ប៉ូលិសប្រឆាំងពុករលួយចិនត្រូវជាប់ពន្ធនាគារពីបទធ្វើទារុណកម្មសួរចម្លើយជនសង្ស័យ
មន្រ្តីចិន ៦នាក់ ត្រូវបានតុលាការផ្តន្ទាទោសឲ្យជាប់ពន្ធនាគារម្នាក់ៗ ពី ៤ឆ្នាំ ទៅ ១៤ឆ្នាំ ពីបទថាបានធ្វើទារុណកម្មសួរចម្លើយជនជាប់សង្ស័យពីបទពុករលួយ រហូតដល់ស្លាប់។ នេះបើយោងតាមការអះអាងរបស់មេធាវីគ្រួសារជនរងគ្រោះ នៅថ្ងៃអង្គារនេះ។ សំណុំរឿងនេះ គឺជាការបង្ហាញឲ្យឃើញអំពីទង្វើរំលោភបំពានរបស់អាជ្ញាធរ នៅក្នុងយុទ្ធនាការប្រឆាំងអំពើពុករលួយ នៅចិន។
ជនជាប់ចោទ ទាំង ៦នាក់ ដែលក្នុងនោះ ៥នាក់ ជាសមាជិកគណៈកម្មការវិន័យរបស់បក្សកុម្មុយនិស្តចិន ត្រូវបានតុលាការសម្រេចឲ្យជាប់ទោស ពីបទ “ហិង្សាដោយចេតនា”។ តុលាការបានចេញសេចក្តីសម្រេចនេះ តាំងពីថ្ងៃទី៣០កញ្ញាមកម៉្លេះ ក៏ប៉ុន្តែ ការប្រកាសសាលក្រមត្រូវបានធ្វើដោយបិទទ្វារ ហើយព័ត៌មាននេះមិនត្រូវបានចុះផ្សាយដោយបណ្តាញព័ត៌មានរបស់រដ្ឋ នោះទេ។ នេះបើយោងតាមមេធាវីគ្រួសាររបស់ជនរងគ្រោះ ដែលបានប្រាប់ទីភ្នាក់ងារព័ត៌មានបារាំង AFP នៅថ្ងៃអង្គារនេះ។
ជនរងគ្រោះ ក្នុងសំណុំរឿងនេះ គឺជាប្រធានក្រុមវិស្វករនៃក្រុមហ៊ុនមួយរបស់រដ្ឋចិន ដែលត្រូវបានចាប់ឃុំខ្លួន កាលពីខែមីនា ដោយជាប់សង្ស័យពីបទពុករលួយ។ នៅក្នុងអំឡុងពេលជាប់ឃុំ ជនរងគ្រោះត្រូវបានមន្រ្តីប្រឆាំងអំពើពុករលួយទាំង ៦នាក់ ធ្វើទារុណកម្មសួរចម្លើយ ដោយវាយដំ និងជ្រមុជក្បាលក្នុងទឹក រហូតដល់ឈ្លក់ទឹកស្លាប់ នៅថ្ងៃទី៩ ខែមេសា។
មេធាវីរបស់មន្រ្តីប្រឆាំងពុករលួយទាំង ៦រូប បានអះអាងថា ពួកគេទាំង ៦នាក់ សុទ្ធតែបានសារភាពនៅចំពោះមុខតុលាការថា ពួកគេពិតជាបានធ្វើទារុណកម្មជនរងគ្រោះពិតមែន ក៏ប៉ុន្តែ ធ្វើទៅតាមបញ្ជារបស់ថ្នាក់លើ។ ហេតុដូច្នេះហើយបានជា មន្រ្តីទាំង ៦នាក់ បានសម្រេចចិត្តប្តឹងឧទ្ធរណ៍ជំទាស់នឹងសេចក្តីសម្រេចរបស់តុលាការ ដោយពួកគេយល់ថា តុលាការដាក់ទោសតែមន្រ្តីតូចតាច ប៉ុន្តែ ថ្នាក់លើដែលជាអ្នកចេញបញ្ជាបែរជាត្រូវរួចខ្លួន។
គួរបញ្ជាក់ថា រដ្ឋាភិបាលថ្មីរបស់ចិន ក្រោមការដឹកនាំរបស់លោកស៊ី ជីនពីង និងលោកលី ខឺឈាំង បានយកការប្រយុទ្ធប្រឆាំងនឹងអំពើពុករលួយជាអាទិភាពខ្ពស់បំផុត ហើយបានបើកយុទ្ធនាការបោសសម្អាតអំពើពុករលួយ នៅក្នុងរដ្ឋបាលសាធារណៈ រហូតដល់មន្រ្តីជាន់ខ្ពស់របស់បក្ស និងរដ្ឋ។ ក៏ប៉ុន្តែ យុទ្ធនាការនេះត្រូវបានធ្វើឡើងដោយគ្មានតម្លាភាព ហើយអ្នកវិភាគខ្លះយល់ថា យុទ្ធនាការប្រយុទ្ធប្រឆាំងនឹងអំពើពុករលួយត្រូវបានមន្រ្តីខ្លះយក ទៅប្រើជាមធ្យោបាយ ដើម្បីកម្ចាត់គូសត្រូវនយោបាយទៅវិញ។
សំណុំរឿងធ្វើទារុណកម្មសួរចម្លើយជនសង្ស័យរហូតដល់ស្លាប់ ក៏ជាពន្លឺមួយដែរ ដែលឆ្លុះបង្ហាញអំពីការប្រើវិធីខុសច្បាប់ នៅក្នុងយុទ្ធនាការប្រឆាំងនឹងអំពើពុករលួយនេះ៕ដោយ សេង ឌីណា (RFI)
