហភាពជាតិការ៉ែន ជនសង្ស័យចាប់ខ្លួនបាននៅថ្ងៃអង្គារម្សិលមិញ ជាសមាជិកម្នាក់របស់ក្រុមឧទ្ទាមប្រដាប់អាវុធការ៉ែន។ ប៉ុន្តែបុគ្គលនេះទំនងជាមិនសប្បាយចិត្តនឹងការចុះហត្ថលេខាឈប់ បាញ់ជាប្រវត្តិសាស្ត្ររវាងសហភាពនិងរដ្ឋាភិបាល។
សូមបញ្ជាក់ថា ការបំផ្ទុះគ្រាប់បែកជាសេរី នៅតាមកន្លែងផ្សេងៗគ្នា បានចាប់ផ្តើមតាំងពីថ្ងៃសុក្រទី ១១តុលាមក បង្កឱ្យមានមនុស្សស្លាប់ពីរនាក់ និងរបួសជាច្រើននាក់។ គ្រាប់បែកចុងក្រោយផ្ទុះកាលពីថ្ងៃចន្ទ នៅក្នុងបន្ទប់សណ្ឋាគារ Traders នៅទីក្រុងរ៉ង់ហ្គូន ដែលទេសចរបរទេសនិងអ្នកជំនួញចូលចិត្តស្នាក់នៅ បណ្តាលឱ្យស្ត្រីជាតិអាមេរិកម្នាក់រងរបួស។
ការបំផ្ទុះគ្រាប់បែក តែងកើតឡើងជាញឹកញយ ក្នុងសម័យដឹកនាំដោយរបបផ្តាច់ការ ដោយស្នាដៃរបស់ពួកឧទ្ទាមទ័ពព្រៃ ប៉ុន្តែកម្រកើតមានណាស់ តាំងពីភូមាមានរដ្ឋាភិបាលស៊ីវិល នៅឆ្នាំ២០១១ មានការធ្វើកំណែទម្រង់នយោបាយ និងចុះកិច្ចព្រមព្រៀងសន្តិភាពជាមួយក្រុមឧទ្ទាមជនជាតិភាគតិចនិង ទ័ពព្រៃមក៕ដោយ អៀង សុខម៉ិញ (RFI)
