ព្រឹកនេះ សម្តេច ហ៊ុន សែន និងសម រង្ស៊ី ជួបទល់មុខគ្នា ក្នុងព្រះបរមរាជវាំង
ភ្នំពេញ៖ នៅព្រឹកថ្ងៃទី១៤ ខែកញ្ញានេះ ថ្នាក់ដឹកនាំកំពូលរបស់គណបក្សប្រជាជនកម្ពុជា និងគណបក្សសង្គ្រោះជាតិ ជួបប្រជុំទល់មុខគ្នា ដើម្បីធ្វើការដោះស្រាយបញ្ហាប្រទេសជាតិ ក្រោមព្រះរាជាធិបតីនៃព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នៅព្រះមហាប្រាសាទខេមរិន្ទ ក្នុងព្រះបរមរាជវាំង។
ការប្រជុំ ដោះស្រាយបញ្ហាប្រទេសជាតិ រវាងថ្នាក់ដឹកនាំកំពូលនៃគណបក្សកាន់អំណាច និងគណបក្សប្រឆាំង បានធ្វើឡើង បន្ទាប់ពីព្រះមហាក្សត្រ បានចេញព្រះរាជសារអញ្ជើញសម្តេចតេជោ ហ៊ុន សែន អនុប្រធានគណបក្សប្រជាជនកម្ពុជា និងលោកសម រង្ស៊ី ប្រធានគណបក្សសង្គ្រោះជាតិ កាលពីថ្ងៃទី១២ ខែកញ្ញា ឆ្នាំ២០១៣។
សមាសភាពថ្នាក់ដឹកនាំគណបក្សប្រជាជនកម្ពុជា ដែលត្រូវចូលរួមប្រជុំ រួមមាន សម្តេចតេជោ ហ៊ុន សែន អនុប្រធានគណបក្សប្រជាជនកម្ពុជា លោក សាយ ឈុំ និងលោកឧបនាយករដ្ឋមន្ត្រី ស ខេង។
ចំណែកថ្នាក់ដឹកនាំគណបក្សសង្គ្រោះជាតិ ដែលត្រូវចូលរួមប្រជុំក្រោមព្រះរាជាអធិបតីភាពរបស់ព្រះមហាក្សត្រ មាន ៣ រូបដែរ គឺលោក សម រង្ស៊ី ប្រធានគណបក្សសង្គ្រោះជាតិ លោក កឹម សុខា អនុប្រធាន និងលោកស្រី ជូឡុង សូមូរ៉ា។
លោក ជាម យៀប សមាជិកជាន់ខ្ពស់គណបក្សប្រជាជនកម្ពុជា បានឲ្យដឹងថា ព្រះមហាក្សត្រ មានតួនាទីសំខាន់ណាស់ ក្នុងការសម្របសម្រួល ដោះស្រាយបញ្ហាបោះឆ្នោត ធ្វើជាអាជ្ញាកណ្តាល ហើយព្រះអង្គ ហៅមេដឹកនាំបក្សទាំងពីរជួបប្រជុំ ព្រោះព្រះអង្គ ចង់ដឹងថា តើគណបក្សនីមួយៗ ចង់បានអី ហើយត្រូវដោះស្រាយយ៉ាងណា ដើម្បីរក្សា សន្តិសុខ និងស្ថិរភាពជាតិ។
លោក ជាម យៀប បន្តថា កិច្ចប្រជុំក្រោមព្រះរាជាធិបតីភាពរបស់ព្រះអង្គ នៅព្រឹកថ្ងៃសៅរ៍នេះ អាចជជែកគ្នារឿងការបែងចែកតួនាទីនៅសភា ហើយលោកសង្ឃឹមថា មានលទ្ធផលវិជ្ជមាន ច្រើនជាងអវិជ្ជមាន។
ប៉ុន្តែយ៉ាងណាក៏ដោយ លោក ជាម យៀប បានបញ្ជាក់ថា តែទោះជាយ៉ាងណាក៏ដោយ ការកោះប្រជុំសភាថ្មី លើកដំបូង នាថ្ងៃទី២៣កញ្ញា មិនអាចនឹងលើកពេលទេ។ ព្រះមហាក្សត្រ នឹងមិនដកថយ ឬពន្យារពេលនោះទេ៕ Cambodia News
