ក្រុមឧទ្ទាមតំបន់កាស្មៀរ គំរាមវាយប្រហារខ្លាំងក្លាទៅឥណ្ឌា
តាមប្រភពព័ត៌មានដកស្រង់ដោយ សារព័ត៌មានបារាំង AFP នៅថ្ងៃពុធ ទី២៨សីហានេះ ក្រុមឧទ្ទាមតំបន់កាស្មៀរ បានធ្វើការគំរាមវាយប្រហារឥណ្ឌា តាមរយៈអំពើហិង្សាជាច្រើន ដែលពុំធ្លាប់ជួបប្រទះពីមុនមក។ ក្រុមឧទ្ទាមដែលគំរាមឥណ្ឌានេះ មានចំនួនរាប់ពាន់នាក់ ភាគច្រើនមានប្រភពមកពីអាហ្វហ្កានិស្ថាន។ ការ គំរាមនេះ បានដាក់ទំងន់បន្ថែមទៅលើស្ថានភាពដែលកំពុងតានតឹងដោយអំពើហិង្សានានា នៅតាមព្រំដែនរវាងប្រទេសឥណ្ឌានិងប៉ាគីស្ថាន។
ក្រុមឧទ្ទាម តំបន់កាស្មៀរ ដែលគំរាមវាយប្រហារឥណ្ឌានេះ មានគ្នារាប់ពាន់នាក់ ហើយមានគំរោងបង្កើនសកម្មភាពហិង្សាប្រឆាំងឥណ្ឌា នៅតំបន់កាស្មៀរឥណ្ឌា អោយកាន់តែច្រើនថែមទៀត ក្នុងពេល ឆាប់ៗខាងមុខនេះ។ ការវាយប្រហារប្រឆាំងឥណ្ឌាក៏មានគំរោងបន្តដល់ច្រើនឆ្នាំទៅមុខទៀតផងដែរ។ នេះ បើយោងតាមសារព័ត៌មានបារាំង AFP ដែលបានស្រង់សំដី ស៊ីយ៉េត សាឡាហ៊ូឌីន ជាមេដឹកនាំក្រុមប្រឹក្សាសហភាពជីហាដមួយ។ សហភាពនេះប្រមូលផ្តុំទៅដោយក្រុមប្រដាប់អាវុធនានា ដែលធ្វើសកម្មភាពប្រឆាំងឥណ្ឌា នៅតំបន់កាស្មៀរឥណ្ឌា។
យោងតាម មេដឹកនាំក្រុមប្រឹក្សាសហភាពជីហាដ ក្រុមឧទ្ទាមដែលគំរាមឥណ្ឌានេះ មានគ្នារាប់ពាន់នាក់ ហើយភាគច្រើនមកពីអាហ្វហ្កានិស្ថាន។ គឺជាក្រុមដែលធ្វើសកម្មភាពប្រយុទ្ធនឹងកងទ័ពអង្គការអូតង់ នៅ ទីនោះ។
តាមរយៈការគំរាមរបស់ក្រុមឧទ្ទាមទាំងនេះ គេរំពឹងថា ចំនួនសកម្មជនប្រយុទ្ធអ៊ីស្លាមប្រឆាំងឥណ្ឌា នៅកាស្មៀរ កំពុងតែកើនច្រើនឡើង។ ការគំរាមរបស់ក្រុមឧទ្ទាម បានបង្ក ភាពតានតឹងបន្ថែមទៀត ក្នុងតំបន់កាស្មៀរឥណ្ឌា។ ចាប់តាំងពីដើមខែសីហាមក ការបាញ់ប្រហារគ្នានៅតាមខ្សែបន្ទាត់ព្រំដែនរវាងឥណ្ឌានិងប៉ាគីស្ថាន បានសម្លាប់មនុស្ស១១នាក់ ធ្វើអោយទំនាក់ទំនងឥណ្ឌានិងប៉ាគីស្ថាន កាន់តែតានតឹង។ ប៉ាគីស្ថានបានបដិសេធថា មិនបានពាក់ព័ន្ធនឹងអំពើវាយប្រហារអស់នេះទេ ហើយថែមទាំងបានសន្យាស្តារទំនាក់ទំនងជាមួយឥណ្ឌា អោយបានប្រសើរឡើងទៀតផង។
ដូច្នេះ មានន័យថា អំពើវាយប្រហារកន្លងមក អាចពាក់ព័ន្ធជាមួយក្រុមឧទ្ទាម។ ចាប់តាំងពីឆ្នាំ១៩៨៩មក នៅតំបន់កាស្មៀរឥណ្ឌា មានក្រុមឧទ្ទាមប្រមាណជា១២ក្រុម បានប្រយុទ្ធទាមទារឯករាជ្យ រឺក៏ទាមទារអោយតំបន់កាស្មៀរឥណ្ឌាចូលជាកម្មសិទ្ធិរបស់ប៉ាគិស្ថាន។
នៅពាក់កណ្តាលទស្សវត្សរឆ្នាំ១៩៩០ ក្រុមជីហាដបរទេស ដូចជាក្រុមអារ៉ាប់ និងក្រុមជីហាដអាហ្វ ហ្កានិស្ថាន បានចូលរួមសកម្មភាពជាមួយក្រុមឧទ្ទាមនៅកាស្មៀរឥណ្ឌា។ ប៉ុន្តែ ចាប់តាំងពីប៉ាគីស្ថានក្លាយជាដៃគូនយោបាយសំខាន់របស់អាមេរិក ក្រោយអំពើភេរវកម្មក្រុងញូវយក ឆ្នាំ២០០១ មក ការ ផ្លាស់ប្តូរស្ថានការនេះ ធ្វើអោយក្រុមឧទ្ទាមពិបាកទទួលយកណាស់។ ក្រុមឧទ្ទាមប្រកាសថា ក្នុងសកម្មភាពប្រយុទ្ធ ក្រុមខ្លួនលែងត្រូវការជំនួយខុសច្បាប់ពីកងទ័ពប៉ាគីស្ថាន និងលែងគោរពបញ្ជាប៉ាគីស្ថានទៀត ហើយ៕ដោយ ព្រំ សឿន សូលីណា (RFI)
