នាយករដ្ឋមន្ត្រី អំពាវនាវឲ្យពលរដ្ឋប្រុងប្រយ័ត្ននឹងទឹកជំនន់
ភ្នំពេញ៖ នៅព្រឹកថ្ងៃទី២៥ ខែកញ្ញា នេះ លោកនាយករដ្ឋមន្ត្រី ហ៊ុន សែន បានអំពាវនាវឲ្យអាជ្ញាជាតិ និងក្រោមជាតិ បង្កើនការប្រុងប្រយ័ត្ន ជួយប្រជាពលរដ្ឋ ខណៈទឹកជំនន់ កំពុងក្លាយជាបញ្ហាព្រួយបារម្ភ។
ក្នុងការបើកកិច្ចប្រជុំគណៈរដ្ឋមន្ត្រី លោកនាយករដ្ឋមន្ត្រី មានប្រសាសន៍ថា ក្នុងខេត្តស្ទឹងត្រែង ក្រចេះ កំពង់ចាម កំពុងរងការគំរាមកំហែងច្រើនពីទឹកជំនន់។ លោកបន្តថា ទឹកជំនន់នៅខេត្តស្ទឹងត្រែង អាចស្រកនៅថ្ងៃនេះ។ លោកនាយករដ្ឋមន្ត្រីបញ្ជាក់ថា ចំណែកនៅខេត្តព្រៃវែង និងកណ្តាល ប្រជាពលរដ្ឋ ត្រូវប្រុងប្រយ័ត្ន ដោយសារទឹកអាចធ្លាក់មកខេត្តទាំងនោះ។
លោកនាយករដ្ឋមន្ត្រី អំពាវនាវឲ្យមានការយកចិត្តទុកដាក់ក្នុងការជម្លៀស ការផ្តល់ស្បៀងអាហារ និងការថែទាំងសុខភាពជាដើម និងពលរដ្ឋ ត្រូវប្រុងប្រយ័ត្នសម្រាប់សុវត្ថិភាពក្រុមគ្រួសារ ជាពិសេសផ្ទះដែលងាយរងគ្រោះ។
ចំណែកនៅខេត្តព្រះវិហារ ឧត្តរមានជ័យ និងបន្ទាយមានជ័យ ក៏កំពុងរងគ្រោះ ដោយសារជំនន់ទឹកភ្លៀងពីប្រទេសថៃ។
លោក ញឹម វណ្ណដា អនុប្រធានទី១នៃគណៈកម្មាធិការជាតិ គ្រប់គ្រងគ្រោះមហន្តរាយ ឲ្យដឹងថា មនុស្ស ៧នាក់ នៅខេត្ត កំពង់ចាម បានស្លាប់ដោយគ្រោះទឹកជំនន់ និងនៅខេត្តក្រចេះ មនុស្ស២នាក់ បានស្លាប់៕ Cambodia News