អាជ្ញាធរក្រុង អនុញ្ញាតឲ្យគណបក្សសង្គ្រោះជាតិ ធ្វើបាតុកម្ម ដោយមិនមានការហែក្បួន និងមិនបោះជំរុំ
ភ្នំពេញ៖ បន្ទាប់ពី កិច្ចប្រជុំប្រហែលជា ៣ ម៉ោង នៅព្រឹកថ្ងៃទី១១កញ្ញានេះ រវាងអាជ្ញាធរសាលារាជធានីភ្នំពេញ និងតំណាងគណបក្សសង្គ្រោះជាតិ អាជ្ញាធរសមត្ថកិច្ច បានសម្រេចឯកភាពតាមសេចក្តីជូនដំណឹងរបស់គណបក្សសង្គ្រោះជាតិ។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ បានបញ្ជាក់ថា អាជ្ញាធរសមត្ថកិច្ច អនុញ្ញាតឲ្យគណបក្សសង្គ្រោះជាតិ ធ្វើបាតុកម្ម ស្របតាមច្បាប់បាតុកម្ម ចាប់ពីម៉ោង ៦ ព្រឹក ដល់ម៉ោង ៦ ល្ងាច ដោយមិនមានការបោះតង់ ធ្វើជំរុំស្នាក់នៅពេលយប់នោះទេ រីឯចំនួនអ្នកចូលរួមបាតុកម្ម ក៏មិនត្រូវលើសពី ១ម៉ឺននាក់។
ប៉ុន្តែខាងគណបក្សសង្គ្រោះជាតិ ដែលមានលោក ហូរ វ៉ាន់ លោក ម៉ៅ មុនីវណ្ណ និងលោក ឡុង រី ចូលរួមប្រជុំ នៅតែរក្សាជំហរ ធ្វើបាតុកម្មរយៈពេល ៣ ថ្ងៃ ៣ យប់ នៅទីលានប្រជាធិបតេយ្យ ដោយបោះជំរុំតង់កៅស៊ូ ចាប់ពីថ្ងៃអាទិត្យ ទី១៥កញ្ញា ដោយមានអ្នកចូលរួមចាប់ពី២ម៉ឺននាក់ឡើងទៅ។
តំណាងអ្នកដឹកនាំ បាតុកម្ម លោក ហូរ វ៉ាន់ បានបញ្ជាក់ទៅកាន់អាជ្ញាធរសមត្ថកិច្ច ពីការធានាសន្តិសុខក្នុងក្រុមបាតុករដែលគណបក្សប្រឆាំង មានស្នាដៃ ធ្វើបាតុកម្ម ដោយគ្មានអំពើហិង្សា និងដោយសុវត្ថិភាព ក្នុងពេលកន្លងមក ពិសេសកាលពីថ្ងៃទី៧កញ្ញា។
យ៉ាងណាក៏ដោយ លោក ឡុង ឌីម៉ង់ បានបញ្ជាក់ថា ចំពោះចំណុចមិនទាន់ឯកភាពគ្នា លើចំនួនអ្នកចូលរួម និងការធ្វើបាតុកម្ម ៣ ថ្ងៃ ២៤ ម៉ោង ដោយបោះតង់ដេកនៅទីលានប្រជាធិបតេយ្យ ជាដើមនោះ អាជ្ញាធរសាលារាជធានីភ្នំពេញ នឹងសុំគោលការណ៍សម្រេចពីក្រសួងមហាផ្ទៃ។
សូមរម្លឹកថា គណបក្សសង្គ្រោះជាតិ បានប្រកាសធ្វើមហាបាតុកម្មអហិង្សា រយៈពេល ៣ ថ្ងៃ ៣យប់ ចាប់ពីថ្ងៃអាទិត្យ មានបំណងដូចបាតុកម្មលើកមុន គឺដើម្បីទាមទារឲ្យបង្កើតគណៈកម្មការពិសេសឯករាជ្យ ដើម្បីដោះស្រាយបញ្ហាបោះឆ្នោត៕ នាង/Cambodia News
