អ៊ីរ៉ង់បដិសេធមិនបញ្ជូនសារធាតុអ៊ុយរ៉ាញ៉ូមទៅក្រៅប្រទេស
ប្រធានក្រុមចរចាសំណុំរឿងនុយក្លេអ៊ែរ អ៊ីរ៉ង់ លោក អាប់បា អារ៉ាក់ឈី បានប្រកាសថា អ៊ីរ៉ង់បដិសេធដាច់ខាតមិនបញ្ជូនសារធាតុអ៊ុយរ៉ាញ៉ូម ទៅក្រៅប្រទេសនោះទេ។ នេះបើយោងតាមការចុះផ្សាយនៃគេហទំព័រទូរទស្សន៍រដ្ឋអ៊ីរ៉ង់ នៅថ្ងៃអាទិត្យម្សិលមិញនេះ។ អ្នកទទួលខុសត្រូវអ៊ីរ៉ង់រូបនេះ ប្រាប់ថា ការបញ្ជូនធាតុអ៊ុយរ៉ាញ៉ូមដែលគេចម្រើនរួច ចេញទៅក្រៅប្រទេស គឺជាការរំលោភលើបន្ទាត់ក្រហមដែលជាបន្ទាត់ហាមឃាត់របស់អ៊ីរ៉ង់។
ប្រធានក្រុមចរចាសំណុំរឿងនុយក្លេអ៊ែរអ៊ីរ៉ង់ លោក អាប់បា អារ៉ាក់ឈី នៅតែបង្ហាញពីគោលជំហរអ៊ីរ៉ង់ ក្នុងការបដិសេធដាច់ខាតមិនបញ្ជូនសារធាតុអ៊ុយរ៉ាញ៉ូម ទៅបរទេស។ លោក អាប់បា អារ៉ាក់ឈី ត្រូវចូលរួមកិច្ចប្រជុំស្តីពីនុយក្លេអ៊ែរ នៅក្រុងហ្សឺណែវ ជាមួយប្រទេសមហាអំណាចនានា នៅថ្ងៃអង្គារស្អែកនេះ។
លោកបានលើកឡើងថា ក្នុងការពិភាក្សាសំណុំរឿងនុយក្លេអ៊ែរ គេអាចជជែកគ្នាពីទម្រង់ ពីបរិមាណ និងពីកម្រិតនៃការចម្រើនធាតុអ៊ុយរ៉ាញ៉ូម ប៉ុន្តែ បើចង់បញ្ជូនសារធាតុអ៊ុយរ៉ាញ៉ូមដែលគេចម្រើនរួចហើយ ចេញពីអ៊ីរ៉ង់ទៅបរទេស នោះគឺជាការរំលោភលើបន្ទាត់ក្រហមដែលជាបន្ទាត់ហាមឃាត់របស់ អ៊ីរ៉ង់ ក្នុងសំណុំរឿងនុយក្លេអ៊ែរហើយ។ អ្នកទទួលខុសត្រូវសំណុំរឿងនុយក្លេអ៊ែររូបនេះ ក៏បានប្រាប់ដែរថា អ៊ីរ៉ង់បដិសេធមិនព្រមព្យួរសកម្មភាពពង្រីកធាតុអ៊ុយរ៉ាញ៉ូមខ្លួនជា ដាច់ខាត។
គួររំលឹកថា ប្រទេសលោកខាងលិចតែងសង្ស័យអ៊ីរ៉ង់ថា ចង់ផលិតអាវុធនុយក្លេអ៊ែរ តាមរយៈកម្មវិធីនុយក្លេអ៊ែរស៊ីវិលខ្លួន។ ទីភ្នាក់ងារថាមពលបរមាណូអន្តរជាតិ ហៅកាត់ថា AIEA បានចេញរបាយការណ៍មួយ កាលពីខែសីហា បង្ហាញថា អ៊ីរ៉ង់មានធាតុអ៊ុយរ៉ាញ៉ូម៦ពាន់៧៧៤គីឡូក្រាម សំរាប់បង្កើនអ៊ីសូតូបកម្រិត៣,៥ភាគរយ និងធាតុអ៊ុយរ៉ាញ៉ូម១៨៦គីឡូក្រាមទៀត សំរាប់បង្កើនអ៊ីសូតូប២០ភាគរយ។
គួររំលឹកថា ប្រសិនបើអ៊ីរ៉ង់ចម្រើនធាតុអ៊ុយរ៉ាញ៉ូម ដោយបង្កើនអ៊ីសូតូបរហូតដល់កម្រិត៩០ភាគរយនោះ ប្រទេសមួយនេះនឹងអាចផលិតអាវុធនុយក្លេអ៊ែរបានជាក់ជាមិនខាន។
កន្លងមក បារាំងនិងរុស្ស៊ី ចង់យកសារធាតុអ៊ុយរ៉ាញ៉ូមអ៊ីរ៉ង់ទៅបន្សុទ្ធត្រឹម កម្រិតមួយដែលអាចប្រើប្រាស់ក្នុងរោងចក្រនុយក្លេអ៊ែរស៊ីវិល រួចហើយនឹងបញ្ជូនវាទៅអោយអ៊ីរ៉ង់វិញ។ តែត្រូវអ៊ីរ៉ង់ជំទាស់។
ប្រធានក្រុមចរចាសំណុំរឿងនុយក្លេអ៊ែរអ៊ីរ៉ង់ បានបន្ថែមថា ក្រុមចរចាសំណុំរឿងនុយក្លេអ៊ែរអ៊ីរ៉ង់ នឹងជជែកការពារសិទ្ធិរបស់អ៊ីរ៉ង់ ក្នុងការសាងសង់មជ្ឈមណ្ឌលនុយក្លេអ៊ែរ និងការចម្រើនធាតុអ៊ុយរ៉ាញ៉ូមដោយខ្លួនឯង។
យោងតាមប្រភពព័ត៌មានជិតដិតនឹងសំណុំរឿងនេះ ក្នុងបន្ទាត់ហាមឃាត់អ៊ីរ៉ង់ អ្វីដែលអ៊ីរ៉ង់ចង់បាននោះ មានដូចជា ការចម្រើនធាតុអ៊ុយរ៉ាញ៉ូមក្នុងទឹកដីអ៊ីរ៉ង់ ការមិនបញ្ជូនសារធាតុអ៊ុយរ៉ាញ៉ូមដែលស្តុកទុក ចេញទៅបរទេស និងការបន្តដំណើរការនៃទីតាំងចម្រើនធាតុអ៊ុយរ៉ាញ៉ូមក្រោមដីមួយ កន្លែង នៅភាគកណ្តាលអ៊ីរ៉ង់៕ដោយ ព្រំ សឿន សូលីណា (RFI)