ព្រះអង្គម្ចាស់ William ចាកចេញពីការងារកងទ័ព ដើម្បីទៅពង្រីកការងារសប្បុរសធម៌
ប្រមុខកងទ័ពអាកាសអង់គ្លេសបាន សម្ដែងនូវ ការដឹងគុណចំពោះការចូលរួមអាជីពជាយោធារបស់ព្រះអង្គម្ចាស់ William បន្ទាប់ពីព្រះអង្គបានប្រកាសថានឹងចាកចេញពីការងារកងទ័ព ដើម្បីទៅពង្រីកការងារសប្បុរសធម៌របស់ព្រះអង្គ។
ព្រះ អង្គម្ចាស់ William បានបញ្ចប់ការងារពីក្រុមកងទ័ពសង្គ្រោះផ្នែកអាកាស ក្រោយពេលដែលបានបម្រើការងារនេះអស់រយៈពេលជាង៧ឆ្នាំកន្លះមកនោះ ដោយព្រះអង្គបានចូលរួមចំនួន ១៥៦ប្រតិបត្តិការ ដែលបានជួយសង្គ្រោះជនរងគ្រោះចំនួន ១៤៩នាក់។
ប្រមុខទ័ពអាកាស លោក Andrew Pulford មានប្រសាសន៍ថា ព្រះអង្គម្ចាស់ William បានចូលរួមប្រតិបត្តិការជួយសង្គ្រោះមនុស្សដោយផ្ទាល់ ហើយជាញឹកញាប់គឺនៅក្នុងស្ថានភាពដែលមានតម្រូវការខ្លាំង។
ព្រះរាជដំណាក់ Kensington បានឲ្យដឹងថា ព្រះអង្គម្ចាស់ William បានសម្រេចថានឹងពង្រីកការងាររបស់ព្រះអង្គនៅក្នុងការងារអភិរក្ស ជាពិសេសជាមួយនឹងការអភិរក្សសត្វកម្រដែលជិតផុតពូជហើយកំពុងជួប គ្រោះថ្នាក់ ព្រមទាំងបន្តការងារជាមួយនឹងសកម្មភាពសប្បុរសធម៌របស់ព្រះអង្គដែល ទាក់ទងនឹងកុមារ, អតីតយុទ្ធជន និងសមាជិកនៃកងកម្លាំងប្រដាប់អាវុធ៕(Radio Australia)
