គ្មានថ្ងៃដែលចំនួនមនុស្សស្លាប់ដោយអំពើភេរវកម្មចុះថយ នៅអ៊ីរ៉ាក់
ការវាយប្រហារបំផ្ទុះគ្រាប់បែកដោយ ក្រុមភេរវករបានសម្លាប់មនុស្សជារៀងរាល់ថ្ងៃ នៅប្រទេសអ៊ីរ៉ាក់។ យោងតាមរបាយការណ៍របស់អង្គការសហប្រជាជាតិ ចុះផ្សាយ កាលពីថ្ងៃអាទិត្យទី ១កញ្ញា នៅតែនៅក្នុងអំឡុងខែសីហាមុន ចំនួនមនុស្សស្លាប់ ដោយអំពើភេរវកម្មហិង្សាមានដល់ ជាង៨០០នាក់។
នៅខែសីហា ជនរងគ្រោះស្លាប់ដោយអំពើហិង្សាប្រដាប់អាវុធនៅអ៊ីរ៉ាក់ មានចំនួនថយចុះ បើប្រៀបធៀបនឹងខែកក្កដា ដែលការវាយប្រហារបំផ្ទុះគ្រាប់បែកបានសម្លាប់ជនស៊ីវិល និងទាហានរដ្ឋាភិបាលដល់ទៅជាង១០៥៧នាក់។ គេមិនត្រូវត្រេកអរនឹងដំណឹងនេះទេ ព្រោះ មុន និងក្រោយ អំពើហិង្សាប្រដាប់អាវុធនៅ អ៊ីរ៉ាក់ គ្មានថ្ងៃនឹងរលុបបាត់ពីអ៊ីរ៉ាក់។ សង្រ្គាមឈ្លានពានរបស់អាមេរិក ទៅលើអ៊ីរ៉ាក់ កាលពីខែមីនា ឆ្នាំ ២០០៣ ក្រោមលេសថា អ៊ីរ៉ាក់មានលាក់អាវុធគីមី ប្រល័យលោក បានធ្វើឲ្យប្រទេសមួយនេះ ជួបអស្ថិរភាពនយោបាយ និងអសន្តិសុខ ជារៀងរហូតមក។ គេបានវាយតម្លៃថា សង្រ្គាមរ៉ាំរ៉ៃជិត១០ឆ្នាំ បានសម្លាប់មនុស្ស ជាង១លាននាក់ ក្នុងនោះមានភាគច្រើន ជាប្រជាជនស៊ីវិលអ៊ីរ៉ាក់។
ទោះបីជាសង្រ្គាមអ៊ីរ៉ាក់បានបញ្ចប់ទៅមែន ហើយទ័ពអាមេរិកក៏បានដកសឹងតែអស់ហើយពីទឹកដីអ៊ីរ៉ាក់ ប៉ុន្តែ អំពើហិង្សា ភេរវកម្មនៅតែមាន។ យោងតាមអ្នកតំណាងពិសេសរបស់អង្គការសហប្រជាជាតិ ចាប់តាំងពីដើមឆ្នាំ ២០១៣នេះ មនុស្សស្លាប់ដោយអំពើហិង្សា មានដល់ទៅ ជាង៥ពាន់នាក់ និងអ្នករបួសមានចំនួន ជាង ១២០០០នាក់។ អំពើភេរវកម្មបំផ្ទុះរថយន្តមានកាន់តែច្រើន ចាប់តាំងពីរដ្ឋាភិបាល មកពីនិកាយChiites បានបើកការប្រយុទ្ធបង្រ្កាបសកម្មជន និកាយ Sunnites ដែលរដ្ឋាភិបាលចាត់ទុកថា ជាក្រុមភេរវករ មានជាប់ទាក់ទងជាមួយបណ្តាញអាល់កៃដា។
រហូតមក អ្នកជំនាញការ និងមន្រ្តីទូតបរទេសបានក្រើនរំលឹកដល់រដ្ឋាភិបាលថ្មី មកពីនិកាយChiiteធ្វើសម្បទាន ព្រមធ្វើកំណែទម្រង់ដើម្បីបន្ថយកំហឹងរបស់សហគមន៍Sunnites។ ក្រុមនិកាយSunnitesដែលធ្លាប់មានអំណាចពេញដៃ នៅក្នុងសម័យគ្រប់គ្រងរបស់លោកសាដាម ហ៊ូសេន បានចោទរដ្ឋាភិបាលអ៊ីរ៉ាក់ថ្មីថា ក្តោបក្តាប់អំណាចតែម្នាក់ឯង និងបែងចែកប្រយោជន៍តែជាមួយបក្សពួករបស់ខ្លួន គឺប្រជាជននិកាយChiites៕ដោយ ឈាង បុប្ផា (RFI)