សម រង្ស៊ី ស្នើឱ្យគ.ជ.ប រក្សាកញ្ចប់សុវត្ថិភាព“ក” ឱ្យខ្ពស់បំផុត
ភ្នំពេញ៖ កាលពីថ្ងៃទី២១ ខែសីហា លោកសម រង្ស៊ី ប្រធានគណបក្សសង្គ្រោះជាតិ បានសរសេរលិខិតទៅ លោកអ៊ឹម សួស្តី ដើម្បីស្នើអោយ ប្រធានគណៈកម្មាធិការជាតិរៀបចំការបោះឆ្នោតរូបនេះ រក្សាទុកកញ្ចប់សុវត្ថិភាព «ក» អោយមានសុវត្ថិភាពខ្ពស់បំផុត។
នៅក្នុងលិខិតដែលផ្ញើទៅប្រធានគជប លោកសម រង្ស៊ីបានសរសេរប្រាប់លោកអ៊ឹម សួស្តីថា ក្រុមប្រឹក្សាធម្មនុញ្ញដែលកំពុងពិនិត្យបណ្តឹងបោះឆ្នោតរបស់គណបក្សស ង្គ្រោះជាតិ នឹងអាចសម្រេចអោយ គជប ពិនិត្យ និងផ្ទៀងផ្ទាត់ឯកសារពាក់ព័ន្ធនានានៅក្នុងកញ្ចប់សុវត្ថិភាព «ក» នេះ។
កញ្ចប់សុវត្ថិភាព «ក» មានរក្សាឯកសារដើមជាច្រើនមកពីការិយាល័យបោះឆ្នោត និងរាប់សន្លឹកឆ្នោត ដូចជា ទំរង់ ១១០១ ១១០២ ១១០៨ បញ្ជីបោះឆ្នោតដែលត្រូវបានប្រើក្នុងថ្ងៃបោះឆ្នោត ត្រាសម្ងាត់ សន្លឹកឆ្នោតខូច គល់បញ្ជីសន្លឹកឆ្នោត និងផ្ទាំងក្រដាសធំសម្រាប់កត់ត្រាសំឡេងឆ្នោតជាដើម។
ចំពោះលោកសម រង្ស៊ី កញ្ចប់សុវត្ថិភាព «ក» នេះ គឺជាឯសារភស្តុតាង សម្រាប់យកមកប្រើប្រាស់ជាមូលដ្ឋានក្នុងការត្រួតពិនិត្យ និងផ្ទៀងផ្ទាត់ទិន្នន័យលទ្ធផលបោះឆ្នោត របស់ គជប និងគណបក្សនយោបាយ៕ Cambodia News
