កុមារាម្នាក់ទៀតហើយ ស្លាប់ដោយសារជំងឺផ្តាសាយបក្សី
ភ្នំពេញ៖ កុមារាម្នាក់ អាយុ៩ឆ្នាំ រស់នៅក្នុងភូមិ ដំណាក់ដង្កោ ឃុំរាំងកេសី ស្រុកសង្កែខេត្តបាត់ដំបង បានឆ្លងជំងឺផ្តាសាយបក្សី កាលពីថ្ងៃទី៩ ខែសីហា និងត្រូវបានបញ្ជូនទៅព្យាបាលនៅមន្ទីរពេទ្យ ក្នុងខេត្តសៀមរាប ហើយបានស្លាប់កាលពីយប់ថ្ងៃអាទិត្យ វេលាម៉ោង១១យប់ នេះជាករណីទី១០នៃការស្លាប់ ក្នុងឆ្នាំ២០១៣នេះ។
អង្គការសុខភាពពិភពលោក រាយការណ៍មកថា កុមារបានប៉ះពាល់ជាមួយទា និងមាន់ស្លាប់នៅក្នុងភូមិ ដោយកាន់បក្សីស្លាប់ទាំងនោះពីក្នុងទ្រុង យកទៅឲ្យបងស្រីចំអិនម្ហូប។
ប្រធាននាយកដ្ឋានប្រយុទ្ធប្រឆាំង ជំងឺឆ្លងនៃក្រសួងសុខាភិបាល លោកវេជ្ជបណ្ឌិតសុខ ទូច បានសំណូមពរឲ្យឪពុកម្តាយ ឬអាណាព្យាបាល ប្រុងប្រយ័ត្ន និងការពារឲ្យបានខ្ពស់ចំពោះកូនចៅរបស់ខ្លួន ខណៈជំងឺផ្តាសាយនេះ មានសភាពកាចសាហាវ។
កាលពីថ្ងៃទី១៣ខែសីហា ក្រសួងសុខាភិបាល បានប្រកាសថា ក្មេងប្រុស-ស្រី២នាក់នៅខេត្តកណ្តាល និងខេត្តបាត់ដំបង បានឆ្លងជំងឺគ្រុនផ្តាសាយបក្សី ហើយត្រូវបានបញ្ជូនមកជួយសង្គ្រោះនៅមន្ទីរពេទ្យខេត្តសៀមរាប និងរាជធានីភ្នំពេញ ហើយពេលក្មេងប្រុសម្នាក់មកពីបាត់ដំបង បានស្លាប់កាលពីយប់ថ្ងៃអាទិត្យ ខែសីហា វេលាម៉ោង១១យប់៕ Cambodia News
