បុរសម្នាក់ត្រូវរថយន្តដឹកដីបើកបុក និងកិនស្លាប់
ភ្នំពេញ៖ កាលពី វេលាម៉ោង ៥និង៤០នាទីល្ងាចថ្ងៃទី១៨ ខែសីហា បុរសម្នាក់បានស្លាប់បាត់បង់ជីវិតយ៉ាង អាណោចអាធ័ម ដោយសារតែត្រូវរថយន្តដឹកដីមួយគ្រឿង បើកបុកពេលទំហឹង និងកិនចំពាក់កណ្តាលខ្លួន នៅចំណុចផ្លូវលេខ ២៧៦ មុខផ្សារហេងលី ក្នុងសង្កាត់ទឹកថ្លា ខណ្ឌសែនសុខ។
តាមប្រភពព័ត៌មានពីកន្លែងកើតហេតុបានឲ្យដឹងថា ជនរងគ្រោះដែលបានស្លាប់បាត់បង់ជីវិតឈ្មោះ សៀង កុសល អាយុ២៥ឆ្នាំ ស្នាក់នៅភូមិត្រពាំងឈូក សង្កាត់ទឹកថ្លា ខណ្ឌសែនសុខ ។
ប្រភពដដែលបានបន្តថា មុនពេលកើតហេតុគេបានឃើញជនរងគ្រោះបានជិះម៉ូតូរ៉ឺម៉កដឹកទឹកកក មួយគ្រឿងធ្វើដំណើរតាមបណ្តោយផ្លូវ ២៧៦ក្នុងទិសដៅពីជើងទៅត្បូង។ ខណៈពេលជិះមកដល់ចំណុចកើតហេតុ ស្រាប់តែមានរថយន្តហ៊ីយ៉ាន់ដាយ ពណ៌ខៀវ ពាក់ស្លាកលេខ ភ្នំពេញ 3A-5189 បើកបរដោយបុរសម្នាក់ ក្នុងទិសដៅស្របគ្នា ក្នុងល្បឿនយ៉ាងលឿនដើម្បីបើកវ៉ារ៉ឺម៉កម៉ូតូជនរងគ្រោះ ប៉ុន្តែរថយន្តវ៉ាមិនផុត ក៏ទាក់ដៃរ៉ឺម៉កម៉ូតូ បណ្តាលឲ្យជនរងគ្រោះដួលចូលក្រោមកង់រថយន្ត កិនធ្លាយពោះស្លាប់យ៉ាងអាណោចអាធ័ម។
ក្រោយពេលកើតហេតុតៃកុងរថយន្តបានបើកទ្វាររត់គេចខ្លួនបាត់ បន្ទាប់មកកម្លាំងសមត្ថកិច្ចក៏បានចុះទៅអន្តរាគមន៍ ដើម្បីធ្វើការវាស់វែង និងបាននាំយកវត្ថុតាងទាំង២ទៅរក្សាទុកនៅអធិការដ្ឋានជាបណ្តោះអា សន្នដើម្បីរង់ចាំធ្វើការដោះស្រាយនៅពេលក្រោយ។ ចំណែកសាកសពជនរងគ្រោះ ត្រូវបានក្រុមគ្រួសារដឹកយកទៅធ្វើបុណ្យតាមប្រពៃណី៕ Cambodia News