ពលរដ្ឋនៅកោះ Christmas Island នឹងរាយការណ៍ឲ្យពួកអ្នកកាសែតអំពីរឿងជនស្វែងសិទ្ធិជ្រកកោន
ពលរដ្ឋនៅលើកោះ Christmas Island និយាយថា ពួកគេនឹងដើរតួនាទីផ្ដល់ដំណឹងដល់ប្រព័ន្ធផ្សព្វផ្សាយនៅពេលដែល មានកាណូតជនស្វែងសិទ្ធិជ្រកកោនធ្វើដំណើរមកដល់ទឹកដីអូស្រ្ដាលី ប្រសិនបើរដ្ឋាភិបាលថ្មីរបស់អូស្រ្ដាលីសម្រេចចិត្ដមិនផ្ដល់ព័ត៌មាន នេះដល់ប្រព័ន្ធផ្សព្វផ្សាយ។
លោក Scott Morrison រដ្ឋមន្រ្ដីក្រសួងអន្ដោប្រវេសន៍អូស្រ្ដាលីទើបឡើងកាន់តំណែង កំពុងរៀបចំផែនការធ្វើសន្និសីទព័ត៌មានប្រចាំសប្ដាហ៍វិញ ជាជាងចេញការប្រកាសព័ត៌មានរាល់ពេលដែលមានការស្ទាក់ចាប់បានកាណូត ណាមួយនោះ។
លោកបានលើកឡើងថា ការផ្លាស់ប្ដូរនេះនឹងជួយកម្ចាត់ដល់ពាណិជ្ជកម្មរត់ពន្ធមនុស្ស តាមរយៈការផ្ដល់ព័ត៌មានតិចតួចដល់ពួកជនទាំងនោះ។
កាលពី ម្សិលមិញមានកាណូតមួយគ្រឿងទៀតដឹកជនស្វែងសិទ្ធិជ្រកកោន៣០នាក់ បានធ្វើដំណើរមកដល់កោះនេះ ហើយនេះគឺជាករណីដែលគេបានដឹងថា មានកាណូតធ្វើដំណើរមកដល់ជាលើកដំបូងតាំងពីរដ្ឋាភិបាលថ្មីរបស់ អូស្រ្ដាលីស្បថចូលកាន់តំណែង។
លោក Gordon Thomson សមាជិកក្រុមប្រឹក្សាឃុំសង្កាត់ម្នាក់នៃកោះ Christmas Island និយាយថា ពលរដ្ឋនៅកោះ Christmas បានសម្រេចចិត្ដធ្វើជាអ្នករាយការណ៍ព័ត៌មានដល់ប្រព័ន្ធផ្សព្វ ផ្សាយ៕ (Radio Australia)
