ពលរដ្ឋអាមេរិកនិងអង់គ្លេសស្ថិតក្នុងក្រុមភេរវជនដែលវាយប្រហារអគារពាណិជ្ជកម្មក្រុងណៃរ៉ូប៊ី
អាជ្ញាធរអាមេរិកកំពុងតែស៊ើបអង្កេត ទាក់ទងនឹងព័ត៌មានថា ពលរដ្ឋអាមេរិកស្ថិតក្នុងក្រុមភេរវជនអ៊ីស្លាមស្ហេបាប់ ដែលវាយប្រហារអគារពាណិជ្ជកម្ម ក្រុងណៃរ៉ូប៊ី នៅប្រទេសកេនយ៉ា តាំងពីថ្ងៃសៅរ៍មុន។ ក្រសួងការបរទេសកេនយ៉ាបានប្រាប់ថា ក្នុងចំណោមភេរវជនទាំងនោះ មានពលរដ្ឋអាមេរិកប្រហែល២ទៅ៣នាក់ និងមានស្ត្រីពលរដ្ឋអង់គ្លេសមួយរូបផងដែរ។ នៅថ្ងៃអង្គារនេះ ក្រុមភេរវជនបានប្រាប់ថា ខ្លួននៅមានចំណាប់ខ្មាំងក្នុងដៃនៅឡើយ។ រហូតមកដល់ពេលនេះ មានមនុស្សយ៉ាងហោច៦២នាក់ បានស្លាប់ក្នុងការវាយប្រហារដោយក្រុមភេរវជនទាំងនេះ។
គួររំលឹកឡើងវិញថា កាលពីថ្ងៃសៅរ៍កន្លងទៅ ក្រុមអ៊ីស្លាមជ្រុលនិយមស្ហេបាប់ ពាក់ព័ន្ធ ក្រុមឧទ្ទាមអាល់ កៃដា មកពីប្រទេសសូម៉ាលី បានវាយប្រហារអគារពាណិជ្ជកម្ម ក្រុងណៃរ៉ូប៊ី នៅប្រទេសកេនយ៉ា ធ្វើអោយមានមនុស្សរបួសនិងស្លាប់ជាច្រើននាក់។ អាជ្ញាធរកេនយ៉ាគិតថា ពលរដ្ឋបរទេសរឺក៏បណ្តាជនដែលរស់នៅអាមេរិក មានវត្តមាន ក្នុងចំណោមក្រុមភេរវជនដែលបានចាប់មនុស្សជាង១០នាក់ធ្វើជា ចំណាប់ខ្មាំង តាំងពីថ្ងៃសៅរ៍មក។ មេបញ្ជាការកងទ័ពកេនយ៉ា បានប្រាប់ថា ក្នុងក្រុមភេរវជនទាំងនោះ ក៏មានវត្តមានជនប្រដាប់អាវុធដែលមកពីប្រទេសជាច្រើនទៀតផងដែរ។
ដោយឡែក ក្រសួងការបរទេសកេនយ៉ាបានប្រាប់ថា ក្នុងចំណោមក្រុមភេរវជន មានពលរដ្ឋអាមេរិកប្រហែល២ទៅ៣នាក់ និងមានស្ត្រីពលរដ្ឋអង់គ្លេសមួយរូបផងដែរ។ ប៉ូលិសកំពុងសិក្សាពីព័ត៌មានដែលថា ស្ត្រីអង់គ្លេសរូបនេះ ជាស្ត្រីម៉េម៉ាយ មានស្វាមីជាភេរវជនដែលបានបំផ្ទុះគ្រាប់បែក ស្លាប់នៅទីក្រុងឡុង កាលពីដើមខែកក្កដា ឆ្នាំ២០០៥។
អាជ្ញាធរអាមេរិកកំពុងតែស៊ើបអង្កេតលើព័ត៌មានទាំងនេះ។ អាមេរិកទទួលស្គាល់ថា ពលរដ្ឋអាមេរិកប្រហែលជាង១០នាក់ បានធ្វើដំណើរទៅប្រទេសសូម៉ាលី ក្នុងរយៈពេលប៉ុន្មានឆ្នាំចុងក្រោយនេះ ដើម្បីហ្វឹកហាត់ក្នុងជួរក្រុមភេរវជនស្ហេបាប់។ ពលរដ្ឋអាមេរិកទាំងនោះ ភាគច្រើនរស់នៅរដ្ឋ Minnesota នៅភាគខាងលិចអាមេរិក ក្នុងតំបន់ Minneapolis saint paul សំបូរដោយពលរដ្ឋអាមេរិកដើមកំណើតពីអាហ្វ្រិកខាងកើតរស់នៅ។ គេហទំព័រ Twitter បានបង្ហាញនូវអត្តសញ្ញាណមួយរបស់ក្រុមភេរវជនស្ហេបាប់ ដែលបានសរសេរថា ការវាយប្រហារនៅក្រុងណៃរ៉ូប៊ី មានការចូលរួមពីពលរដ្ឋអាមេរិក៣នាក់ ពលរដ្ឋ កាណាដាម្នាក់ ពលរដ្ឋស៊ុយអែដម្នាក់ និងពលរដ្ឋហ្វាំងឡង់ម្នាក់ផងដែរ។
យោងតាម ប្រភពព័ត៌មានផ្សេងៗរបស់អាមេរិក អ្នកស៊ើបអង្កេតអាមេរិកគិតថា អត្តសញ្ញាណក្នុងគេហទំព័រ Twitter នេះ ជាអត្តសញ្ញាណមិនពិតប្រាកដនោះទេ។
អ្នកវិភាគគិតថា ក្រុមភេរវជនស្ហេបាប់ មកពីប្រទេសសូម៉ាលីនោះ ងាយនឹងទទួលយក បណ្តាជនមកពីបស្ចិមប្រទេស អោយចូលបំរើការក្នុងក្រុមខ្លួនណាស់ ព្រោះថា ជនបរទេសទាំងនោះ មានលិខិតឆ្លងដែនងាយស្រួលធ្វើដំណើរគ្រប់ទិសទី ហើយជនទាំងនោះ មិនសូវត្រូវបានគេត្រួតពិនិត្យហ្មត់ចត់នោះឡើយ៕ដោយ ព្រំ សឿន សូលីណា (RFI)
