អង្គការសហប្រជាជាតិ៖១ភាគ៤នៃបុរសនៅអាស៊ីប៉ាស៊ីហ្វិកធ្លាប់បានរំលោភស្ត្រី
អង្គការសហប្រជាជាតិបានចុះផ្សាយ របាយការណ៍ស៊ើបអង្កេតមួយ នៅថ្ងៃអង្គារម្សិលមិញនេះ បង្ហាញថា បុរសជិត១ភាគ៤ នៅតំបន់អាស៊ីប៉ាស៊ីហ្វិក ធ្លាប់បានរំលោភបំពានរាងកាយលើស្ត្រីភេទ។ លទ្ធផលនៃការស៊ើបអង្កេតរបស់អ.ស.ប បង្ហាញថា អំពើហិង្សាលើស្ត្រី គឺជាបញ្ហាជាក់ស្តែងដែលសង្គមមនុស្សពិបាកប្រឈមមុខ។
អង្គការ សហប្រជាជាតិ បានធ្វើការស៊ើបអង្កេតទៅលើបុរសនៅតំបន់អាស៊ីប៉ាស៊ីហ្វិក ជាងមួយម៉ឺននាក់ អាយុពី១៨ឆ្នាំទៅ ៤៩ឆ្នាំ នៅក្នុងប្រទេសចំនួន៦ គឺ៖ កម្ពុជា បង់ក្លាដែស ចិន ឥណ្ឌូនេស៊ី ប៉ាពូអាស៊ី-នូវេលហ្គីណេ និងស្រីលង្កា។ លទ្ធផលបង្ហាញថា បុរសជិត១ភាគ៤ នៅតំបន់អាស៊ីប៉ាស៊ីហ្វិក ធ្លាប់បានរំលោភបំពានរាងកាយលើស្ត្រីភេទ។
ការស៊ើបអង្កេត នេះមានលក្ខណៈថ្មីពិសេសមួយ គឺថា អ្នកស៊ើបអង្កេតបានចំណាយពេលវេលាជួបផ្ទាល់ជាមួយបុរសទាំងនោះ ហើយបានចំណាយពេលយូរដើម្បីសាកសួរពួកគេ។ អ្នកស៊ើបអង្កេតបានអនុញ្ញាតអោយបុរសទាំងនោះ បិទបាំងអត្តសញ្ញាណពិតប្រាកដរបស់ខ្លួន។ នេះជាការស៊ើបអង្កេតពិសេស ខុសពីរាល់ដង ដែលអ្នកស៊ើបអង្កេតតែងតែសាកសួរទៅលើនារីភេទដែលរងគ្រោះដោយការ រំលោភបំពានផ្លូវកាយ ជាជាងទៅលើជនសង្ស័យ។
សំណួរដែលចោទឡើងនោះ មិនបានសួរផ្ទាល់ថា៖ តើបុរសទាំងនោះធ្លាប់បានរំលោភរឺក៏យ៉ាងណានោះទេ។ ប៉ុន្តែ បានសួរថា៖ តើពួកគេមានធ្លាប់បានបង្ខំនារីដែលមិនមែនជាភរិយា រឺក៏សង្សារអោយរួមភេទជាមួយពួកគេដែរទេ? នៅបង់ក្លាដែស មានបុរសតែជាង៤ភាគរយប៉ុណ្ណោះដែលឆ្លើយថា ធ្លាប់បង្ខំអោយនារីរួមភេទជាមួយខ្លួន។ ផ្ទុយទៅវិញ នៅនៅកោះប៊ូហ្កាំងវីល នៅប្រទេសប៉ាពូអាស៊ី-នូវេលហ្គីណេ បុរសទុច្ចរិតទាំងនោះមានដល់ទៅជាង៤០ភាគរយឯណោះ។ ប៉ាពូអាស៊ី-នូវេលហ្គីណេ គឺជាប្រទេសដែលមានអំពើហិង្សាលើស្ត្រីភេទខ្ពស់បំផុត នៅលើពិភពលោក។
ប៉ុន្តែ អ្វីដែលគួរអោយបារម្ភខ្លាំងនោះ គឺថា ចំនួនពាក់កណ្តាលនៃបុរសដែលបានទទួលស្គាល់ថា ខ្លួនធ្លាប់រំលោភស្ត្រីភេទ គឺជាយុវជនស្ថិតក្នុងវ័យជំទង់នៅឡើយ ហើយ១២ភាគរយក្នុងចំណោមនោះ គឺមានអាយុមិនដល់១៥ឆ្នាំនោះទេ។ ហើយបុរសរំលោភស្រីភាគច្រើនក៏មិនត្រូវបានផ្តន្ទាទោសតាមច្បាប់ នោះដែរ។
ដើម្បីទប់ស្កាត់បញ្ហារំលោភផ្លូវភេទនេះ អ្នកធ្វើរបាយការណ៍ស៊ើបអង្កេតនានា បានទទូចអោយមានវិធានការដូចជា ជួយយកចិត្តទុកដាក់លើស្ត្រីរងគ្រោះ និងផ្តន្ទាទោសជាក់ស្តែងប្រឆាំងជនពាល៕ដោយ ព្រំ សឿន សូលីណា(RFI)