ប្រចណ្ឌស្រីស្នេហ៍ រកទៅដេកជាមួយប្រុសថ្មី ខឹងវាយបោចសក់តាមផ្លូវ
ភ្នំពេញ៖ គូស្នេហ៍មួយគូ បុរសមានវ័យជាង៣០ឆ្នាំ ចំណែកស្រ្តីមានវ័យទើបតែ២០ឆ្នាំ បានជិះម៉ូតូឌុបគ្នាបណ្តើរឈ្លោះទាស់ទែងគ្នាបណ្តើរ ត្រូវប្រុសស្នេហ៍នោះចាប់បោចសក់វាយទះកំភ្លៀងធ្វើឲ្យមានការ ភ្ញាក់ផ្អើល នៅវេលាម៉ោង៣និង១០នាទីទៀបភ្លឺ ថ្ងៃទី៧ ខែតុលា នៅ មុខផ្ទះម៉ាស្សាកោជប់៧៧៧ តាមមហាវិម៉ៅសេទុង សង្កាត់ផ្សារដើមគ ខណ្ឌទួលគោក។
អ្នកឃើញហេតុការណ៍បានឲ្យដឹងថា មុនពេលកើតហេតុ មានគូស្នេហ៍មួយគូ ប្រុសស្នេហ៍ជាអ្នករត់ម៉ូតូឌុប រីឯនារីបំរើខារ៉ាអូខេនៅម្តុំអាងទឹកអូឡាំពិក បានជិះម៉ូតូវីវ៉ា ស៊េរី៩៧ ពណ៌ខ្មៅ ឌុបគ្នាទៅហូបបាយ នៅផ្សារដើមគ រួចជិះម៉ូតូបណ្តើរគ្នា តាមមហាវិថីម៉ៅសេទុង ក្នុងទិសដៅពីជើងទៅត្បូង បានបន្តិចក៏ឈ្លោះប្រកែកគ្នា ធ្វើឲ្យនារីវ័យក្មេងនោះ ចុះពីលើម៉ូតូដើរត្រឡប់មកក្រោយវិញ។
ចំណែក ប្រុសស្នេហ៍នោះ បានជិះម៉ូតូមកតាមក្រោយ ចាប់បោចសក់វាយទះតប់ធ្វើឲ្យនាងភ័យពេក បានរត់ចូលទៅក្នុងផ្ទះម៉ាស្សាកោសជប់៧៧៧ ឲ្យគេជួយ រួចហើយចេញមកក្រៅវិញ ត្រូវបុរសនោះ វាយទះតប់ទៀត ធ្វើឲ្យអ្នករត់តាក់ស៊ី និងរត់ម៉ូតូឌុបឃើញហើយ នាំគ្នាជួយឃាត់ ប៉ុន្តែបុរសនោះប្រាប់ថា ជារឿងក្រុមគ្រួសាររបស់គេ ។
បន្ទាប់អ្នកឃើញហេតុការណ៍បានទូរស័ព្ទរាយការណ៍ ទៅសមត្ថកិច្ចឲ្យចុះទៅជួយអន្តរាគមន៍ ដោយសារតែឃើញបុរសនោះ ប្រើអំពើហិង្សាទៅលើនារីវ័យក្មេង ។ លុះពេលសមត្ថកិច្ចចុះទៅដល់ និងមានអ្នកសារព័ត៌មានចុះទៅដល់ដែរ នារីវ័យក្មេងរូបនោះ ស្ទុះងើបឡើងឈប់អង្គុយទៀតហើយ ចំណែកបុរសខាងលើ ត្រូវសមត្ថកិច្ចណែនាំកុំឲ្យប្រើអំពើហិង្សា ដោយបុរសនោះនិយាយថា ឲ្យតែអូនឯងឈប់ទៅដេកជាមួយប្រុសនៅខាងក្រៅ រូបគេឈប់វាយ និងបានដឹកដៃគ្នាឡើងជិះម៉ូតូជិះចេញទៅបាត់ ៕ Cambodia News
