តំបន់កាស្មៀ៖ការវាយប្រហារចំនួនពីរលើកបានបណ្តាលឲ្យស្លាប់មនុស្សចំនួន ៩នាក់
នៅក្នុងប្រទេសឥណ្ឌា ក្រុមប្រដាប់អាវុធបន្លំខ្លួនពាក់ឯកសណ្ឋានជាយោធាបានបើកការ វាយប្រហារផ្ទួនៗគ្នានាថ្ងៃព្រហស្បតិ៍ ទី២៦ កញ្ញានេះលើមូលដ្ឋានយោធា និងប៉ូលិសឥណ្ឌានៅក្នុងតំបន់កាស្មៀ។ តុល្យការបណ្តោះអាសន្នផ្តល់ដោយប៉ូលិស និងទាហានឥណ្ឌាឲ្យដឹងថា មានមនុស្សស្លាប់យ៉ាងតិច ៩នាក់ ក្នុងនោះមានប៉ូលិស ៥នាក់ ទាហាន ២នាក់ និងជនស៊ីវិល ២នាក់។ អ្វីជាការកត់សម្គាល់ ការវាយប្រហារនេះបានកើតមានឡើង ជួនចំពេលដែលលោកនាយករដ្ឋមន្រ្តីឥណ្ឌា Manmohan Singh និងលោកនាយករដ្ឋមន្រ្តីប៉ាគីស្ថាន Nawaz Sharif គ្រោងនឹងជួបគ្នានាឱកាសមហាសន្និបាតអង្គការសហប្រជាជាតិក្នុងទីក្រុង ញូយ៉ក។
ក្រុមភេរវជនបានបើកការ វាយប្រហារលើពីរកន្លែងខុសគ្នាក្នុងរដ្ឋ Jammu Cachemire។ កន្លែងទី១ នៅប៉ុស្តិ៍ប៉ូលិស Hiranaga ស្ថិតចម្ងាយប្រមាណ ២០០គីឡូម៉ែត្រពីទីក្រុង Srinagar ដោយបានសម្លាប់ប៉ូលិស ៥នាក់ និងជនស៊ីវិល ២នាក់ រីឯកន្លែងទី២ នៅមូលដ្ឋានយោធាមួយស្ថិតក្នុងតំបន់ Samba ដោយបានសម្លាប់ទាហាន ២នាក់។ តែលោកដោយ ចៅហ្វាយរដ្ឋ Jammu Cachemire Omar Abdallah បានបដិសេធមិនផ្តល់ព័ត៌មានលម្អិតជុំវិញចំនួនអ្នកស្លាប់ដោយសំអាងថា ស្ថានការណ៍នៅមិនទាន់វិលមករកភាពប្រក្រតីវិញនៅឡើយទេ។ ដោយមិនបានចង្អុលចំមុខប្រទេសប៉ាគីស្ថាន លោក Abdallah គ្រាន់តែបានបញ្ជាក់ថា ក្រុមភេរវជនបានធ្វើដំណើរចេញពីប៉ាគីស្ថានចូលក្នុងទឹកដីឥណ្ឌាកាល ពីថ្ងៃពុធ ទី២៥ កញ្ញាម្សិលមិញ។
អ្វីជាការកត់សម្គាល់ ការវាយប្រហារនេះបានកើតមានឡើង ជួនចំពេលដែលលោកនាយករដ្ឋមន្រ្តីឥណ្ឌា Manmohan Singh និងលោកនាយករដ្ឋមន្រ្តីប៉ាគីស្ថាន Nawaz Sharif គ្រោងនឹងជួបគ្នានាចុងសប្តាហ៍នេះក្នុងទីក្រុងញូយ៉កនៅក្រៅ ក្របខណ្ឌមហាសន្និបាតអង្គការសហប្រជាជាតិ។ គោលដៅនៃជំនួប គឺដើម្បីកាត់បន្ថយភាពតានតឹងរវាងបងប្អូនគូសត្រូវទំាងពីរដែលកំពុង ឈ្លោះដណ្តើមគ្នាកាន់កាប់តំបន់កាស្មៀ។ លោក Abdallah បានចាត់ទុកទង្វើរបស់ក្រុមភេរវជនពេលនេះថា ជាការប៉ុនប៉ងកម្ទេចដំណើរស្វែងរកសន្តិភាពរវាងឥណ្ឌា និងបាគីស្ថាន។
ពីទីក្រុងញូយ៉ក គេនៅមិនទាន់មានប្រតិកម្មពីលោកនាយករដ្ឋមន្រ្តីប៉ាគីស្ថាននៅឡើយទេ តែលោកនាយករដ្ឋមន្រ្តីឥណ្ឌាបានថ្កោលទោសចំពោះទង្វើដែលលោកចាត់ទុកជា ទង្វើដ៏ឆ្កួតលីលា និងធានាថា ទង្វើរបៀបនេះនឹងមិនអាចយកឈ្នះលើកិច្ចខិតខំប្រឹងប្រែងស្វែងរក សន្តិភាពតាមផ្លូវចរចាបានឡើយ។
គួររម្លឹកជូនថា ការដណ្តើមអធិបតេយ្យតំបន់កាស្មៀបានជម្រុញប្រទេសមហាអំណាច នុយក្លេអ៊ែរទំាងពីរនៅអាស៊ីធ្លាក់ក្នុងសង្រ្គាមរវាងគ្នាចំនួនពីរ ដង និងហៀបនឹងផ្ទុះជាលើកទី៣ តំាងពីក្រោយពុះចែកតំបន់កាស្មៀជាពីរចំណែកក្នុងឆ្នំា ១៩៤៧។ ជារឿយៗ ឥណ្ឌាតែងតែបានចោទប៉ាគីស្ថានពីបទបានបំពាក់អាវុធឲ្យក្រុម អ្នកទាមទារផ្តាច់ទឹកដីនិយមចូលវាយប្រហារនៅតំបន់កាស្មៀឥណ្ឌា តែប៉ាគីស្ថានតែងតែបានបដិសេធជានិច្ច៕ដោយ គួច គន្ធារ៉ា (RFI)
