ព្រះឆាយាល័ក្ខណ៍ព្រះបរមកោដ្ឋគ្របដណ្តប់ហ្វ៊េសប៊ុកជាថ្មី
ភ្នំពេញ ៖ គេនៅចាំបានថា នៅថ្ងៃដែលសម្តេចឪព្រះនរោត្តម សីហនុយាងសោយទិវង្គត តាមទំព័របណ្តាញសង្គមហេ្វសប៊ុកស្ទើទាំងស្រុង គ្របដណ្តប់ដោយព្រះឆាយាល័ក្ខរបស់ព្រះអង្គ ហើយនៅថ្ងៃនេះ ព្រឹត្តិការណ៍ដូចគ្នាបានកើតឡើងសារជាថ្មី ខណៈប្រទេសកម្ពុជា កំពុងប្រារព្ធខួបមួយឆ្នាំ ការយាងសោយទិវង្គតនៃ ព្រះបរមរតនកោដ្ឋ។
អារម្មណ៍សោកស្តាយ និងនឹកស្រណោះ នៃការយាងសោយទិវង្គតនៃសម្តេចឪ ត្រូវបានគេមើលឃើញនៅក្នុងបណ្តាញសង្គមហ្វ៊េសប៊ុក ដ៏ធំ។ រូបភាពព្រះឆាយាល័ក្ខណ៍របស់ព្រះបរមរតនកោដ្ឋ បានផុសឡើងយ៉ាង ព្រោងព្រាត ជារូបភាពពណ៌ក៏មាន ជារូបសខ្មៅក្នុងន័យកាន់ទុក្ខក៏មាន។
តាមទំព័រហ្វេសប៊ុកមួយចំនួន បានរចនារូបភាពផ្ទាំងខ្មៅមួយសន្លឹក អមដោយ រូបព្រះឆាយាល័ក្ខណ៍និងរូបភ្លើងទាន ដើម្បីឧទ្ទិសដល់ព្រះវិញ្ញាណក្ខ័ន្ធសម្តេចព្រះបរមរតនកោដ្ឋ ក្នុងគម្រប់ខួប១ឆ្នាំ។
ម្ចាស់គណនីយហ្វ៊េសប៊ុកមួយចំនួនបានផ្លាស់ប្តូររូបសំគាល់ខ្លួន ចេញជាថ្មីដោយដាក់ជំនួសមកវិញនូវរូបអង្គសម្តេចតា។ ការផ្លាស់ប្តូរនេះបានចាប់តាំងពីរាត្រី ថ្ងៃទី១៤ខែតុលា រហូតដល់ព្រឹកថ្ងៃអង្គារទី១៥នេះ។ ក្នុងរូបទាំងនោះស្ថិតអត្ថន័យ ចូលរួមរំលែកទុក្ខ ការនឹករលឹក ដល់ព្រះវីរក្សត្រ ដ៏ក្លាហានអង់អាច។
ការសម្តែងមរណទុក្ខតាមស្ថាប័នការងារជាច្រើនក្នុងប្រទេសកម្ពុជា ក៏បានដាក់បង្ហាញក្នុងទំព័រហ្វេស ប៊ុក ឫប្លុករបស់ពួកគេដែរនៅថ្ងៃនេះ។ ជាការរៀបចំដោយមានរូបព្រះឆាយាល័ក្ខណ៍ ផ្កាពណ៌ស ប៊ូរខ្មៅ សម្តែងពីការកាន់ទុក្ខ៕ នាង/Cambodia News
