លោក សម រង្ស៊ីប្រកាសមិនចូលប្រជុំសភាថ្ងៃដំបូង
ភ្នំពេញ៖ ប្រធានគណបក្សសង្គ្រោះជាតិ លោក សម រង្ស៊ី បានបញ្ជាក់ក្នុងបណ្តាញសង្គមហ្វេសប៊ុករបស់ខ្លួន កាលពីថ្ងៃទី៥សីហា ថាមិនចូលរួមប្រជុំសភានៅថ្ងៃដំបូង ជាដាច់ខាត ប្រសិនបើគ្មានដំណោះស្រាយស្តីពីភាពមិនប្រក្រតីនៃការបោះឆ្នោតអាណត្តិ ទី៥នេះទេ
ថ្លែងទៅកាន់ពលរដ្ឋដែលមានទំនាស់ដីធ្លីនៅបឹងកក់ លោកសម រង្ស៊ី នៅតែទាត់ចោលលទ្ធផលបោះឆ្នោតបណ្តោះអាសន្ន ហើយអំពាវនាវឱ្យអង្គកាសហប្រជាជាតិ ចូលអន្តរាគមន៍ធ្វើជាអាជ្ញាកណ្តាលសម្រាប់ការដោះស្រាយភាពមិនប្រក្រតី ដែលបក្សប្រឆាំងចោទថា បានបង្កឡើងដោយគណបក្សកាន់អំណាច និងគណៈកម្មាធិការជាតិរៀបចំការបោះឆ្នោត។
ការតវ៉ារបស់បក្សប្រឆាំងបានធ្វើឡើងខណៈដែល គណបក្សប្រជាជនកម្ពុជា បានអះអាងថា ខ្លួននៅតែបន្តដឹកនាំរដ្ឋាភិបាលដដែល ដោយទទួលបានកៅអីក្នុងសភាចំនួន ៦៨ ទល់នឹង ៥៥កៅអីរបស់គណបក្សសង្គ្រោះជាតិ។
ប៉ុន្តែ ការគំរាមមិនចូលប្រជុំសភារបស់គណបក្សប្រឆាំងមិនបានធ្វើឲ្យ គណបក្សកាន់អំណាចព្រួយបារម្ភទេ។ លោក នាយករដ្ឋមន្ត្រីហ៊ុន សែន បានបញ្ជាក់រួចហើយថា បើទោះបីជាគណបក្សប្រឆាំងមិនចូលរួមក៏ដោយ ក៏គណបក្សប្រជាជនកម្ពុជានៅតែ អាចដំណើរការរដ្ឋសភាសម្រាប់នីតិកាលថ្មីបានដដែល។
សម្រាប់គណបក្សកាន់អំណាច ការមិនចូលប្រជុំរបស់គណបក្សប្រឆាំង មានន័យស្មើនឹងការបោះបង់អាសនៈសភាចោល ហើយពេលនោះ គជប នឹងធ្វើការបែងចែកអាសនៈទាំងនោះឱ្យទៅគណបក្សនយោបាយផ្សេងៗទៀត។
គួររំលឹកផងដែរថាដើម្បីដោះស្រាយភាពជាប់គាំងនយោបាយក្រោយការបោះឆ្នោត លោកនាយករដ្ឋមន្ត្រីហ៊ុន ធ្លាប់ប្រកាសបើកផ្លូវចរចារជាមួយលោក សម រង្ស៊ីម្តងរួចមកហើយកាលពីថ្ងៃទី៣១កក្កដា ដើម្បីជជែកពីការដឹកនាំក្បាលម៉ាស៊ីនរដ្ឋសភា។
ប៉ុន្តែ បក្សប្រឆាំងមិនទទួលយកការចរចាណាមួយទេក្រៅតែពីការទាមទារឲ្យដោះស្រាយ ភាពមិនប្រក្រតីនៃការបោះឆ្នោត។ គម្រោងនៃការបង្កើតគណៈកម្មការចម្រុះក៏បានទទួលបរាជ័យទៀតក្រោយពី គណបក្សសង្គ្រោះជាតិបានដកខ្លួន៕ Cambodia News
